गण्डकीमा अविश्वास प्रस्ताव ल्याएका तीन दललाई ‘फ्लोर क्रस’ को डर, सांसदलाई रिसोर्टमा राखियो

गण्डकीमा अविश्वास प्रस्ताव ल्याएका तीन दललाई ‘फ्लोर क्रस’ को डर, सांसदलाई रिसोर्टमा राखियो

कांग्रेस र माओवादी केन्द्रका सांसदलाई राखिएको कुटी रिसोर्ट ।

A+ A A-

अविश्वास प्रस्तावबारे छिनोफानो गर्न बोलाइएको गण्डकी प्रदेशसभाको विशेष अधिवेशन सोमबारदेखि सुरु भएको छ ।

मंगलबार पनि त्यसैमा थप छलफल हुनेछ र बोल्ने क्रम सकिए बुधबार मतदान हुनेछ । मतदानको दिन नजिकिँदै गर्दा मुख्यमन्त्री पृथ्वीसुब्बा गुरुङविरुद्ध अविश्वास प्रस्ताव ल्याएका तीन दलमा ‘फ्लोर क्रस’ को डर देखिएको छ ।

मतदानको दिन आउँदै गर्दा सरकार जोगाउन विकसित हुनसक्ने सांसद खिचातानी र प्रलोभनको डरले अविश्वास दर्ता गराएका दलका सांसद लेकसाइडस्थित रिसोर्टमा बसेका छन् । कांग्रेस र माओवादीका सांसद सोमबारदेखि लेकसाइडको दरबार मार्गस्थित कुटी रिसोर्टमा बसेका हुन् ।

‘जसपाका साथीहरू पनि नजिक–नजिक हुनुहुन्छ । हामी उहाँहरूसँग सम्पर्कमै छौँ । बैठक र छलफल गर्न सजिलो हुन्छ भनेर यसरी बसेका हौँ,’ कांग्रेसका एक सांसदले भने । यी तीन पार्टीका सांसद सोमबारको सदनपछि होटल पुगेका थिए । जनमोर्चाका सांसद भने त्यहाँ छैनन् । मतदानसम्म होटलबाटै संसद आवतजावत गर्नेछन् ।

अविश्वास प्रस्ताव अन्तिम घडीमा रहेको र कसरी अगाडि बढ्ने भनेर छलफल गर्न सजिलो हुन्छ भनेर आफूहरू एकै ठाउँमा बसेको कांग्रेसका अर्का सांसदले बताए ।

‘अब मतदान हुँदै छ । सबै सँगै बस्दा सजिलो हुन्छ भन्ने छलफल गरेर एकै ठाउँमा बसेको हो । अरु दलसँग पनि यही बसेर छलफल जारी छ,’ ती सांसदले भने ।

कांग्रेस र माओवादीले आफ्ना सांसदलाई पोखरा नछोड्न निर्देशन दिइसकेका छन् । जनमोर्चा सरकारमा नगए पनि अविश्वासकै पक्षमा छ । संयुक्त बैठकमा समेत जनमोर्चा सहभागी छैन ।

हालसम्मको अवस्था हेर्दा मुख्यमन्त्री पृथ्वीसुब्बा गुरुङको सरकार ढल्ने देखिन्छ । ६० सदस्यीय प्रदेशसभामा मुख्यमन्त्रीको पक्षमा एमालेका २७ र एक स्वतन्त्र सांसद छन् । कांग्रेसका १५, माओवादीका १२ (सभामुखसहित), जनमोर्चाका ३ र जसपाका २ सांसद अविश्वास प्रस्तावकै पक्षमा छन् ।

यी पार्टीका सांसद संख्या ३१ पुग्ने देखिन्छ । सभामुखले भने मत दिन पाउँदैनन् । अविश्वास प्रस्ताव पारित भए कांग्रेस संसदीय दलका नेता कृष्णचन्द्र नेपाली पोखरेल मुख्यमन्त्री बन्नेछन् ।

प्रकाशित मिति: मंगलबार, वैशाख १४, २०७८ ११:२७