परीक्षण नै नगरेका बिरामी अक्सिजन र भेन्टिलेटर चाहियो भन्दै आउँदा चिकित्सक नै अलमलमा

परीक्षण नै नगरेका बिरामी अक्सिजन र भेन्टिलेटर चाहियो भन्दै आउँदा चिकित्सक नै अलमलमा

A+ A A-

चितवनका अस्पतालमा कोरोना भाइरसका सिकिस्त बिरामी बढ्न थालेका छन् । पछिल्लो समयमा कोरोना संक्रमणको संख्यामा वृद्धि हुँदै जादा अस्पतालमा सिकिस्त बिरामी पनि बढेका हुन् ।

भरतपुर अस्पतालमा हाल ४५ जना कोरोना संक्रमित बिरामी भर्ना भएका छन् । भरतपुर अस्पतालका फिजिसिएन डा. प्रमोद पौडेलका अनुसार अक्सिजन चाहिने, ज्वरो आएका, सास फेर्न गाह्रो भएका बिरामी भर्ना हुने गरेका छन् । ४५ जना बिरामीमध्ये १० जना आईसीयुमा, २५ जना एचडीयू, एक जना भेन्टिलेटरमा रहेका छन् भने २ जना 'हाइ फ्लो नेजल क्यानुला’ वार्डमा भर्ना भएका छन् ।

‘कोभिडका संक्रमण पछिल्लो समय बढ्दै गएको छ । सिकिस्त बिरामी धेरै नै देखिएका छन्’ डा. पौडेलले भने ‘सिकिस्त नभएसम्म होम आइसोलेसन बसे पनि सास फेर्न गाह्रो हुँदा, अक्सिजन नै चाहिले बिरामी मात्रै भर्ना भएका छन् ।’ भरतपुर अस्पतालले कोरोनाको लागि एक सय १० शैया छुट्याएको छ ।

जटिल प्रकृतिको लक्षण देखापरेपछि मात्र बिरामी आउने भएकाले आइसीयू र एचडीयू खाली नरहेको डा. पौडेल बताउँछन् । ‘धेरैजसो बिरामी आईसीयु र एचडीयूमा राख्न पर्ने भएकाले भरिएको छ’ उनले भने ।

कोरोना बिरामीको उपचार व्यवस्थापनका लागि बेडहरू थप्ने, अक्सिजन प्लान्ट मर्मत तथा भेन्टिलेटर थप्नेजस्ता काम अगाडि बढाएको डा. पौडेलले जनाए ।

चितवन मेडिकल कलेजका निर्देशक डा. दयाराम लम्सालले अस्पतालमा १८ जना कोरोना संक्रमित भर्ना भएको र अधिकांश बिरामीको अवस्था सिकिस्त रहेको बताउँछन् । कोरोनासम्बन्धी परीक्षण समयमै नगर्दा उपचारमा समस्या हुने गरेको डा. लम्साल बताउँछन् ।

‘अन्तिम अवस्थामा अक्सिजन र भेन्टिलेटर चाहियो भन्दै आउनुहुन्छ । पोजिटिभ होकी नेगेटिभ थाहा पाउन १२ देखि २४ घण्टा लाग्छ । बिरामीलाई कुन वार्डमा राखेर उपचार गर्ने भन्ने नै अलमल हुन्छ,’ उनले भने, ‘लक्षण देखिनेबित्तिकै पीसीआर गरेमा अरुलाई सर्न कम र उपचारमा पनि सहज हुन्थ्यो ।’

अहिले चितवन मेडिकल कलेजमा दैनिक १५० देखि २०० जनाको पीसीआर परीक्षण हुने गरेको छ । चितवन मेडिकल कलेजले कोरोना संक्रमितको उपचारको लागि ५२ शय्या छुट्याएको छ ।

जिल्ला स्वास्थ्य कार्यालय चितवनका अनुसार हालसम्म चितवनमा कोरोनाका संक्रिय संक्रमित ३९२ रहेका छन् । पछिल्लो २४ घण्टामा चितवनमा ७८ जना कोरोना संक्रमित थपिएका छन् । चितवनमा हालसम्म कोरोनाबाट ११६ जनाले ज्यान गुमाएको स्वास्थ्य कार्यालय चितवनले जनाएको छ ।

प्रकाशित मिति: सोमबार, वैशाख १३, २०७८ २०:३७