नेपालगञ्जका चिकित्सकहरूको गुहार : ‘हामी लडाइँमा छौँ, बेड, अक्सिजन र जनशक्ति दिनुहोस्’

नेपालगञ्जका चिकित्सकहरूको गुहार : ‘हामी लडाइँमा छौँ, बेड, अक्सिजन र जनशक्ति दिनुहोस्’

A+ A A-

आईसीयू र भेन्टिलेटर भरिएको छ । बेड खाली छैन । कोही भुइँमै लम्पसार परेका छन् । को संक्रमित हो, को होइन, डाक्टर नर्सलाई छुट्याउनै मुस्किल छ ।

बाँकेको नेपालगञ्ज उष्ण गर्मीले जसरी तातेको छ, त्योभन्दा ज्यादा कोरोनाले भेरी अञ्चल अस्पताललाई पोलेको छ । अस्पतालमा आएका अधिकांश बिरामी सिकिस्त छन् । बालबालिका, युवा, जेष्ठ नागरिकले अस्पताल भरिएको छ ।

अस्पतालका प्रमुख डा. प्रकाश थापा बिरामीको कसरी व्यवस्थापन गर्ने भन्नेमा चिन्तित छन् । छिमेकी देश भारतमा कोरोनाको ग्राफ उकालो लाग्दै गर्दा उनलाई लागेको थियो, ‘नेपालमा पनि यस्तै दिन आउँछ ।’

‘तीनदेखि सबै बेड भरिएको छ । जटिल प्रकृतिका बिरामी छन् । संक्रमणको दर बढेको छ । एकैदिन ५ सयको हाराहारीमा संक्रमित थपिन्छन्’, उनी भन्छन्, ‘अरु अस्पतालले पनि यहीँ रिफर गरेका छन् । बेड मिलाउन गाह्रो भएको छ ।’

अस्पतालमा रहेको खाली ठाउँमा समेत संक्रमित राख्न थिलिएको उनी बताउँछन् । ‘१ सय ४२ वटा बेड छुट्याएको थियो । अहिले खाली ठाउँमा बिरामी राख्न थालेका छौँ’, उनी भन्छन्, ‘तानतुन पारेर ३ सय जनासम्म भर्ना गरेका छौँ ।’ अस्पतालको क्षमताभन्दा बाहिर गइसक्यो । अक्सिजन बेडमा राखेर दिनुपर्छ ।’

एकातिर बिरामीको कोलाहल छ । अर्कोतिर उपचारमा खटिनुपर्ने स्वास्थ्यकर्मी नै संक्रमित भएर थलिएका छन् । अब कसरी उपचार गर्ने ?

‘६० जना कर्मचारी संक्रमित भएका छन् । त्यसै त जनशक्ति कम छ’, उनी भन्छन्, ‘बाँकी जनशक्तिले प्रेसरमा दौडधुप गरेर काम गरिरहेका छौँ ।’

कहाँबाट फैलियो त ?

‘केसहरू समुदायबाट आएका छन् । श्वाप्रश्वास, खोकी, घाँटीमा समस्या धेरै देखिएको छ’, उनी भन्छन्, ‘पोहोरको भन्दा संक्रमण दर बढी छ । लक्षण पनि धेरैलाई देखिएको छ । यो नयाँ भेरियन्ट हुनुपर्छ ।’

कोभिड मात्र होइन, ननकोभिडका बिरामी पनि हेर्नुपरेको उनको गुनासो छ । ‘कोभिडको क्राउड छ । ननकोभिडको पनि सेवा दिएका छौँ’, उनी भन्छन्, ‘हामीसँग अब लड्नुको विकल्प छैन ।’

स्थिति जटिल भएकाले सरकारी, प्राइभेट सबै अस्पतालको बेड प्रयोग गर्नुपर्ने उनी बताउँछन् ।

‘अक्सिजनको व्यवस्था हुनुपर्‍यो । अर्को अस्पतालले बिरामी रिफर गर्नु भएन । सबै अस्पतालले कोभिडका बिरामी राख्नुपर्‍यो’, उनी भन्छन्, ‘कतै खाली, कतै राख्ने ठाउँ छैन । हाम्रोमा लोड धेरै भयो । जुन अस्पतालमा बिरामी गएको हो, त्यहीँ राखेर उपचार गर्नुपर्छ ।’

परीक्षण, कन्ट्याक्ट ट्रेसिङ र नाकामा कडाइ नभएको स्थानीयको गुनासो छ । नाकामा कडाइ नहुँदा भारतबाट आएकाबाट संक्रमण झन् फैलिने जोखिम नेपालगञ्जमा बढेको छ । संक्रमण बढेसँगै प्रशासनले निषेधाज्ञा जारी गरेको छ ।

‘नियन्त्रणका लागि हामी लागिरहेका छौँ’, प्रमुख जिल्ला अधिकारी शिवराम गेलालले भने, ‘अहिले पनि हामी छलफलमै छौँ ।’

स्थिति भयावह छ, अस्पताल विस्तार गर्छौं : सरकार

अनुगमनका लागि नेपालगञ्ज पुगेको सरकारी टोलीले स्थिति भयावह रहेको प्रारम्भिक निष्कर्ष निकालेको छ ।

‘स्थिति एकदमै भयावह छ । अहिले प्रारम्भिक चरण हो । बाँके मात्र होइन, अब देशभर नै फैलिन्छ,’ अनुगमनका लागि नेपालगञ्ज पुगेका स्वास्थ्य मन्त्रालयका कोभिड फोकल पर्सन डा. महेन्द्र श्रेष्ठले शिलापत्रसँग भने, ‘यहाँ अस्पतालहरू भरिएका छन् । अस्पताल विस्तार गर्न सबै निकायसँग छलफल गर्दै छौँ ।’

द्रुत गतिमा संक्रमण फैलिएको उनको निष्कर्ष छ । ‘अरु रोग नभएका युवकको मृत्यु भइरहेको छ । छिटोछिटो संक्रमण सरेको छ,’ श्रेष्ठले भने, ‘युवा र बालबालिका बढी टार्गेटमा परेका छन् ।’

कोरोनाको हब बनेको बाँकेमा हालसम्म ७ हजार ७ सय ३ जना संक्रमित भएका छन् । जसमध्ये पुरुष ४ हजार ७ सय ९३ र महिला २ हजार ९ सय १० जना संक्रमित भएका छन् ।