संक्रमितले अस्पताल भरिएपछि नेपालगञ्जले माग्यो मेडिकल सहायता, कहिले पुग्ला टुंगो छैन

संक्रमितले अस्पताल भरिएपछि नेपालगञ्जले माग्यो मेडिकल सहायता, कहिले पुग्ला टुंगो छैन

A+ A A-

नयाँ वर्षसँगै बाँकेको नेपालगञ्जमा कोरोना महामारी यसरी फैलियो कि सबैभन्दा ठूलो सरकारी भेरी अस्पताल एक सातादेखि भरिभराउ छ ।

१ सय ३५ बेड क्षमताको अस्पतालले सिकिस्तबाहेक अरु बिरामी भर्ना लिन छाडेकै धेरै भइसक्यो । तर, अक्सिजन चाहिने अवस्थाका सिकिस्त बिरामी आउने क्रम उस्तै रह्यो । ‘अस्पतालका वार्डहरूमा बेड थप्दै गयौं । बरण्डा र हल पनि बाँकी रहेन । अहिले २ सय बेड छन्,’ भेरी अस्पताल प्रमुख डा. प्रकाश थापा भन्छन्, ‘बेडसँगै बिरामी थपिँदै गए । अहिले २ सय १ बिरामी अस्पतालमा भर्ना छन् ।’

अस्पतालमा अब बेड थप्ने ठाउँसमेत नरहेको उनी बताउँछन् । नेपालगञ्जमा बढ्दो गर्मीमा अस्पतालभित्र बिरामीको भीडभाड छ । दिनहुँ चार सयको हाराहारीमा नयाँ संक्रमित थपिइरहँदा स्थिति भयावह भइसकेको डा. थापा बताउँछन् । दैनिक झण्डै ३ सय सिलिण्डर अक्सिजनको खपत भइरहेको छ ।

‘७० सिकिस्त बिरामीलाई अक्सिजन, आईसीयू र भेन्टिलेटरमा राखेर उपचार गरिरहेका छौँ.’ उनले भने । भेरी अस्पतालका ४० स्वास्थ्यकर्मी एकसाथ संक्रमित भएपछि उपचार प्रभावित भएको छ । तत्काल जनशक्तिसहित स्वास्थ्य टोलीको माग गरेको छ ।

‘कम्तीमा ३० डाक्टर र एक सय नर्सिङ स्टाफको खाँचो छ,’ डा थापाले भने, ‘तत्काल अस्थायी दरबन्दीमा स्वास्थ्यकर्मी लिन स्थानीय, प्रदेश र केन्द्र सरकारसँग माग गरेका छौँ ।’ जिल्ला कोभिड संकट व्यवस्थापन केन्द्र (डीसीसीएमसी)को बैठकले तत्काल मेडिकल टिम पठाउन स्वास्थ्य मन्त्रालयसँग आग्रह गरेको छ ।

कोभिड-१९ को संकट ब्यवस्थापनका लागि आर्थिक स्रोत अभाव उत्पन्न भएको भन्दै प्रदेश सरकारसँग ५ करोड र संघीय सरकारसँग १० करोड रकमसमेत माग गरेको छ । आइसोलेसन सेन्टर, अस्पतालहरूमा बेड र उपकरण वृद्धि, आईसीयू, भेन्टिलेटर, उपचारमा आवश्यक जनशक्ति थप गर्न र रोकथाम सामग्री व्यवस्थापनका लागि स्रोत माग गरिएको प्रमुख जिल्ला अधिकारी शिवराम गेलालले बताएका छन् ।

डीसीसीएमसीले भेरी अस्पताल र नेपालगञ्ज मेडिकल कलेजलाई कोभिड उपचारका लागि २/२ सय बेड व्यवस्था गर्न निर्देशन समेत दिएका थियो । भेरी अस्पतालमा बेड क्षमता वृद्धि भई बिरामीले भरिइसकेको छ भने शिक्षण अस्पतालमा एक सय बेडमा सेवा सुरु भइसकेको छ ।

गत वर्ष मेडिकल कलेजमा एक सय बेडको कोभिड वार्ड सञ्चालन गरिएको थियो । पहिलो चरणको कोभिड-१९ नियन्त्रणउन्मुख भएपछि सरकारले निजी अस्पतालमा उपचार गर्न रोक्यो । स्वास्थ्य मन्त्रालयको निर्देशनपछि बन्द भएको वार्ड पुनः सञ्चालन गर्न लागिएको प्रबन्ध निर्देशक डा. सुरेशकुमार कनौडिया बताउँछन् ।

एक सातादेखि ३० आईसीयू बेडसहित सेवा सुरु गरेको शिक्षण अस्पताललाई कोभिड उपचारका लागि २ सय बेड सञ्चालनमा ल्याउन मन्त्रालयले आग्रह गरेको छ । बेड क्षमता बढाउन अक्सिजन पाइप विस्तार भइरहेको उनले बताए ।

‘भेरी अस्पतालले थेग्न नसकेपछि हामीले भर्ना लिएर उपचार गर्न थालेका छौँ । आवश्यकता अनुसार बेड क्षमता बढाउँदै लैजान्छौँ,’ डा. कनौडियाले शिलापत्रसँग भने, ‘म सर्वसाधारणलाई सचेत हुन र सावधानी अपनाउन तर, उपचारै नपाएर मरिएला भनेर नआत्तिन आग्रह गर्दछु ।’

नेपालगञ्ज उपमहानगरपालिकाले ५० बेडको अक्सिजनसहितको आइसोलेसन वार्ड बनाउने निर्णय गरेको छ । भारतबाट फर्किनेहरूका लागि जमुनाह नाकामा होल्डिङ सेन्टर राखिएको छ । लक्षण नदेखिएकालाई युनिसेफले सिधै जिल्ला पठाउने व्यवस्था गरेको छ ।

मेयर धवलशम्सेर राणा भन्छन्, ‘तीन वटै तहका सरकारबीच समन्वय गर्ने कोशिश गरिरहेका छौँ । तर, आर्थिक अभावले व्यवस्थापनमा संकट उत्पन्न भएको छ ।’ आफूले मुख्यमन्त्री शंकर पोखरेल र केन्द्रीय सरकारसँग तत्काल सहायता गर्न आग्रह गरिएको उनले बताए ।

लुम्बिनी प्रदेशका मुख्यमन्त्री पोखरेलले बाँकेलगायत लुम्बिनी प्रदेशमा बढ्दो कोभिड-१९ को नियन्त्रण र उपचारका लागि केन्द्रको थप सहयोगका लागि प्रधानमन्त्री केपी ओली र स्वास्थमन्त्री हृदयश त्रिपाठीसँग छलफल गरेको जनाएका छन् । ‘प्रधानमन्त्री र स्वास्थ्यकमन्त्रीसँग थप सहयोगका लागि आग्रह गरेका छौँ । उहाँहरूले सहयोग उपलब्ध गराउने बचन दिनु भएको छ,’ मुख्यमन्त्री पोखरेलले भने ।

स्वास्थ्य मन्त्रालयले स्वास्थ्य विभागका पूर्वमहानिर्देशक महेन्द्र श्रेष्ठ नेतृत्वमा एउटा टोली आइतबार नेपालगञ्ज पठाएको छ । तर, उपचारमा खटिने गरी स्वास्थ्य जनशक्ति र व्यवस्थापन सहायता भने कहिले नेपालगञ्ज पुग्ने हो कुनै टुंगो छैन ।

प्रकाशित मिति: आइतबार, वैशाख १२, २०७८ २०:४५