नेपालमा बनेको यात्री मोटरसाइकल किन यति महँगो ?

A+ A A-

शनिबार साँझ बाइकमाडौं नामक फेसबुक पेजले यात्री मोटरसाइकलको फोटो पोस्ट गर्दै लेख्यो, ‘यात्री आउने पैसामा त दुईवटा सहयात्री भित्र्याउन सकिने रै'छ ।’

त्यस्तै, फेसबुक प्रयोगकर्ता प्रजिता शाहीले एउटा ग्रुपमा पोस्ट गरिन्, ‘यात्री बनेर शानमा यात्री बाइक किन्न गको, लास्ट सस्तो लाग्यो । अनि यति सस्तो के किन्नु भनेर फर्कंदा भाइलाई आइफोन १२ प्रो म्याक्स, आमालाई २ तोला सिक्री, बुबालाई २ जोर जुत्ता, एक तोला सुनको औँठी अनि घर के बसमा फर्किनु भनेर कार किनेर आएँ । अझ ३ लाख उब्रेछ, उब्रेको त्याे पैसाले चन्द्रागिरिको शेयर किन्ने सोचमा छु । कोही बेच्ने हुनुहुन्छ भने भन्नुस हैँ ।’

अहिले नेपाली इन्जिनियरहरूले नेपालमै बनाएको इलेक्ट्रिक मोटरसाइकल मूल्यकै कारण ट्रोलको सिकार भएको छ । २०७६ साल पुसमा पहिलो पटक सार्वजनिक हुँदा वाहवाही कमाएको यो बाइकको मूल्य त्यो बेलामा सार्वजनिक गरिएको थिएन ।

दुईवटा मोडलमा उपलब्ध यो बाइकको मूल्य ‘पी १’ को ४ लाख ९५ हजार र ‘पी०’को १९ लाख ४९ हजार निर्धारण गरिएको छ ।

हाल विवादमा परेको ‘पी०’ क्षमता र फिचर्सका कारणले महँगो भएको यात्री मोटरसाइकल प्रालिका सीईओ वत्सल पाण्डेले जानकारी दिए ।

‘पहिलो कुरो त यो क्लासिक मोडल हो । हामीले नेपाली इन्जनियरको क्षमता देखाउन र प्रिमियम इलेक्ट्रिक बाइक रुचाउनेका लागि यो मोटरसाइकल बनाएका हौँ । यो बाइक कर्मसियल रूपमा बेच्ने होइन, त्यसैले ५० वटा मात्र बनाउँछौँ,’ उनले भने ।

सस्तो मोटरसाइकल किन्नेका लागि ‘पी१’ सार्वजनिक गरिसकेको र अबको ६ महिनामा अझै सस्तो बाइक सार्वजनिक गर्ने लक्ष्य रहेको उनले बताए । ‘अरुले पहिले सस्तो प्रोडक्ट निकालेर महँगो निकाल्दै जान्छन् । हामीले महँगो निकाल्यौँ । अब सस्तो निकाल्दै जान्छौँ,’ पाण्डेले शिलापत्रसँग भने ।

यसमा ८ किलोवाट क्षमताको ब्याट्री प्रयोग गएिको छ, जसले फुलचार्ज गर्दा २ सय ३० किलोमिटर माइलेज दिन्छ । यो मोटरसाइकललाई सिङ्गल चार्जमा काठमाडौंदेखि पोखरासम्म पुग्न सकियोस् भन्ने सोचअनुरुप डिजाइन गरिएको उनले बताए ।

‘पी०’ ले ४८ किलोवाटको पावर दिन्छ भने २ दशमलव ५ सेकेन्डभन्दा कम समयमा ६० किलोमिटर प्रतिघण्टाको रफ्तारमा पुग्न सक्ने पाण्डेको दाबी छ । १ सय ४० किलोमिटर प्रतिघण्टाको रफ्तारमा गुड्न सक्ने यो मोटरसाइकलले ६ सय ५० एनएम दिन्छ । यसलाई चार्ज गर्न २ घण्टाभन्दा कम समय लाग्ने कम्पनीले जनाएको छ ।

त्यस्तै, यसमा ७ इन्चको टच स्क्रिन छ । जसमा फोरजी सिमकार्ड इन्बिल्ट छ जसमा ठेगाना राखेर जीपीएस नेभिगेसन फलो गरेर ठाउँ पत्ता लगाउन सकिन्छ भने अन्य धेरै फिचर्सहरू छन् । । कम्पनीले ‘पी०’ जम्मा ५० वटा मात्रै उत्पादन गर्ने भए पनि ‘पी१’ भने २०२१ भित्र १ हजार युनिट बेच्ने लक्ष्य रहेको उनले जानकारी दिए ।