स्टार्टअपको विकासका लागि सरकारले विशेष योजना बनाउनुपर्छ : गोल्छा

A+ A A-

नेपाल उद्योग वाणिज्य महासंघका अध्यक्ष शेखर गोल्छाले स्टार्टअपको विकासका लागि सरकारले विशेष र पृथक् योजना बनाउन आवश्यक रहेको बताएका छन् ।

पूर्वबजेट छलफल कार्यक्रममा महासंघले ५० लगानीकर्ता ५० उद्यमी कार्यक्रम सुरु गरेको जानकारी दिए । तर, स्टार्टअपको विकासका लागि सरकारले पनि विशेष र पृथक् योजना बनाउन आवश्यक हुने उनको तर्क थियो ।

मुलुक कोरोना महामारीबाट गुज्रिरहेकाले यो वर्षे बजेटमा महामारी नियन्त्रण एवं स्वास्थ्य सेवा विस्तार, प्रभावकारी राहत र पुनरुत्थान कार्यक्रम, कृषि इकोसिस्टमको पुनर्संरचना, सार्वजनिक सेवामा प्रविधि र सुशासन, पूर्वाधार विकास र निजीक्षेत्र प्रोत्साहन विशेष कार्यक्रम समेटिनुपर्ने उनले बताए ।

‘अहिलेको प्रमुख दायित्व फेरि पनि संक्रमणलाई फैलिन नदिनु नै हो । पहिचान, परीक्षण र उपचार गर्न गतवर्षको भन्दा बढी बजेट आवश्यक छ । स्थानीय तहमा शिलान्यास भएका अस्पताल र अन्य संरचनाको पनि शीघ्र सञ्चालन आवश्यक छ । स्थानीय तहले न्यूनतम सुविधासहितको अस्थायी आइसोलेसन, क्वारेन्टाइन र अस्थायी अस्पताल निर्माण गर्नुपर्नेछ । अक्सिजनको पर्याप्त आपूर्तिको सुनिश्चितता गरिनुपर्छ,’ गोल्छाले भने ।

काम नभएर गाउँतिर हिँडेका व्यक्तिहरूको व्यवस्थापन गर्न नगद अनुदानको सट्टा प्रधानमन्त्री रोजगार कार्यक्रमजस्ता योजनासँग जोडेर कामसँगै राहत उपलब्ध गराउनु उपयुक्त हुने गोल्छाले बताए ।

त्यस्तै, कोरोनाबाट प्रभावित लघु, घरेलु तथा साना उद्योग, पर्यटन, मनोरञ्जनलगायतका व्यवसायमा सरकारद्वारा गतवर्ष घोषणा भएका बैंकिङ सहुलियत कम्तीमा दुई वर्ष थप्नुपर्ने उनको सुझाव छ ।

‘अब कृषि इकोसिस्टमकै पुनर्संरचना आवश्यक छ । नाफामूलक कृषिमा नगई हुँदैन । ई–हाटबजारजस्ता नयाँ योजनाले सुधार ल्याउँछ । उद्योग र कृषिमा रहेको भूमिसम्बन्धी हदबन्दी हटाइनुपर्छ,’ उनले भने ।

कोरोनाको दोस्रो लहर आए पनि रोजगारी अभिवृद्धि गर्न सक्ने र आर्थिक महत्त्व बोकेका आयोजनाको निर्माण अवरुद्ध हुन दिन नहुने उनले बताए ।

गोल्छाले भने, ‘राष्ट्रिय गौरवका आयोजनाको पुनर्संरचना गरी काम अघि बढाउनुपर्छ । औद्योगिक पूर्वाधारतर्फ विशेष आर्थिक क्षेत्र, औद्योगिक क्षेत्र, निर्यात प्रशोधन जोन, आईटी पार्कसमेतको प्रवर्द्धन गर्ने गरी शक्तिसम्पन्न स्वतन्त्र नियमन एवं प्रवर्द्धन निकाय स्थापना गर्नुपर्नेछ । पूर्व–पश्चिम रेलमार्ग प्राथमिकतामा रहनुपर्छ,’ उनले भने ।

प्रकाशित मिति: बिहीबार, वैशाख १६, २०७८ १२:११