काठमाडौंमा खेल मैदानसहितको हरित उद्यान निर्माण गर्दै एनसेल

A+ A A-

एनसेल आजियाटा लिमिटेडले लैनचौर मैदानको निर्माण तथा संरक्षणको जिम्मा लिएको छ । कम्पनीले आफ्नो व्यावसायिक सामाजिक जिम्मेवारीअन्तर्गत लैनचौर मैदानको निर्माण तथा संरक्षण गर्न लागेको हो ।

लैनचौर मैदानमा उद्यानमा मिनी फुटबल मैदान, बास्केटबल कोर्ट, खुला जिम खाना र बालबालिकाकालागि खेल्ने स्थानलगायतका विशेषताहरू रहनेछन् । यो उद्यान ५४ हजार ९ सय २१ वर्ग फिट क्षेत्रफलमा बन्नेछ ।

यसका लागि एनसेल र काठमाडौं महानगरपालिका– २६ ले समझदारीपत्रमा हस्ताक्षर गरिसकेको छ ।

समझदारीअनुसार, एनसेलले काठमाडौं महानगरपालिकाले तयार तथा स्वीकृत गरेको डिजाइनअनुसार लैनचौर हरित उद्यान निर्माणको कार्य गरिरेहकोे छ ।

ग्राउण्ड क्लियरेन्सको कार्य सम्पन्न गरी हाल उद्यान निर्माणका लागि मैदान उत्खननको कार्य भइरहेको कम्पनीले जनाएको छ । परम्परागत ढुङ्गेधारा, उद्यानमा आउने मानिसहरूका लागि पार्किङ, शौचालय सुविधा र सोलार बत्तीको व्यवस्था यस उद्यानका केही थप विषेशताहरू हुन् ।

सामाजिक आर्थिक विकासमा योगदान पुर्‍याउँदै तथा वातावरण क्षेत्रलाई प्राथमिकतामा राख्दै कम्पनीले आफ्नो व्यावसायिक सामाजिक जिम्मेवारीअन्तर्गत विभिन्न कार्यक्रम गर्दै आएको एनसेलका प्रमुख कार्यकारी अधिकृत एन्डी चोङले बताए ।

‘यो पहलले समुदायमा स्वस्थ वातावरण निर्माण गर्दै वातावरण र पर्यावरणसम्बन्धी लक्ष्य प्राप्तिमा योगदान पुर्‍याउनेछ । सरकारसँग सहकार्य गर्दै काठमाडौंको मुटुमा उदाहरणीय हरित उद्यान निर्माणका लागि योगदान पुर्‍याउन पाएकोमा हामी खुसी छौँ,’ उनले भने ।

सहकार्यका लागि आफूहरू एनसेलप्रति आभारी रहेको काठमाडौं महानगरपालिका– २६ का वडा अध्यक्ष ख्याम तिवारीले बताए ।

एनसेलले विभिन्न सामाजिक पहलअन्तर्गत आफ्नो स्थापनाकालदेखि स्वास्थ्य, शिक्षा, वातावरण, प्रकोप रोकथाम तथा प्रतिकार्य र जीविकोपार्जनमा सहयोगलगायतका विभिन्न क्षेत्रमा १ अर्ब २७ करोडभन्दा बढीको योगदान गरिसकेको छ ।

प्रकाशित मिति: शुक्रबार, वैशाख १०, २०७८ १८:३०