विद्यालय कतै बन्द कतै खुल्लै, भक्तपुरमा अटेरी, अन्योलमा अभिभावक

A+ A A-

‘कक्षा अनलाइन हुन्छ कि फिजिकल नै ?’

भक्तपुरका विद्यार्थीले सोमबार राति अबेरसम्म विद्यालयका शिक्षक र प्रिन्सिपललाई फोन म्यासेज गरिरहे । सरकारले कोरोना प्रभावित शहरमा भौतिक रूपमा उपस्थित नभई अनलाइन वा वैकल्पिक माध्यमबाट शिक्षण सिकाइ गर्ने सरकारको निर्णय आएपछि विद्यार्थी र अभिभावकले शिक्षक र प्रिन्सिपललाई पठनपाठनबारे चासो राखेका थिए । तर, विद्यालयबाट प्रस्ट जवाफ आएन ।

‘भक्तपुर नगरपालिकाले निर्णय गरेपछि के गर्ने जानकारी गराउँछौँ’, शिक्षक र प्रिन्सिपलले जवाफ दिए । मंगलबार बिहानसम्म पनि नगरपालिकाको निर्णय आएन । विद्यालयहरूबाट बिहान खबर आयो, ‘भौतिकरुपमा नै कक्षा सञ्चालन हुन्छ ।’ अनि हतारिँदै बालबालिका विद्यालयतर्फ लागे । विद्यालयका गाडीहरू पनि बालबालिका लिन दौडिए ।

‘स्कुलले फिजिकल रूपमै पढाउने भनेको छ’, सनसाइन स्कुलका एक अभिभावकले भने, 'बालबालिकालाई पठाउने कि नपठाउने दोधारमा छौँ । भक्तपुरका प्राय: स्कुल-कलेज खुलेका छन् ।’

भक्तपुरको ख्वप कलेजले पनि भौतिक रूपमा नै कक्षा सञ्चालन गरेको छ । कक्षा ११ मा अध्ययनरत एक विद्यार्थीले शिलापत्रसँग भने, ‘अनलाइन कक्षा इफेक्टिभ हुँदैन । हप्ताको एक/दुई दिन अनलाइन गरौँला, अरु दिन फिजिकल नै सञ्चालन गर्ने भनेको छ ।’

ख्वप कलेजलाई कोरोना नलाग्ने हो भन्ने प्रश्नमा प्रिन्सिपल प्रकाश श्रेष्ठ भन्छन्, ‘स्थानीय तहबाट निर्णय आएको छैन । सावधानी अपनाएर सञ्चालन गरेका छौँ । कक्षा १२ को कक्षा १५ वैशाखसम्म चल्छ । त्यसपछि बिदा दिन्छौँ ।’

भक्तपुरका अधिकांश विद्यालय र कलेजले सरकारको निर्णयलाई अवज्ञा गरेका छन् । भक्तपुरले सरकारकाे निर्णय नमान्न पाउने हो भन्ने प्रश्नमा प्रिन्सिपल श्रेष्ठ भन्छन्, ‘वरिपरिका सबै विद्यालय चलेका हुन्छन् । स्थानीय तहको संयन्त्र छ । संयन्त्रबाट सूचना जारी हुन्छ । विद्यार्थी घरमा बसे पनि जोखिम छ । यहाँ पनि जोखिम छ, अब के गर्ने भनेर निर्णय गर्छौं ।’

नगरपालिकाका प्रतिनिधिले पनि प्रस्ट जवाफ दिएनन् । ‘नगरपालिकाले केही निर्णय गरेको छैन । हामी छलफल गर्दै छौँ’, उपप्रमुख रजनी जोशीले भनिन् ।

भक्तपुर नगरपालिकाले मात्र होइन, चाँगुनारायण नगरपालिकाका विद्यालयहरूले पनि भौतिक रूपमा नै कक्षा सञ्चालन गर्ने तयारी गरेका छन् । ‘आज सार्वजनिक बिदा छ । भोलिदेखि विद्यालयमै पढाउने भनेको छ’, एक अभिभावकले भने, ‘निर्णय के आउँछ भनेर कुरिरहेका छौँ ।’

‘विद्यालय तहको ९ गतेदेखि परीक्षा छ । हाम्रो नगरमा एउटा पनि कोभिडको केस भेटिएको छैन’, उपप्रमुख बिना बाँस्तोलाले भनिन्, ‘भौतिक रूपमा नै कक्षा सञ्चालन गर्ने सोच छ ।’

कारबाही हुन्छ : प्रशासन

सरकारको निर्णयविपरीत विद्यालय सञ्चालन गर्नेलाई प्रशासनले कारबाही गर्ने भएको छ । ‘सरकारले गरेको निर्णय कार्यान्वयन हुन्छ’, प्रमुख जिल्ला अधिकारी प्रेमप्रसाद भट्टराईले शिलापत्रसँग भने, ‘पुलिस पठाएर हेडमास्टरलाई तान्छौँ । कानुनअनुसार कारबाही हुन्छ ।’

भक्तपुरको कोरोना स्थिति के छ ?

सरकारले भक्तपुरलाई अति प्रभावित जिल्लामा राखेको छ । स्वास्थ्य तथा जनसंख्या मन्त्रालयको सोमबारको तथ्यांकअनुसार भक्तपुरमा ९ हजार ६ सय ५० जना संक्रमित भएका छन् । जसमध्ये ५ हजार ३ सय ८० पुरुष र ४ हजार २ सय ७० महिला संक्रमित भएका छन् ।

यो पनि पढ्नुस् :

१५ प्रतिशत बालबालिका संक्रमित

विद्यालयहरूमा पस्यो कोरोना, अभिभावकले बालबालिकालाई पठाउन छोडे

पाँच वर्षमुनिका ३ हजार ५ सय ६५ जना संक्रमित, १० जनाको मृत्यु

कोरोना नियन्त्रणकाे तयारी पुगेन, असारसम्म दैनिक ११ हजार संक्रमित पुग्ने प्रक्षेपण

प्रकाशित मिति: मंगलबार, वैशाख ७, २०७८ १३:२०