तेस्रो त्रैमासमा सिटिजन्स बैंकको उल्लेख्य प्रगति, नाफा १ अर्ब ५४ करोड पुग्यो

तेस्रो त्रैमासमा सिटिजन्स बैंकको उल्लेख्य प्रगति, नाफा १ अर्ब ५४ करोड पुग्यो

A+ A A-

सिटिजन्स बैंक इन्टरनेसनल लिमिटेडले चालु वर्षको तेस्रो त्रैमासमा एक अर्ब ५४ करोड बढी नाफा पुर्‍याएको छ । गत वर्ष चैत मसान्तसम्म १ अर्ब ९ करोड रुपैयाँ मात्रै नाफा गरेको बैंकले ४१.६१ प्रतिशत नाफा बढाएको हो ।

पहिलो त्रैमासमा ५१ करोड रुपैयाँ खुद नाफा गरेको बैंकले दोस्रो त्रैमासमा ३६ करोड रुपैयाँले बढाएर ८७ करोड पुर्‍याएको थियो । तर, तेस्रो त्रैमासमा मात्रै ६७ करोड रुपैयाँले बढाएर १ अर्ब ५४ करोड रुपैयाँ पुर्‍याएको छ ।

गत वर्षको तुलनामा बैंकले यो वर्ष ४५ करोड ४० लाख रुपैयाँ खुद नाफा बढाएको छ । खुद नाफामध्ये वितरणयोग्‍य नाफा १ अर्ब ३४ करोड रुपैयाँ रहेको छ । सञ्चालन नाफा १ अर्ब ९७ करोड रुपैयाँ गरेको छ ।

बैंकले यो अवधिमा २ अर्ब ५४ करोड रुपैयाँ खुद ब्याज आम्दानी गरेको छ । ब्याज आम्दानीमा ३० करोड रुपैयाँ बढाएको छ ।

बैंकले उल्लेख्य रूपमा कर्जा वृद्धि गरे पनि निष्क्रिय अर्थात् खराब कर्जा भने १.८१ प्रतिशतको सीमामा कायम राखेको छ । यो अवधिमा कर्जा ३८ प्रतिशतले बढाएर एक खर्ब ८ अर्ब रुपैयाँ पुर्‍याएको छ भने निक्षेप ४३ प्रतिशतले बढाएर १ खर्ब २७ अर्ब पुर्‍याएको छ ।

बैंकको प्रतिशेयर आम्दानी बढेर २०.७२ रुपैयाँ पुगेको छ । गत वर्ष यस्तो आम्दानी १६.८७ रुपैयाँ मात्रै थियो ।

बैंकले सीसीडी रेसियो (ऋण-पुँजी र निक्षेपको अनुपात) ७८.१३ प्रतिशत, आधारदर ७.४४ प्रतिशत र स्प्रेडदर ३.८६ प्रतिशत पुर्‍याएको छ । बैंकको चुक्तापुँजी ११ अर्ब ६६ करोड रुपैयाँ पुगेको छ ।

यो वर्ष बैंकले लुम्बिनी प्रदेश केन्द्रित तिनाउ मिसन डेभलपमेन्ट बैंकलाई प्राप्ति गरेको छ । प्रदेश नम्बर १ मा रहेको सिर्जना फाइनान्स लिमिटेडलाई पनि प्राप्ति गर्ने प्रक्रियामा छ ।