प्रदेश १ : एउटा पनि विधेयकमा छलफलै नगरी सकियो हिउँदे अधिवेशन

A+ A A-

प्रदेश १ को प्रदेशसभाको हिउँदे अधिवेशन अन्त्य भएको छ ।

प्रमुख प्रतिपक्षी दल नेपाली कांग्रेससहित माओवादी केन्द्र, जनता समाजवादी पार्टीलगायतको अवरोधकाबीच सभामुख प्रदीपकुमार भण्डारीले हिउँदे अधिवेशन अन्त्यको घोषणा गरेका हुन् ।

राष्ट्रिय गान सकिएलगत्तै सभामुख भण्डारी प्रदेशसभाको सातौं तथा हिउँदे अधिवेशनको आठौँ बैठक अघि बढाउन खोजेपछि प्रमुख प्रतिपक्षी कांग्रेससहितका विपक्षी दलहरूले उठेर विरोध जनाए । विपक्षी सांसदहरूले उठेर विरोध जनाएपछि सभामुख भण्डारीले पटक-पटक बस्न आग्रह गरेका थिए ।

विपक्षी दलहरूले विरोध जनाइरहेपछि सांसदहरूले उठाएका विषयमा आफ्नो ध्यानाकर्षण भएको र सबैको प्रतिनिधित्व गर्दै एक जना सांसदलाई समय लिएर बोल्न सभामुखले आग्रह गरेपनि बोल्न मानेनन् ।

कांग्रेसका प्रमुख सचेतक केदार कार्कीले चालु वर्षको बजेटमा स्वीकृत कार्यक्रमहरू सञ्चालन गर्न, योजनाका लागि आवश्यक स्रोत सुनिश्चितता गराउन, गौरवका आयोजनालाई निरन्तरता दिन, बजेटमा व्यवस्था भएअनुसार प्रदेश निर्वाचन क्षेत्र पूर्वाधार विकास कार्यक्रम कार्यान्वयनको सुनिश्चितता नभएसम्म सदनको कारबाही अगाडि नबढाउन माग गरे ।

त्यस्तै उनले अलपत्र रहेका बहुवर्षे विकास आयोजनाको निरन्तरताका दिन पनि माग गरे । त्यसपछि सभामुख भण्डारीले विपक्षी सांसदहरूले उठाएका विषयको जवाफसहित सम्बोधन गर्ने बताएपनि विपक्षी दलहरूले अवरोध कायमै राखेका थिए ।

विरोधपछि सभामुख भण्डारीले मुख्यमन्त्री शेरधन राईलाई सम्बोधनका लागि समय नदिई प्रदेश प्रमुखको कार्यालयबाट प्राप्त हिउँदे अधिवेशन अन्त्य भएको पत्र पढेर सुनाएका थिए ।

अधिवेशन अन्त्य भएको पत्र सभामुखले बाचन गरिरहँदा विपक्षी सांसदहरूले अवरोध जारी राखेका थिए । सरकारको सिफारिसमा प्रदेश प्रमुखले आइतबार राति १२ बजेदेखि लागू हुने गरी हिउँदे अधिवेशन अन्त्य गरेका छन् ।

प्रदेशसभाको हिउँदे अधिवेशन ७ माघमा सुरु भएको थियो । तर, सत्तारुढ दलभित्रको विवाद र विपक्षी दलहरूको अवरोधका कारण चालु हिउँदे अधिवेशन सहज ढंगले अघि बढ्न सकेन ।

हिउँदे अधिवेशनका आठ वटा बैठक बसेपनि आइतबारसहित चार वटा बैठक विपक्षी दलहरूले अवरुद्ध गरे । अन्य चार वटा बैठक सत्तारुढ दलकै किचलोका कारण सहजरुपमा सञ्चालन हुन सकेनन् ।

विधेयक अधिवेशनका रुपमा लिइएको हिउँदे अधिवेशनबाट एउटा पनि विधेयकमाथि छलफल हुन सकेन ।

प्रकाशित मिति: आइतबार, वैशाख ५, २०७८ १५:४०