अनि गुन्जियो ‘बाई–बाई क्यापिटालिज्म’

A+ A A-

प्रायः सुनसान रहने बल्खुस्थित तत्कालीन एमाले मुख्यालयमा हरेक वर्ष ३ जेठमा भने विशेष चहलपहल बढ्छ । चहलपहलको कारण हो, मदन–आश्रित स्मृति दिवस ।

१२ वैशाख २०७२ को विनाशकारी भूकम्पले भत्काएपछि तत्कालीन एमाले मुख्यालय (हाल नेकपा) धुम्बाराही सर्यो । एकतापछि मुख्यालय धुम्बाराहीमै छ ।

शुक्रबार पनि गत वर्षझैं बल्खुमा बिहानबाटै चहलपहल बढ्यो । नेकपाका नेता र कार्यकर्ता हत्तपत्त नपुग्ने बल्खुस्थित कार्यालयमा २६औं मदन–आश्रित स्मृति सभामा सहभागी हुन बिहानैदेखि नेता कार्यकर्ता पुगे ।

नेपाली कम्युनिस्ट आन्दोलनलाई नयाँ दिशा दिएका मदन भण्डारी र तत्कालीन संगठन विभाग प्रमुख जीवराज आश्रितको २०५० सालमा चितवनको दासढुंगामा रहस्यमय हत्या भएको थियो ।

बल्खुमा स्मृति सभासँगै जनवर्गीय संगठनको एकता घोषणा हुँदै थियो । यसका युवा र विद्यार्थीदेखि सबै जनवर्गीय संगठनका नेता कार्यकर्ता बल्खुमा जम्मा भएपछि सुरु भयो कार्यक्रम ।

नेपाली युवा विद्यार्थीबीच थिए, केही विदेशी विद्यार्थी । जसले राता टिसर्ट र टोपी लगाएका थिए । उनीहरु विभिन्न देशबाट मदन भण्डारी स्कुल अफ एसियामा माक्र्सवादको अध्ययन गर्न नेपाल आएका हुन् । अहिले माक्र्सवादको अध्ययन खरिपाटीमा जारी छ । त्यहीबाट उनीहरु बल्खुमा नेताहरुको भाषण सुन्न पुगेका थिए ।

नेकपाका कार्यकर्ता कार्यक्रम सकिएपछि बाहिरिए । तर, कार्यकर्ताहरु भने निराश देखिन्थे । यसको एक मात्र कारण थियो, एकतामा आफूले र आफू निकट नेताले नेतृत्व नपाउनु । केही युवा विद्यार्थी भने फोटो सेसनमा व्यस्त थिए ।

गत वर्षभन्दा अलि फरक दृश्य थियो, बल्खुमा । स्मृति सभामा देशभित्रका नेकपाका कार्यकर्ता मात्र होइनन्, केही विदेशी विद्यार्थी पनि थिए । ती विद्यार्थीले कार्यक्रम सकिएपछि नारा लगाए, ‘बाई बाई क्यापिटालिज्म, लङ लिभ सोसालिज्म ।’

उनीहरुले नारासँगै रामेश र रायनको चर्चित गीत ‘गाउँ गाउँबाट उठ, बस्ती बस्तीबाट उठ’ गाउन थाले । नारा र गीतसँगै उनीहरुले बल्खु परिसरको परिक्रमा पनि गरे ।

विचारको बहस

दुई दिन पहिला सभागृहबाट सुरु भएको विचारको बहस आज बल्खुमा पुनः उदायो । नेकपाका अध्यक्ष तथा पूर्वप्रधानमन्त्री पुष्पकमल दाहालले विचारलाई दोहर्याएर होइन, विकास गरेर अगाडि बढ्नुपर्ने बताए ।

१ जेठमा नेकपामा सचिवालय सदस्य ईश्वर पोखरेलले जनताको बहुदलीय जनवादलाई ब्युँताउनुपर्ने आशय व्यक्त गरेका थिए । तर, बल्खुमा प्रचण्डले भने, ‘मदन भण्डारीले जे गर्नुभयो, त्यही हामीले गर्ने होइन । अब नयाँ तरिकाले जानु नै माक्र्सवाद हो ।’

प्रचण्डले तत्कालीन एमालेका नेताप्रति लक्षित गर्दै थपे, ‘विचार सधैं स्थिर हुँदैन । मदनले भनेका कुराहरु दोहर्याउने होइन, त्यसमाथि विकास गर्ने हो । माक्र्सवादी भनेको ठोस स्थितिको ठोस विश्लेषण गर्नु हो । त्यसकारण, पुरानो कुरा दोहोर्याएर बस्ने होइन, नयाँ विकास गर्ने हो ।’

उनले मदन भण्डारी ‘आँधीजस्तै आए आँधी जसरी नै गएको’ टिप्पणीसमेत गरे । पार्टी एकता पुरानैको निरन्तरता दिन नभएर नयाँ बनाउन भएको र त्यसका लागि पार्टी नेतृत्व तयार रहेको उनको भनाइ थियो ।

दुई तिहाइ सपना

कार्यक्रममा उपस्थित प्रधानमन्त्री तथा एमाले अध्यक्ष केपी शर्मा ओली भने वैचारिक नभई सरकारका कामको बचाउमा केन्द्रित भए ।

उनले अर्को चुनावमा स्पष्ट दुई तिहाइ मत ल्याउने उद्घोष गरे । हरेक ठाउँबाट सरकारको आलोचना भइरहेको समयमा ओलीले त्यसको बचाउ गर्दै आगामी चुनावमा दुई तिहाइ ल्याउने बताए ।

उनले बालुवाटार जग्गाको खोजखबर आफूले गर्दा उल्टै आफ्नो पार्टी र नेतालाई नै लखेट्ने काम भएको बताए । सरकारको विरोध गर्ने केही ठाउँ नपाएपछि मेरो सरकार भन्यो भनेर विरोध भएको उनको भनाइ छ । उनले प्रतिपक्षले पनि केही काम नपाएर ‘स्याल हुइँया मच्चाएको’ आरोप लगाए ।

मदन पुत्री र आश्रित पत्नी मञ्च पछाडि

मञ्चमा नेकपाको नेतृत्व थियो । अध्यक्षद्वय ओली र दाहाल, वरिष्ठ नेताद्वय माधवकुमार नेपाल र झलनाथ खनाल, प्रवक्ता नारायणकाजी श्रेष्ठ, सचिवालय सदस्य ईश्वर पोखरेल र स्थायी समिति सदस्य सुभास नेम्वाङ मञ्चको अग्रभागमा थिए ।

तर, मदन भण्डारीको छोरी उषाकिरण र जीवराज आश्रित पत्नी माया ज्ञवालीलाई भने मञ्च पछाडिको घेरामा राखिएको थियो ।

दीपशिखा र ऐन महरको फोटो सेसन

हिजो मात्र जनवर्गीय संगठनको एकता टुंगो लगाएको छ नेकपाले । आज बल्खुमा नेकपाका भ्रातृ संगठनका धेरैजसो नेतृत्व उपस्थित थिएनन् ।

तर, नयाँ नेतृत्व चयन भएका युवा संघका रामप्रसाद सापकोटा ‘दीपशिखा’ र अखिलका नेतृत्व ऐन महरलाई भने बल्खुमा भ्याइनभ्याइ थियो । युवा र विद्यार्थीले बल्खुमा खादा लगाएर फोटो सेसन गरे ।

प्रकाशित मिति: शनिबार, जेठ ४, २०७६ ०२:०३