प्रतिपक्षीको विरोधपछि प्रदेश १ को प्रदेशसभा बैठक ५ वैशाखसम्मका लागि स्थगित

प्रतिपक्षीको विरोधपछि प्रदेश १ को प्रदेशसभा बैठक ५ वैशाखसम्मका लागि स्थगित

A+ A A-

प्रदेश १ को प्रदेशसभा बैठक आगामी ५ वैशाखसम्मका लागि स्थगित भएको छ । आजको बैठक पनि प्रमुख प्रतिपक्षी दल नेपाली कांग्रेससहितका विपक्षी दलले अवरुद्ध गरेपछि उपसभामुख सरस्वती पोखरेलले अर्को बैठक आगामी ५ वैशाख दिउँसो १ बजे बस्नेगरि स्थगित गरेकी हुन् ।

आजको बैठक दिउँसो १ बजदेखि बस्ने भनिएपछि दुई बजेदेखि मात्र सुरु भएको थियो । सहमति कायम गर्न भन्दै बैठक ढिलोगरि सुरु भएको थियो । तर, दलहरूबीच सहमति हुन नसकेपछि विपक्षी दलका सांसदले संसद् अवरुद्ध गरे । प्रदेशसभा बैठकमा राष्ट्रियगान सकिएलगत्तै प्रमुख प्रतिपक्षी दल नेपाली कांग्रेससहितका विपक्षी दलका सांसदले उठेर विरोध जनाएपछि बैठक अवरुद्ध भएको हो ।

सांसदले उठेर विरोध जनाएपछि उपसभामुख पोखरेलले विपक्षी दलहरूका तर्फबाट आफ्ना कुरा राख्न जनता समाजवादी पार्टी संसदीय दलका नेता जयराम यादवलाई बोल्न समय दिएकी थिइन् ।

उपसभामुख पोखरेलले बोल्ने समय दिएपछि जसपाका नेता यादवले रोष्टममा पुगेर आफूहरूका माग सम्बोधन नभएसम्म प्रदेशसभाको बैठक अवरुद्ध भइरहने चेतावनी दिए । ‘प्रदेश सरकार कत्तिको एक्टिभ रहेछ भन्ने हामी बारम्बारको प्रदेशसभा बैठकबाट हेरिरहेका छौँ । यत्तिको फुर्सदको समयमा पनि मुख्यमन्त्री सदनमा उपस्थित भइराख्नु भएको छैन,’ उनले भने, ‘प्रदेश सरकारलाई अझ सुगम बनाइदिएको कुरा सबैलाई अवगत नै छ । दुई/तीनवटा बैठक अवरुद्ध हुँदा पनि मुख्यमन्त्रीलाई सदनमा उपस्थित हुन गाह्रो परिरहेको छ ।’

नेता यादवले विपक्षी माओवादी केन्द्रले समेत सरकारलाई दिएको फिर्ता नलिएर प्रदेश सरकारलाई साथ दिएको भए पनि मुख्यमन्त्री राई प्रदेशसभाको बैठकमा उपस्थित भएर जवाफ दिन नक्निु प्रदेशवासीका लागि दुर्भाग्य भएको बताए । ‘विपक्षी माओवादी केन्द्रले समेत सरकारलाई साथ दिइरहँदा मुख्यमन्त्री उपस्थित हुन नसक्नु सम्पूर्ण प्रदेशवासीका लागि दुर्भाग्य हो । हामीले बारम्बार उठाएका मागलाई उहाँले यहाँ आएर सम्बोधन गर्नुहुन्छ भन्ने अपेक्षा थियो,’ उनले भने, ‘अहिले पार्टीको विवाद सकिएर फुर्ससदमा रहे पनि यो अपर्चुनिटीलाई प्रदेश सरकारले क्यास गर्न सक्नुपर्‍यो । तर, कहाँबाट यो सरकार सञ्चालित छ, योकुरा अहिलेसम्म बुझ्न गाह्रो परिरहेको छ ।’

उनले प्रदेश सरकारबाट संसद्‍मा उठेका कुराको ठोस जवाफ नआउन्जेलसम्म बैठक अगाडि बढ्न नसक्ने बताउँदै सबै विपक्षी दलका तर्फबाट आफूले कुरा राख्नुपरेको बताए । ‘बजेट र नीति तथा कार्यक्रमको सुनिश्चितता दिन नसक्ने सरकारले कसरी प्रदेश सरकार हाक्न सक्छ ? विनियोजित बजेट पनि समयमा कार्यान्वयन गर्न नसक्नु, सरकारलाई विपक्षीले त्यसबारे ध्यानाकर्षण गराए पनि त्यतिखेरै कुनै कमजोरी भए सच्याइहाल्नुपर्ने अवस्थामा प्रदेशसभामा आएर माफी माग्दै अगाडि बढ्नुपर्ने समयमा पनि कानमा तेल हालेर सुतिरहेको छ,’ उनले भने, ‘१ नं. भनेर गौरव गर्ने हामी १ नं. प्रदेश सरकार अभिषाप भएर त आउने होइन ? समृद्ध नेपाल सुखी नेपालीको नारा यो प्रदेश सरकारको क्रियाकलापले कसरी ढुक्क हुन सक्छौँ ? प्रदेश सरकार आफ्नो खुट्टामा नउभिरहेको हामीलाई भान भइरहेको छ । बजेट कार्यान्वयन गर्न नसक्नु यो भन्दा अपाङ्गता हामी कहाँ देख्न सक्छौँ ?’

उनले आर्थिक वर्ष समाप्त हुन पागे पनि बजेट कार्यान्वयन हुन नसक्नुमा प्रदेश सरकारले गैरजिम्मेवार बनेको आरोप लगाए । जसपा संसदीय दलका नेता यादवको सम्बोधन सकिए पनि विपक्षी सांसदले उठेर विरोध जनाइरहेपछि उपसभामुख पोखरेलले बस्न पटक–पटक आग्रह गरेकी थिइन् । तर, विपक्षी सांसदले उठेर विरोध जनाइरहेपछि आजको प्रदेशसभा बैठक स्थगित गर्दै अर्को बैठक आह्वान गरेकी हुन् ।

प्रकाशित मिति: सोमबार, चैत ३०, २०७७ १६:३५