मन्त्रीले संसदमा जवाफ दिन्छु् भनेपछि विपक्षी सांसदले भने, 'जवाफ हाेइन मन्त्रीज्यू, समाधान चाहियाे'

मन्त्रीले संसदमा जवाफ दिन्छु् भनेपछि विपक्षी सांसदले भने, 'जवाफ हाेइन मन्त्रीज्यू, समाधान चाहियाे'

A+ A A-

प्रदेश १ को प्रदेशसभा बैठक विपक्षी दलहरूको अवरोधका कारण सुरु हुन नसकेपछि सभामुख प्रदीपकुमार भण्डारीले सहजीकरणको प्रयास थालेका छन् । आफ्ना माग सम्बोधन नभएसम्म प्रदेशसभा बैठकलाई विपक्षी दलहरूले अवरुद्ध गर्ने रणनीति बनाएपछि सभामुख भण्डारीले प्रदेशसभा बैठक चलाउने गरी सहजीकरण प्रयास थोलका हुन् ।

विपक्षी दलहरूले अवरुद्ध गर्दै आएको प्रदेशसभा बैठक सञ्चालन गराउन आइतबार भण्डारीले सर्वदलीय बैठक आयोजना गरे । तर, सहमति भने हुन सकेन । बैठकमा मुख्यमन्त्री शेरधन राई अनुपस्थित भए ।

प्रदेशसभामा प्रमुख प्रतिपक्षी दल नेपाली कांग्रेस, नेकपा माओवादी केन्द्र, जनता समाजवादी पार्टी लगायतका दलहरूले चालु वर्षको बजेटमा स्वीकृत कार्यक्रमहरू सञ्चालन गर्न, योजनाहरूका लागिआवश्यक स्रोत सुनिश्चित गराउन र गौरवका आयोजनालाई निरन्तरता दिन माग गर्दै आएका छन् ।

उनीहरूले बजेटमा व्यवस्था भएअनुसार प्रदेश निर्वाचन क्षेत्र पूर्वाधार विकास कार्यक्रम कार्यान्वयनमा सरकार उदासीन भएको भन्दै कार्यान्वयनको माग गरेका छन् । त्यस्तै अलपत्र बहुवर्षे विकास आयोजनाहरूलाई निरन्तरता दिनुपर्नेमा पनि उनीहरूकाे जाेड छ ।

बजेट अभावको कारण देखाएर ती सबै आयोजना रोकिएको भन्दै त्यसको निरन्तरता दिनुपर्ने आफूहरूको माग रहे पनि सरकारले वेवास्ता गरेको माओवादी केन्द्र संसदीय दलका नेता इन्द्र आङ्बोले बताए । उनले आइतबारको सर्वदलीय बैठकमा विपक्षी दलहरूको मागबारे छलफल भए पनि मुख्यमन्त्री राई अनुपस्थित भएपछि समस्या समाधानको प्रसास सफल हुन नसकेको बताए । ‘हामीले राखेका मागहरूकै विषयमा छलफल गर्न सभामुखले बैठक बोलाउनुभएको हो’, उनले भने', आजको बैठकमा मुख्यमन्त्री आउनुभएन, जसले गर्दा समस्या समाधान गर्ने प्रयत्न सफल भएन ।’

सर्वदलीय बैठकमा विपक्षी दलका नेता आङ्बोले यसपटक सरकारको तर्फबाट संसदमा जवाफ नखोजेको बरु लिखित प्रतिवद्धता चाहेको बताए ।

सरकारका प्रवक्ता आन्तरिक मामिला तथा योजनामन्त्री हिक्मतकुमार कार्कीले सरकार विपक्षी दलहरूको सरोकारप्रति गम्भीर रहेको भन्दै सदनमा त्यसको जवाफ दिने बताएका थिए । तर, विपक्षी दलहरूले भने आफूहरूले जवाफभन्दा पनि समाधान खोजेको बताएका थिए ।

जनता समाजवादी पार्टी संसदीय दलका नेता जयराम यादवले सरकारलाई सघाउन आफूहरू तयार भए पनि सरकार नै जिम्मेवार ढंगले प्रस्तुत नभएको बताए । ‘हामी सरकारलाई समाधानका उपायमा समेत सहयोग गर्न तयार छौँ’, उनले भने, ‘तर मुख्यमन्त्री सर्वदलीय बैठकबाट समेत भाग्नु भएकोजस्तो देखियो ।’

प्रदेशसभाको दुई बैठक निरन्तर विपक्षी दलहरूले अवरुद्ध गरेका छन् । सरकारले आफ्ना माग सम्बोधन नगरे आउँदो बैठक पनि अवरुद्ध गर्ने उनीहरूले बताएका छन् । प्रदेशसभाको बैठक सोमबार दिउँसो १ बजेका लागि डाकिएको छ । तर, आइतबारको सर्वदलीय बैठकमा सहमति हुन नसकेपछि सोमबारको बैठक अन्यौलमा परेकाे छ ।

प्रकाशित मिति: आइतबार, चैत २९, २०७७ २१:०८