एकताको स्वाङ, विग्रहका कारक

A+ A A-

एमाले–माओवादी केन्द्रको एकताको सूत्रधारका रूपमा प्रचारित बामदेव गौतम अन्ततः नेकपा विग्रहका कारकसमेत बन्न पुगे । भलै, अझै पनि उनी पार्टी एकता अभियान चलाइरहेका छन् । पार्टी अध्यक्ष एवं प्रधानमन्त्री केपी ओली र अर्का अध्यक्ष पुष्पकमल दाहालबीचमा ‘पेन्डुलम’ जसरी दाँयाबाँया गरेर उनले पार्टी कलहलाई उत्कर्षमा पुर्‍याउन मद्दत गरे ।

२०७४ को निर्वाचनमा उनी बर्दिया १ बाट हारे पनि सांसद र प्रधानमन्त्री बन्ने महत्त्वाकाङ्क्षाले उनलाई लखेटिरह्यो । पार्टीका दुवै समूहले उनको त्यो सपनाको भरपूर व्यापार गरे । पार्टीमा ‘बामदेव कार्ड’को खुबै प्रयोग गरियो । २० वैशाखको सचिवालय बैठकमा ओली अल्पमतमा परिसकेका थिए । गौतम स्वयम्‌ले समेत उनलाई प्रधानमन्त्री र अध्यक्ष दुवै पदबाट राजीनामा दिएर बालकोटमा आराम गर्न भनिसकेका थिए ।

आफू अप्ठेरोमा परेपछि ओलीले आफूले प्रधानमन्त्री छाड्नैपरे गौतमका लागि छाड्ने घोषणा गरिदिए । केही बेरअघिसम्म विपक्षमा रहेका गौतम छिनमै पक्षमा उभिएपछि चामत्कारिक रूपमा ओली बहुमतमा पुगे ।

ओली–प्रचण्डलाई मिलाउने २६ भदौको सहमतिको पृष्ठभूमि तयार पार्न उपाध्यक्ष गौतमले पेस गरेको छबुँदे प्रस्तावले काम गरेको थियो । खुसी भएका ओली भैँसेपाटीस्थित गौतम निवासमै पुगेर धन्यवाद दिए । तर, पार्टी विभाजनको मुख्य कारक मानिएका प्रचण्डले ओलीविरुद्ध तयार पारेको १९ पेज लामो प्रस्तावलाई गौतमले समर्थन मात्र गरेनन्, त्यो तयार पार्न योगदानसमेत गरेको बताए ।

नेकपा विवादको उत्कर्षमा ओलीले आरोपपत्र भनेको प्रचण्डको प्रस्ताव फिर्ता गरिएको भए स्थिति केही सम्हालिने थियो । त्यो प्रस्ताव पार्टी सचिवालयमै रोकिन सक्थ्यो । ओली र प्रचण्ड समूहमा चार–चार सदस्य बाँडिएका बेला निर्णायक बनेर गौतमले प्रस्ताव रोक्न सक्थे । तर, पार्टी विभाजनको डिलमा रहेको चाल पाएर पनि उनले रोक्न चाहेनन् ।

त्यसैको परिणामस्वरुप विवाद गहिरिँदै जाँदा अन्ततः पार्टी विभाजन हुन पुग्यो । प्रधानमन्त्री ओलीको ५ पुसको कदमपछि दुई समूह आ–आफ्ना संगठन विस्तारमा लागिरहेका बेला गौतम भने पार्टी एकताको रट लगाइरहेका थिए । त्यो धुन अहिले पनि बजिरहेको छ ।

प्रकाशित मिति: सोमबार, चैत ३०, २०७७ १०:२८