जित्नै लागेको ‘ब्याटल’ हारेका प्रचण्ड (भिडियाेसहित)

A+ A A-

राजनीतिलाई सम्भावनाहरूको खेल मान्दै आएका माओवादी केन्द्रका अध्यक्ष पुष्पकमल दाहाल ‘प्रचण्ड’ सत्तासंघर्ष र उथलपुथलका कारण यो वर्षभरि छाइरहे । सत्तारोहणका अनेक बाटाको खोजी गर्दै उनी सफलतानजिक पुग्दै थिए । अचानक राजनीतिको पासा पल्टियो र उनले जित्नै लागेको ‘ब्याटल’ हारे ।

प्रधानमन्त्री एवं नेकपा अध्यक्ष केपी ओलीको एकलौटी नेतृत्व खोस्न उनले पूर्वएमालेभित्रको बलियो माधव नेपाल गुटलाई आफूतर्फ तानिसकेका थिए । ओलीलाई पार्टीका सबै कमिटीमा अल्पमतमा पारेर जसै सरकारबाट हटाउने अन्तिम तयारीमा थिए, २३ फागुनमा सर्वोच्च अदालतले गरेको एउटै फैसलाले उनका सम्भावनाहरूको खेल चौपट पारिदियो ।

ओलीविरुद्ध सडक आन्दोलनमा उत्रिएका प्रचण्डले घोषणा नै गरेका थिए, ‘मैले ब्याटल जितिसकेँ । ओलीजीको निधारमा कलंकको टीका लागिसक्यो । अब मसँग कुनै तुलना हुँदैन ।’ तर, उनले ब्याटल जितिहाल्न भने सकेनन् ।

७ वैशाखसम्म आइपुग्दा नेकपाभित्रको विवाद उत्कर्षमा पुगेको थियो । प्रधानमन्त्री ओलीले पार्टी विभाजन गर्न सहज हुने गरी अध्यादेश ल्याएपछि कलह गहिरिँदै गयो । पार्टी सचिवालयमा अल्पमतमा परेका ओलीले सुरुमा वामदेव गौतमलाई अध्यक्ष बनाउने प्रस्ताव ल्याएर विपक्षी घेराबन्दी तोडे । विवाद स्थायी कमिटीमा पुग्यो । पार्टी कमिटीमा अल्पमतमा परिसकेका ओली बैठक छाडेर हिड्नुपर्ने स्थिति आयो ।

प्रधानमन्त्री ओलीले प्रचण्डलाई भावी नेतृत्व सुम्पिने सर्तमा मनाउँदै थिए । तर, जनताको बहुदलीय जनवाद स्वीकार्नुपर्ने सर्त राखेपछि त्यो सहमति तुहियो । पार्टी विवाद सुल्झाउन दोस्रो तहका नेताहरूले मध्यमार्गी प्रस्ताव ल्याए, ओलीले सरकार र प्रचण्डले पार्टी चलाउने । त्यसलाई बल पुग्नेगरी उपाध्यक्ष गौतमले छबुँदे प्रस्ताव ल्याए । अन्ततः २६ भदौमा ओली–प्रचण्डले सधैँका लागि विवाद सकिएको घोषणा नै गरे ।

तर, कात्तिकको तेस्रो सातादेखि सत्तासंघर्ष पुनः सतहमा आयो । निहुँ बनिदियो, २५ असोजमा कर्णाली प्रदेश सरकारविरुद्ध आएको अविश्वासको प्रस्ताव । एमाले एकठाउँ उभिएको मुख्यमन्त्री महेन्द्रबहादुर शाहीविरुद्ध अविश्वास प्रस्ताव दर्ता गराएका थिए । प्रचण्ड–माधव मिलेरै त्यो अविश्वास प्रस्ताव विफल पारे । कर्णालीको झिल्को सिंहदरबारमा सल्किइसकेको थियो ।

विवाद झ्याँगिँदै जाँदा प्रचण्डले पार्टी सचिवालयमा ओलीविरुद्ध १९ पेजको प्रस्ताव ल्याए । त्यसमा ओलीविरुद्ध गम्भीर आरोपहरू लगाइएका थिए । ओलीले प्रचण्ड निवास खुमलटार पुगेरै प्रस्ताव फिर्ता गर्न आग्रह गरे । प्रचण्डले त्यो आग्रह अस्वीकार मात्र गरेनन्, उल्टै ओलीविरुद्ध अविश्वासको प्रस्ताव दर्ता गर्ने तयारी गरे । त्यसको छनक पाउनासाथ ५ पुसमा प्रधानमन्त्री ओलीले प्रतिनिधिसभा विघटनको असंवैधानिक कदम चाले ।

प्रचण्ड–माधव समूहले ओलीलाई पार्टी अध्यक्षबाट मात्र होइन, साधारण सदस्यबाट समेत हटाइदियो । ओलीको कदमविरुद्ध देशभर ठूलाठूला प्रदर्शनहरू गरिए । नेकपाको विवाद र विभाजन गाउँगाउँसम्म पुग्यो । ११ फागुनमा सर्वोच्च अदालतले संसद विघटन गर्ने प्रधानमन्त्री ओलीको कदम खारेज गरिदियो । प्रचण्ड–माधव यति खुसी थिए कि उनीहरूले सार्वजनिक रूपमै लड्डु खाइख्वाइ गरे ।

तर, दुर्भाग्य, एउटा ब्याटल जितेर पार्टी र सरकारको साँचो वैधानिक रूपमा आफ्नो हातमा आउनै लाग्दा सर्वोच्चको अर्को फैसलाले भने प्रचण्डलाई पूर्ववत् माओवादी केन्द्रमै फर्काइदियो । उल्टै उनले युद्धकालीन सहयात्रीहरू रामबहादुर थापा बादल, टोपबहादुर रायमाझी, लेखराज भट्ट, प्रभु साह गुमाउनुपर्यो । उनी जित्दाजित्दै हार्ने स्थितिमा आइपुगे ।

प्रकाशित मिति: सोमबार, चैत ३०, २०७७ १०:३६