चाेटले गर्दा साम्बा राेकिइन्, वर्षभरि चर्चामा रहिन्

A+ A A-

महिला फुटबल टोलीकी स्ट्राइकर सावित्रा भण्डारी (साम्बा) लाई कतिपयले ‘गोल मेसिन’ मान्छन् । नेपालबाट सर्वाधिक अन्तर्राष्ट्रिय गोल गर्ने महिला खेलाडी हुन् उनी ।

यो वर्ष अखिल नेपाल फुटबल संघ (एन्फा)को आयोजनामा पहिलो पटक डबल लिग पद्धतिमा सम्पन्न लिगमा सावित्राले १० खेलमा ४३ गोल गरिन् । एक खेलमा उनले दुई गोल गरेकी थिइन् भने बाँकी सात खेलमा तीन वा त्योभन्दा बढी गोल हानिन् ।

उदयपुरको चौदण्डीगढीविरुद्ध पहिलाे खेलमा उनले १२ र दोस्रोमा आठ गोल गरेकी थिइन् । पहिलो खेलमा उनको क्लब एपीएफले २२–० को फराकिलो जित हात पारेको थियो ।

भण्डारी राष्ट्रिय टोलीमा सर्वाधिक गोलकर्ता महिला खेलाडी हुन् । महिला लिगअन्तर्गत नेपाल पुलिस क्लबविरुद्धको खेलमा ल्याण्डिङ नमिल्दा उनको घुँडामा चोट लागेको थियो । एमआरआई गराएर हेर्दा सावित्राको एन्टेरिएर क्रुसिएट लिगामेन्ट (एसीएल) च्यातिएको पाइएपछि उनले लिगका दुई खेल गुमाइन् । साम्बा अहिले उपचाररत छिन् । उनले अझै छ महिनाजति आराम गर्नुपर्ने चिकित्सकहरूले बताएका छन् ।

यो वर्ष नै उनी युरोपेली क्लबमा आवद्ध हुने चर्चा थियो । एन्फाका अधिकारीले उनलाई युरोप पठाउने प्रक्रिया नै अघि बढेको बताइरहेका थिए । तर, घाइते भएपछि उनको युरोपयात्रा रोकियो ।

दक्षिण एसियाकी नम्बर एक स्ट्राइकर साम्बाको उपचारमा एन्फाले पनि आर्थिक सहयोग गर्ने जनाएको छ । पाँच वर्षअघि चितवनमा खेलाइएको राष्ट्रिय प्रतियोगिताको पहिलो खेलमै आठ गोल गरेर उनी राष्ट्रिय टोलीमा डेब्यु गरेकी थिइन् ।

प्रकाशित मिति: सोमबार, चैत ३०, २०७७ १०:५७