अस्पतालकाे शय्याबाट गुरुको न्याय–संघर्ष

A+ A A-

सत्कर्मको बाटो देखाउने गुरुमाथि नेपालकै सबैभन्दा जेठो विश्वविद्यालय परिसरमा आफ्नै विद्यार्थीबाट सांघातिक हमला भयो । त्रिभुवन विश्वविद्यालय केन्द्रीय क्याम्पस कीर्तिपुरका उप–प्राध्यापक प्रेमबहादुर चलाउनेलाई २० असोजमा आक्रमण हुँदा उनी घटनास्थलमै बेहोस बनेका थिए ।

उनको दाहिने गोडा भाँचियो । महिनादिनसम्म नलीको सहायताले पिसाब फेर्नुपर्ने हालतमा पुगे । एक महिना ललितपुरको नख्खुस्थित मेडिसिटी अस्पतालमा बिताए । अहिले पनि उनी वैशाखीको भरमा मात्र सामान्य हिँडडुल गर्छन् ।

अस्पतालको बेडबाटै उनले न्यायका लागि संघर्ष गरे । आक्रमणकारी मुख्य योजनाकार नेपाली कांग्रेसनिकट नेविसंघका नेताद्वय हरि आचार्य र योगेन्द्र रावलसहित छ जनाविरुद्ध किटानी जाहेरी दिए । यसअघि गुरुमाथि आक्रमण गर्नेलाई प्रहरीले सार्वजनिक अपराधमा मुद्दा चलाएर उन्मुक्ति दिने गरेकोमा चलाउनेले ज्यान मार्ने उद्योगमा मुद्दा चलाउन माग गरे ।

प्रहरीले ज्यान मार्ने उद्योगमा मुद्दा दर्ता गरायो । १५ मंसिरमा काठमाडौं जिल्ला अदालतका न्यायाधीश अम्बिकाप्रसाद निरौलाको एकल इजलासले सबै आरोपितलाई थोरै धरौटी रकममा छोड्ने आदेश गर्‍यो ।

न्यायाधीशले अन्यायपूर्ण फैसला गरेको निचोडमा पुगेका चलाउने न्यायाधीश निरौलाविरुद्ध न्याय परिषद्‌मा उजुरी दिए । तर, सुनुवाइ भएन । आरोपितहरूलाई थुनामै राखेर मुद्दा छिनोफानो गर्नुपर्ने भन्दै उच्च अदालतमा पुनरावेदन दिए ।

उच्च अदालतले जिल्लाले तोकेको धरौटी रकम ५५ हजार रुपैयाँबाट बढाएर ५ लाख रुपैयाँ पुर्‍याइदियो भने उपचारका लागि १ लाख रुपैयाँ जम्मा गर्न भन्यो । तर, अझै उनको न्यायको संघर्ष सकिएको छैन, जिल्ला अदालतमा मुद्दा विचाराधीन छ ।

प्रकाशित मिति: सोमबार, चैत ३०, २०७७ १०:५६