प्रधानमन्त्रीविरुद्ध पार्टीभित्रै जब्बर संघर्ष

A+ A A-

राष्ट्रपति विद्यादेवी भण्डारीबारे व्यक्तिगत टिप्पणी गरेको भन्दै विवादमा तानिइन्, रामकुमारी झाँक्री । प्रधानमन्त्री केपी ओलीले गरेका हरेक कदमको आँखा चिम्लिएर प्रमाणीकरण गरिदिएपछि राष्ट्रपति संवैधानिक दायित्वबाट च्यूत भएको भन्दै झाँक्री आक्रोशित बनेकी थिइन् । तर, उनले अभिव्यक्त गरेका टिप्पणी कतिपयका लागि व्यक्तिगत लाञ्छना भइदिए ।

माघको दोस्रो साता गोरखामा आयोजित कार्यक्रममा झाँक्रीले राष्ट्रपति भण्डारीलाई आफ्ना पति एवं एमालेका दिवंगत नेता मदन भण्डारीको निधनपछि सेतो सारीमा निर्वाचनमा लडाउनु प्रत्युत्पादक भएको टिप्पणी गरेकी थिइन् ।

उनले भनेकी थिइन्, ‘जनताको अधिकारमाथि गिद्दे दृष्टि लगाएर शीतलनिवासमा बडामहारानीको बास भएको छ । मदन भण्डारीको हत्यापछि सेतो सारी लगाएर चुनावमा उठाउने एमालेले जुन संस्कृति सुरु गरेको थियो, त्यसको प्रत्युत्पादक हो, विद्या भण्डारी ।’

उनको अभिव्यक्तिमा आपत्ति जनाउँदै २१ माघमा ओली समूहको अनेमसंघले गृहमन्त्री रामबहादुर थापालाई भेटेर कारबाहीको माग राख्यो । यसले झाँक्री झन् आक्रोशित बनिन् । २८ माघमा नेकपा प्रचण्ड–माधव समूहले भृकुटीमण्डपमा आयोजना गरेको सभामा कालो एप्रोनसहित मुखमा टेप टालेर सम्बोधन गर्न उपस्थित भइन् ।

मञ्चमा पुगेर मुखको टेप उप्काएपछि कालो एप्रोन खोलेर फाल्दै आक्रोश ओकलिन्, ‘बोल्न पाइन्छ, संविधान मिचाहाविरुद्ध बोल्न पाइन्छ । राष्ट्रपति शिरमाथिको संस्था हो । तर, निरंकुशताको प्यादा बन्छ भने बोल्न पाइन्छ । एउटा खलपात्रका विषयमा कुरा गर्दा कसले भन्छ महिला अस्मिता मिचियो भनेर ?’

यस्तो अभिव्यक्ति दिएको भोलिपल्टै झाँक्रीलाई राज्यविरुद्धको कसुरमा काठमाडौं प्रहरीले गिरफ्तार गर्‍यो । चौतर्फी विरोधपछि सरकारले त्यही साँझ उनलाई रिहा गर्‍यो ।

उनी निरन्तर सरकारको आलोचनामा देखिइन् । प्रधानमन्त्री ओली स्वयम्‌ले झाँक्रीविरुद्ध कडा टिप्पणीहरु गरे । एमालेभित्र आफ्नो समूहका नेताहरु रक्षात्मक बन्दै गएका बेला झाँक्रीले देशैभरि पुगेर गरेको अपिलले उनलाई पहलकदमी लिन सक्ने नेतृृका रूपमा अगाडि बढायाे ।

प्रकाशित मिति: सोमबार, चैत ३०, २०७७ १०:५२