दिशाहीन कांग्रेसलाई बाटो देखाउने रामचन्द्र प्रयास (भिडियाेसहित)

A+ A A-

सरकारका गलत कदमविरुद्ध संसदमा सशक्त प्रतिवाद गर्न नसक्दा दिउँसै टर्च बालेर खोज्नुपर्ने अवस्थामा रुमलियो, प्रमुख प्रतिपक्षी दल नेपाली कांग्रेस । प्रतिपक्षको भूमिकामा कोमामा पुगेको कांग्रेसलाई रामचन्द्र पौडेलले राहत दिलाए ।

कांग्रेसलाई पौडेलले यस्तो एजेण्डामा डोर्‍याउन सफल भए, जुन उनको वैयक्तिक स्वार्थभन्दा माथि छ । उनी सांसद नभएकाले प्रधानमन्त्री बन्न सक्दैनन् । आफू कार्यकारी प्रमुख बन्न असम्भव हुँदाहुँदै पनि प्रधानमन्त्री केपी ओलीको विकल्पमा कांग्रेसले आफ्नो नेतृत्वमा सरकार गठन गर्ने निर्णय गराउन सफल भए ।

२० चैतमा ५ घन्टासम्म सभापति शेरबहादुर देउवासँग छलफल गरेका पौडेलले प्रधानमन्त्रीको राजीनामा मागबारे संस्थागत निर्णय गर्न आग्रह गरेका थिए । जनता समाजवादी पार्टीले सरकारको विकल्प खोज्न नमानेसम्म कांग्रेसले निर्णय लिनुको औचित्य नहुने भन्दै देउवा पन्छिए । तर, कांग्रेसले संस्थागत निर्णय गरेमा जसपाका महन्थ ठाकुर र राजेन्द्र महतोलाई मनाउने जिम्मा आफूले लिनेमा पौडेलले देउवालाई विश्वस्त तुल्याए । त्यसपछि नै हो, कांग्रेसले केन्द्रीय कार्यसमितिको बैठकमार्फत प्रधानमन्त्रीको राजीनामा माग्ने र आफ्नो नेतृत्वमा सरकार बनाउने निर्णय गरेको ।

अहिले नयाँ गठबन्धन निर्माणका निम्ति जसपा निर्णायक छ । जसपालाई मनाउनका निम्ति र कांग्रेसको नेतृत्वमा सरकार गठनका निम्ति पौडेल सक्रिय छन् । २१ चैतमा उनले जसपा अध्यक्ष ठाकुरसँग संवाद गरे । आफ्नो दललाई प्रधानमन्त्री फेर्ने एजेण्डामा हिँडाउन सफल पौडेलले जसपालाई प्रधानमन्त्री ओलीविरुद्धको गठबन्धनमा समेट्न सक्ने नसक्ने टुंगो छैन ।

प्रतिनिधिसभा विघटनपछि देउवा निर्वाचनको पक्षमा थिए । पौडेलचाहिँ संसद पुनर्स्थापनाको मुद्दामा अडिए । अदालतमा विचाराधीन मुद्दामा आन्दोलन गर्न नहुने पक्षमा चट्टानी अडान लिए, देउवाले । तर, पौडेलले पार्टीलाई आन्दोलनमा उत्रिने निर्णय गराए ।

उनकै समूहको बलमा कांग्रेसको ९ पुसमा बसेको केन्द्रीय कार्यसमिति बैठकले १ सय ६५ निर्वाचन क्षेत्रमा पहिलो चरणको आन्दोलन घोषणा गर्‍यो । यसपछि उनै निर्वाचन क्षेत्रमा १९ पुसमा फेरि दोस्रो चरणको आन्दोलन घोषणा गर्‍यो । जबर्जस्त नै सही, आफ्नो एजेण्डामा लघारेर पौडेलले दिशाहीन कांग्रेसलाई बाटो देखाइरहेका छन् ।

प्रकाशित मिति: सोमबार, चैत ३०, २०७७ १०:५२