विप्लवी आकाङ्क्षाको शीघ्र पतन

A+ A A-

दुई वर्षदेखि भूमिगत भएका नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी अन्ततः खुल्ला राजनीतिमा आयो । २० फागुनमा सरकार र विप्लव समूहबीच शान्तिपूर्ण रूपले राजनीतिक गतिविधि गर्ने, सरकारले पक्राउ गरेका विप्लव समूहका नेता तथा कार्यकर्ताको रिहाइ गर्ने र विप्लव समूहमाथि लगाइएका मुद्दा खारेजी गर्ने तीनबुँदे सहमति गरेर उनी खुल्ला राजनीतिमा आएका हुन् ।

सरकारले २८ फागुन २०७५ मा विप्लव समूहलाई प्रतिबन्ध लगाएपछि पार्टी भूमिगत भएको थियो । दुुई वर्षको अवधिमा विप्लव समूहका दर्जनौँ नेता कार्यकर्ताले ज्यान गुमाए भने नेतृत्व तहका थुप्रै नेता पक्राउ परे । शीर्ष नेता धमाधम प्रहरी कब्जामा पुगेपछि राजनीतिक रूपमा हलचल गर्न नसक्ने अवस्थामा पुगेको विप्लव समूह अन्ततः खुला हुन बाध्य भयो ।

विप्लव समूहले उठाएका मुद्दा राजनीतिक प्रकृतिको भएकाले उसमाथि प्रतिबन्ध होइन, राजनीतिक समाधान खोज्नुपर्छ भन्ने एउटा तप्का थियो । तर, विप्लव समूहले गत मंसिरमा मोरङको मिक्लाजुङमा निहत्था शिक्षकको पाशविक हत्या गरेपछि यो सान्त्वनासमेत गुमायो । शिक्षक राजेन्द्र श्रेष्ठलाई घरदेखि हात बाँधेर नजिकैको जंगलमा लगी हत्या गरिएको थियो ।

यो घटनाले १० वर्षे जनयुद्धको झल्को मात्र दिएन, विप्लवको व्यक्तिहत्याविरुद्ध जनमानसमै आवाज बलियो बन्यो । यसले समेत विप्लव समूह झनै अप्ठेरोमा परेको थियो ।

एकाएक खुल्ला राजनीतिमा समाहित भएपछि विप्लवलाई सहज भयो । खुला राजनीतिमा आएपछि त नेता विप्लवले सरकारले उपलब्ध गराएको सुरक्षा लिए । यो कुरा बाहिरिएपछि विप्लवले तुरुन्तै सरकारी सुरक्षाकर्मी फिर्ता गरिदिए ।