पार्टी राजनीतिमा रुचि देखाइन्, राष्ट्रपति संस्थाको साख गिराइन् (भिडियाेसहित)

पार्टी राजनीतिमा रुचि देखाइन्, राष्ट्रपति संस्थाको साख गिराइन् (भिडियाेसहित)

A+ A A-

पहिलो महिला राष्ट्रपति बनेर व्यक्तिगत कीर्तिमान हासिल गरे पनि विद्यादेवी भण्डारीले संस्थागत शाख भने गिराइन् । राष्ट्रपतिको शिखारोहणमा पुगेर पनि उनले आफ्नो पूर्वदलको राजनीतिमा सक्रियता खोज्ने साँघुरो सोच राखिन् ।

वैशाखदेखि कात्तिकसम्मको सात महिनाको अवधिमा साविक नेकपा तीनचोटि फुटको सम्मुख धकेलिएर बच्यो । तर, नेकपाभित्रको यो शक्ति संघर्षमा राष्ट्रपतिले शीतल निवासलाई बचाइनन् । तत्कालीन नेकपादेखि हालको एमाले कचहरीसम्म उनको संलग्नता छताछुल्ल हुँदा पदीय कद भने ढल्यो ।

प्रधानमन्त्री केपी ओलीका प्रतिनिधिसभा विघटनदेखि सजिलै दल विभाजन गर्न सकिने राजनीतिक दलसम्बन्धी र संवैधानिक अंगमा आफूखुसी नियुक्ति गर्न मिल्ने संवैधानिक परिषदसम्बन्धी अध्यायदेशलाई राष्ट्रपतिले निमेषमै सदर गरिन् । पछि यी दुवै अध्यादेश फिर्ता भए । प्रतिनिधिसभा विघटनलाई सर्वोच्च अदालतले असंवैधानिक ठहर्‍यायो ।

भलै राष्ट्रपति कार्यालयले प्रधानमन्त्रीको निर्णय सदर गर्नु राष्ट्रपतिको संवैधानिक दायित्व भएको दाबी गर्छ । यी उनै राष्ट्रपति हुन्, जसले यसअघि सभामुख ओनसरी घर्तीले गोपालनाथ योगीलाई संघीय संसदमा सचिव नियुक्ति गर्ने फाइल भने तीन वर्ष रोकेर निष्क्रिय पारिदिएकी थिइन् ।

संसद् विघटनको साता दिनअघि संवैधानिक परिषद्सम्बन्धी अध्यादेश राष्ट्रपतिले सदर गर्दा ३३ पदाधिकारी नियुक्ति भए, जुन सर्वाधिक विवादमा पर्‍यो । पार्टीभित्र र सरकार दुवैमा प्रधानमन्त्री ओलीको पक्षमा काम गरेको आरोप निष्पक्ष हुनुपर्ने राष्ट्रपतिलाई लागिरह्यो ।

प्रकाशित मिति: सोमबार, चैत ३०, २०७७ १०:५०