सावधानी नअपनाए फेरि लकडाउन हुनसक्छ - प्रधानमन्त्री ओली

A+ A A-

प्रधानमन्त्री केपी शर्मा ओली सावधानी नअपनाएर फेरि लकडाउन गर्नुपर्ने अवस्था आउने चेतावनी दिएका छन् । शनिबार काठमाडौंमा आयोजित नेपाल उद्योग वाणिज्य महासंघको ५५औँ वार्षिक साधारणसभा तथा उद्योग वाणिज्य दिवसको उद्घाटनसत्रलाई सम्बोधन गर्दै प्रधानमन्त्री ओलीले यस्तो चेनावनी दिएका हुन् ।

कोभिड १९ को सावधानीपूर्वक सामना गर्नुको विकल्प नभएको भन्दै उनले सामाजिक जीवनलाई खलबलिन नदिनेगरी अनुशासित ढंगले आफ्ना क्रियाकलापलाई निरन्तरता दिनुपर्ने तर्फ सबै सचेत हुन आवश्यक रहेको बताए । सचेतता नअपनाए फेरि पनि लकडानमा जानुपर्ने अवस्था आउन सक्ने भन्दै उनले पर्याप्त सावधान रहेर अनुशासित बन्न सबैलाई आग्रह गरे ।

'लकडाउन गर्नै हुदैन भन्ने देशहरू दोहोर्‍याएर तेहर्‍याएर लकडाउनमा जाँदैछन् । हामीले पनि समयमै सचेतनता अपनाएनौँ भने, सावधानी अपनाएनौँ भने फेरि हामी लकडाउनमा पुग्दैनौँ भन्ने कुनै ग्यारेण्टी हुँदैन । हामी आफैँ घरबाट बाहिर निस्कन नसक्ने अवस्थामा हुन्छौँ किनभने ज्यान खतरामा हुन्छ ।'

उनले अहिलेदेखि नै सावधानी नअपनाए कोरोनाको दोस्रो, तेस्रो लहर आउन सक्ने बताए । कोरोना संक्रमणबाट बच्नका लागि नियन्त्रित व्यवहार अपनाउनुपर्ने उनको भनाइ छ । 'सेकेण्ड वेभ, थर्ड वेभ आइरेको भन्छौँ नि । त्यो वेभ कसरी आउँछ ?... त्यसले केही पनि बुझ्दैन । त्यो त यति सानो छ कि । त्यसको बुझ्ने खालको गिदि हुदैन । केही पनि बुझ्दैन त्यसले । सेकेण्ड वेभ पनि बुझ्दैन । थर्ड वेभ पनि बुझ्दैन । हामी जति छाडा हुन्छौ त्यत्ति चम्किन्छ । जति नियन्त्रित हुन्छौ त्यसले खुम्चिन बाध्य हुन्छ । त्यो सिद्धिन बाध्य हुन्छ । हाम्रो व्यवहारमा त्यो निर्भर हुन्छ । ...हामीले मास्क लगाउन छोडिदियौँ फेरि सर्न सुरु भयो । हामीले अनुशासित पन आउन समय लाग्यो भने बढ्दै जान्छ । जब अनुशासित हुन्छौ तब घट्दै जान्छ ।' उनले भने ।

उद्योग वाणिज्य महासंघले ल्याएको आर्थिक रूपान्तरणसम्बन्धी प्रतिवद्धता सकारात्मक कदम भएको भन्दै उनले त्यसलाई सफल पार्न सबैले आ–आफ्नो ठाउँबाट योगदान गर्नुपर्ने आवश्यकता औँल्याए । सन् २०३० सम्म दिगो विकासका सबै लक्ष्य हासिल गरि विकसित मुलुकको रूपमा उभ्याउने राष्ट्रिय आकांक्षा पूरा गर्ने उद्देश्य साथ सरकार अघि बढिरहेको भन्दै उनले त्यसमा बिलम्ब हुने गरि कसैले काम गर्न नहुनेतर्फ सचेत गराए । दिगो विकासका लक्ष्य सन् २०३० सम्म पूरा गर्नुपर्ने भएकाले तीब्र विकासमा जानैपर्ने बाध्यता सरकारलाई रहेको उनले स्पष्ट पारे ।

उनले वैदेशिक लगानीका स्टाटअप बिजनेसका लागि सरकारले तोकेको लगानीको सिमा सही र यथार्थपरक रहेको दाबी गरे । भुटान र माल्दिभ्सको उदाहरण दिँदै उनले नेपालमा लगानी गर्न आउनेहरूले यहीँबाट कमाएर प्लेन चढ्ने वातावरण सिर्जना गरेर नेपालले फाइदा लिन नसक्नेतर्फ उद्योगीको ध्यानाकर्षण गराए ।

प्रधानमन्त्री ओलीले कोभिड १९ ले गम्भीर धक्का पुर्‍याएको भए पनि सरकार सबै क्षेत्रमा सम्हालिएर अघि बढिरहेको र सफलता पनि प्राप्त गरेको दाबी गरे । व्यापार घाटालाई कम गर्नतर्फ सरकारले सफलता प्राप्त गरेको उनले बताए । उनले आयात निर्यातको सन्तुलन मिलाउने तर्फका प्रयास सफलताउन्मुख भएको, मजदुर हड्तालको समस्या समाधान हुनुको साथै नेपालबाट हिंसा समाप्त भएकाले उद्योग विस्तारका लागि उपयुक्त वातावरण बनेकाले उद्योग व्यापारलाई शान्तिपुर्ण र भयरहीत वातावरणमा अघि बढाउन सकिने बताए ।

प्रकाशित मिति: शनिबार, चैत २८, २०७७ १६:५४