‘खर्पन’मा ‘कल्प–ग्रन्थ’ [भिडियोसहित]

A+ A A-

कालो पहिरनमा ढाकिएका नगरकोटीलाई, कालो ह्याट, कालो चस्मा र कालै टिसर्टले आफूलाई सजाएका कवि विप्लव प्रतीकले भने, ‘डन बन्दिने, हामीलाई बाँच्न नदिने !’

कोमल कविको कठोर वाणी सुनेपछि नगरकोटीले तत्क्षण प्रतीकको हात समाते । सुमसुम्याए । प्रतीकको हात ढोग्दै नगरकोटी भन्दाभए, ‘अरू केही होइन, प्रभुको आत्मा यता सरेको हो ।’

नगरकोटियन उवाच सुनेपछि प्रतीक खित्का छाडेर हाँसे । नगरकोटीले पनि प्रतीकको हाँसोमा साथ दिँदाभए ।

‘सुन्दर !’ प्रतीकले प्रक्रिया जनाए ।

राइजिङ मलको पाँचौ तलाको क्यु सिनेमा हलमा औपचारिक दृश्य हेर्न भेला भएको समयमा देखिएका यी अनौपचारिक दृश्य हुन् । पत्रकार, लेखक तथा समीक्षक यज्ञशको भाषामा फिक्सन डिजाइनर नगरकोटीले आजैबाट ठूलो पर्दामा ‘डेब्यु’ गरे ।

नगरकोटिकृत ‘खर्पन’को भिडियो सिनेमा हलमा सार्वजनिक भएसँगै नगरकोटी अब फिक्सन डिजाइनर मात्र रहेनन् । गीतकार भैगए । म्युजिक भिडियोमा समेत अभिनय गरेपछि अब उनी मोडल पनि भैगए । नगरकोटीकै शब्दमा भन्दा उनी खर्पनका ‘वान एण्ड वान, सोलो’ हिरो भैगए ।

नगरकोटीका शब्दमा सुगम पोखरेलले स्वर भरे । र, त्यसैमा हरि लम्सालले संगीतको प्राण भरे । यतिले मात्र नपुगेर भूपेन्द्र खड्काले नगरकोटीलाई ‘सोलो हिरो’ बनाउँदै भिडियो निर्देशन गरे ।

नगरकोटीको बहुप्रतिक्षित किताब ‘कल्प–ग्रन्थ’को प्रमोसनल भिडियो भनिएको खर्पन गीत सार्वजनिक गर्दैगर्दा खड्काले किताब सार्वजनिक हुने मिति पनि घोषणा गरे ।

१४ चैतमा किताब सार्वजनिक गर्न नसकेकोमा क्षमा माग्दै खड्काले २५ वैशाखमा पाटन दरबार स्क्वाएर परिसरमा सांगतीक प्रस्तुतिसहित कल्प–ग्रन्थ सार्वजनिक गर्ने वाचा गरे । खड्काका अनुसार अहिलेसम्म ३ हजार ७ सय १३ जनाले कल्प–ग्रन्थ आफ्नो नाममा दर्ज गराइसकेका छन् ।

‘किन्तु, परन्तु’ भएन भने कल्प–ग्रन्थ सार्वजनिक हुनुअगावै पाठकका हातमा किताब पुग्नेछ । खड्काले घोषणा गरे, ‘किताब सार्वजनिक हुनुअगावै, १५ वैशाखदेखि पाठकलाई किताब डेलिभरी गर्छौं ।’ पाठकले कल्प–ग्रन्थमा पनि खर्पन गीत पढ्न पाउनेछन् ।