श्याम साहको कथासङ्ग्रह 'पथेर' बजारमा

A+ A A-

कथाकार श्याम साहको दोस्रो कथासङ्ग्रह 'पथेर' सार्वजनिक भएको छ । कमलादीस्थित नेपाल प्रज्ञा–प्रतिष्ठानमा शुक्रबार किताब विमोचन गरिएको हो ।

कथासङ्ग्रह 'पथेर' सार्वजनिकीकरण कार्यक्रममा लेखक राजन मुकारुङ, लेखक एवम् राजनीतिक समीक्षक सीके लाल, त्रिवि समाजशास्त्र विभागका प्रमुख डा. युवराज लुइँटेल र लेखक विभूति भट्टराई वक्ता थिए ।

लेखक राजन मुकारुङले भने, 'नेपाली साहित्यको पुरानो मानक र व्याकरणमा राखेर यो कृतिलाई विद्वानहरूले हेर्नुभयो भने कृति आफ्नो लाग्दैन ।'

पुरानै दृष्टिकोणबाट कथासङ्ग्रहलाई पढ्न खोजेमा कथाकारले उठान गर्न खोजेको विषय र मुद्दासँग पाठक 'कन्भिन्स' हुन गाह्रो पर्ने उनले बताए ।

कथासङ्ग्रहमाथि धारणा राख्दै लेखक विभूति भट्टराईले साहका कथा पढेपछि पाठकलाई मधेसप्रति अपनत्व महसुस हुने बताइन् । राज्यद्वारा मधेसमाथि भएको विभेदका विविध आयामहरूलाई कथाकारले आफ्ना कथामार्फत प्रस्तुत गर्न सफल भएको उनले बताइन् ।

त्रिवि समाजशास्त्र विभागका प्रमुख डा. युवराज लुइँटेलले, मधेशका कथाहरू लेखेर श्याम साहले नेपाली साहित्यमा सशक्त उपस्थिति जनाएको बताए । साहका कथामा मधेशको र विशेषतः महेन्द्र राजमार्गदेखि दक्षिणको आञ्चालिकता झल्किएको उनले बताए । मधेशमै पनि कथित् तल्लो तहमा राखिएका समुदायको कथा लेखेकाले मधेसभित्रको वर्गीय अनुहार साहले देखाउन सफल भएको उनको भनाइ थियो ।

लेखक एवम् राजनीतिक समीक्षक सीके लालका अनुसार साहका कथाहरूमा मधेसभित्रको समाजलाई हेर्ने वास्तविक दृष्टिकोण प्रस्तुत गरिएको छ । साहित्य समाजको ऐना भएकाले त्यसमा परावर्तित हुने कुरा लेखकको पृष्ठभूमि र दृष्टिकोणमा भर पर्ने उनले बताए । समाजको उठान सही तरिकाले भएका कथाहरू नै कालजयी हुने उनको भनाइ छ । मधेशको सामाजिक-राजनीतिक चित्रणमा कथाकार साह शतप्रतिशत सफल भएको उनको भनाइ थियो ।

फिनिक्स बुक्सले प्रकाशन गरेको कथासङ्ग्रह 'पथेर'भित्र एघारवटा कथा सङ्गृहीत छन् । किताबको मूल्य ३ सय ५० रुपैयाँ छ ।

प्रकाशित मिति: शनिबार, चैत २८, २०७७ १२:३०