आठ महिनामा नेपालको ऋण १ खर्ब ९२ अर्ब

A+ A A-

पछिल्लो आठ महिनामा सरकारको ऋण एक खर्ब ९२ अर्ब रुपैयाँभन्दा पुगेको छ ।

सरकारी आय-व्यय विवरण राख्‍ने महालेखा नियन्त्रकको कार्यालयको तथ्यांकअनुसार साउनदेखि फागुनसम्ममा यो ऋणको भार बढेको हो ।

यो अवधिमा नेपालले आन्तरिकतर्फ १ खर्ब १२ अर्ब रुपैयाँ र वैदेशिकतर्फ ७९ अर्ब ९० करोडभन्दा बढी ऋण थप्दा २० अर्ब २७ करोड रुपैयाँ मात्र ऋण तिरेको छ ।

नेपालको कुल ऋण १५ खर्ब १८ अर्ब रुपैयाँभन्दा बढी पुगेको छ । गत आर्थिक वर्षको अन्त्यसम्म यस्तो ऋण करिब १३ खर्ब ४७ अर्ब रुपैयाँ थियो ।

ऋण बढेसँगै नेपालीको प्रतिव्यक्ति ऋण भार ५१ हजार रुपैयाँ पुगेको छ । सरकारले यो वर्ष आन्तरिक ऋणतर्फ २ खर्ब २५ अर्ब उठाउने लक्ष्य राखेकोमा ८ महिनाको अवधिमा लक्ष्यको ४९ प्रतिशत ऋण उठाएको छ ।

ब्याज तिर्दा साढे १९ अर्ब

चालु आर्थिक वर्षमा सरकारले करिब साढे १९ अर्ब रुपैयाँ ऋणको ब्याज तिर्ने क्रममा नै सकेको छ । यो अवधिमा वैदेशिक ऋणको ३ अर्ब ३४ करोड रुपैयाँ ब्याज तिरेको छ । त्यस्तै, आन्तरिक ऋणको ब्याज १५ अर्ब ८ करोड रुपैयाँ तिरेको छ ।

यही अवधिमा ८ अर्ब २२ करोड रुपैयाँको आन्तरिक ऋण भुक्तानी गरेको छ भने १२ अर्ब ५ करोड रुपैयाँको वैदेशिक ऋण भुक्तानी गरेको छ ।

२२ अर्ब २२ करोड बढी लगानी

पछिल्लो आठ महिनाको अवधिमा सरकारले २२ अर्ब २२ करोड रुपैयाँभन्दा बढीको लगानी गरेको छ । संस्थानहरूमा शेयर लगानीका रूपमा ९ अर्ब १३ करोड रुपैयाँ विस्तार गरेको छ भने वैदेशिक शेयर लगानीमा १९ करोड १७ लाख रुपैयाँ खर्चिएको छ । त्यस्तै, संस्थानहरूमा ६ अर्ब ४४ करोडको ऋण लगानी गरेको छ ।

सरकारले विगतमा गरेको लगानीबाट यो अवधिमा ४ अर्ब २४ करोड रुपैयाँ ब्याज आम्दानी गरेको छ भने ४३ करोड सावा फिर्ता गरेको छ । यो अवधिमा २ अर्ब ९१ करोड रुपैयाँको लाभांश प्राप्त गरेको छ ।

प्रकाशित मिति: शुक्रबार, चैत २७, २०७७ १४:०८