९० वर्षे उद्यमीले प्रधानमन्त्रीलाई दिए देश विकास गर्ने 'आइडिया'

A+ A A-

'देश सुन्दर छ तर अपेक्षित विकास हुन सकेन । हामीसँगैका देश धेरै अघि बढे, हामी अघि बढ्‍न किन सकिरहेका छैनौँ ?'

धेरैले यस्तै प्रश्न सरकार, राजनीतिक दलका नेताहरूसँग गर्छन् । बिहीबार पञ्चकन्या ग्रुपका अध्यक्ष प्रेमबहादुर श्रेष्ठले पनि यही प्रश्‍न गरे ।

अध्यक्ष श्रेष्ठले प्रश्न मात्रै गरेनन्, कसरी विकास हुन्छ भन्ने सम्बन्धमा आफ्नो धारणा पनि प्रस्तुत गरे । बिहीबार नेपाल चेम्बर अफ कमर्सले प्रदान गर्ने ईश्वरलाल लाइफ टाइम एचिभमेन्ट अर्वाड पाएपछि चेम्बरले उपलब्ध गराएको मञ्चमा उभिएर उनले प्रधानमन्त्रीलाई देश विकास गर्ने आइडिया दिए ।

विकासका लागि राष्ट्रपतीय शासन आवश्यक रहेको श्रेष्ठको ठम्याइ छ । 'हाम्रो देशमा राष्ट्रपतीय शासन प्रणाली लागू गर्नुपर्छ, यसो भयो भने देश विकास हुन्छ,' उनले भने ।

९० वर्षीय श्रेष्ठले विकास नहुनुको प्रमुख कारण भष्ट्राचार रहेको आफ्नो निष्कर्ष सुनाए । उनले ६० प्रतिशत भष्ट्राचार रोक्न राष्ट्रपतीय शासन हुनुपर्ने तर्क गरे । 'राष्ट्रपतीय शासन लागू गरी राष्ट्रपतिले योग्य व्यक्ति लिएर मन्त्रिपरिषद् विस्तार गर्दा र सांसदहरू मन्त्री हुन नपाउने व्यवस्था गर्ने बित्तिकै ६० प्रतिशत भष्ट्राचार घट्छ,' श्रेष्ठले दाबी गरे ।