मन्त्रीको निर्देशन कानूनविपरीतः उद्योग सचिव

A+ A A-

उद्योग, वाणिज्य तथा आपूर्तिमन्त्री मातृकाप्रसाद यादवले सेयर खरिद बिक्रीको अभिलेख राख्न दूतावास र अदालतलाई दिएको निर्देशन कानुनविपरीत भएको मन्त्रालयले स्विकारेको छ ।

संघीय संसदको प्रायोजित व्यवस्थापन तथा सरकारी आश्वासन समितिको बिहीबारको बैठकमा उद्योग सचिव यामकुमारी खतिवडाले कम्पनी ऐनमा कहीँ कतै व्यवस्था नभएको विषयमा मन्त्रीले दिएको निर्देशनलाई कानुनसम्मत भन्न नमिल्ने बताएकी हुन् ।

मन्त्री यादवले दिएको सो निर्देशन गैरकानुनी भएकोले त्यसको खारेजी माग गर्दै दिइएको उजुरीको विषयमा छलफल गर्न बिहीबार समिति बैठकमा उपस्थित सचिव खतिवडा र कम्पनी रजिस्ट्रार कार्यालयका रजिस्ट्रार भुवनहरि अर्यालले मन्त्री यादवको निर्देशन गैरकानुनी भएको स्विकारेका हुन् ।

कम्पनी रजिस्ट्रारको कार्यालयलाई सेयरको अभिलेख राख्ने जिम्मेवारी भए पनि मन्त्री यादवले आफ्नो निजी सचिवालयमार्फत गत २७ असारमा अदालत र राजदूतावासलाई पनि सेयरको अभिलेख राख्न निर्देशनसहितको पत्र कम्पनी रजिस्ट्रारको कार्यालयलाई पठाएका थिए । उद्योग सचिव खतिवडाले सो निर्देशन कानुनसम्मत नभए पनि सुशासन ऐन सम्मत भएको दाबी गरिन् ।

समिति बैठकमा उपस्थित रजिस्ट्रार अर्यालले मन्त्री यादवले निर्देशन दिएपछि आफूहरुले त्यसलाई कार्यान्वयन गर्न भन्दै सबै तहका अदालत र दूतावासमा परिपत्र गर्नुपरेको बताए । तर, मन्त्री यादवको निर्देशन पछि अदालत र राजदूतावासबाट ३/३ वटा भन्दा बढी सेयर अभिलेख नभएको कम्पनी रजिस्ट्रारको कार्यालयलाई जानकारी दिइएको थियो ।

समिति सदस्य राधेश्याम अधिकारीले कम्पनी रजिस्ट्रारको कार्यालयले गर्ने सेयरको सनाखतसम्बन्धी काम किन अदालत र राजदूतावासलाई कानूनविपरीत दिइयो भनी प्रश्न गरेका थिए ।

कम्पनी ऐनअनुसार सेयरको सबै अभिलेख कम्पनी रजिस्ट्रारको कार्यालयमा राख्नुपर्ने हुन्छ । तर, मन्त्री यादवले अदालत र राजदूतावासमा पनि राख्न दिएको निर्देशन गैरकानुनी भएको दाबी गर्दै उजुरीकर्ताले त्यसलाई खारेज गर्न माग गर्दै समितिमा उजुरी दर्ता गरेका थिए ।

उजुरीमाथि सम्बन्धित निकायसँग छलफल गर्ने काम सुरु गरिएको र मन्त्री यादवसँग स्पष्टीकरण लिएपछि निर्देशन दिने तयारी गरिएका समितिका सभापति रामनारायण बिडारीले जानकारी दिए ।

प्रकाशित मिति: शुक्रबार, जेठ ३, २०७६ ०२:२२