लुम्बिनीका मुख्यमन्त्री पोखरेलद्वारा लीलाराम न्यौपाने आकस्मिक कक्षको उद्घाटन

लुम्बिनीका मुख्यमन्त्री पोखरेलद्वारा लीलाराम न्यौपाने आकस्मिक कक्षको उद्घाटन

A+ A A-

लीलाराम–कुन्तीदेवी न्यौपाने प्रतिष्ठानद्वारा सिद्धार्थनगरस्थित भीम अस्पताल परिसरमा निर्मित लीलाराम न्यौपाने आकस्मिक कक्षको लुम्बिनी प्रदेशका मुख्यमन्त्री शङ्कर पोखरेलले उद्घाटन गरे । सो अवसरमा उनले उक्त भवनभित्र निर्मित समाजसेवी लीलाराम न्यौपानेको सालिक पनि अनावरण गरे ।

कार्यक्रममा पोखरेलले समाजसेवी लीलाराम न्यौपाने र उनका सुपुत्रहरूले गरेको पुनीत कार्यले समाज लाभान्वित हुने जनाउँदै धन हुनेहरूले न्यौपाने परिवारबाट प्रेरणा लिनुपर्ने बताए ।

प्रतिष्ठानद्वारा ३ करोड २५ लाख रुपैयाँको लागतमा निर्माण भएको उक्त भवनमा सम्पूर्ण उपकरण जडानसहितको २५ शय्या रहेको प्रतिष्ठानका अध्यक्ष शोभाकर (हरि) न्यौपानेले बताए ।

कार्यक्रममा प्रतिनिधिसभाका सदस्य एवम् विपक्षी दल नेपाली कांग्रेसका प्रमुख सचेतक एवम् पूर्वमन्त्री बालकृष्ण खाँण, पूर्वमन्त्री दीपक बोहोरा, लुम्बिनी प्रदेशसभाका सदस्यद्वय डा. कृष्ण न्यौपाने र सन्तोष पाण्डे, रूपन्देही जिल्ला समन्वय समितिका प्रमुख तथा भीम अस्पताल विकास समितिका अध्यक्ष एकराज विक, सिद्धार्थनगर नगरपालिकाका प्रमुख हरिप्रसाद अधिकारी, भीम अस्पतालका मेडिकल सुपरिन्टेन्डेन्ट डा. शकुन्तला गुप्ता र यादव भट्टराईलगायतले समाजसेवी लीलाराम न्यौपानेको योगदानको चर्चा गरे ।

कार्यक्रममा प्रतिष्ठानका अध्यक्ष शोभाकर (हरि) न्यौपानेले भीम अस्पताल विकास समितिका अध्यक्ष एकराज विकलाई नवनिर्मित आकस्मिक कक्ष (भवन) को साँचो हस्तान्तरण गरे ।

सो अवसरमा सिद्धार्थनगर नगरपालिकाका तर्फबाट प्रमुख हरिप्रसाद अधिकारीद्वारा समाजसेवी लीलाराम न्यौपानेकी धर्मपत्नी कुन्तीदेवी न्यौपानेलगायत सुपुत्रहरू शोभाकर (हरि), दुर्गा, विष्णु र शशि न्यौपानेलाई सम्मान गरिएको थियो । प्रतिष्ठानले समाजसेवा, शिक्षा, साहित्य, संस्कृति, धर्म, खेलकुदलगायतका क्षेत्रमा उल्लेखनीय योगदान गर्ने संस्था र प्रतिभालाई सम्मान, पुरस्कार र सहयोग प्रदान गर्दै आएको छ ।

प्रकाशित मिति: बुधबार, चैत २५, २०७७ १६:३२