बैंकबाट तीन महिनामा हराएकै हो साढे २४ अर्ब ? कहाँ गयो पैसा ?

A+ A A-

बैंकहरुले चैत मसान्तमा प्रकाशित गरेको वित्तीय विवरणले तीन महिनाको अवधिमा बैंकहरुबाट साढे २४ अर्ब रुपैयाँ हराएको देखियो । पुस मसान्तमा बैंकहरुमा २६ खर्ब ५५ अर्ब ४१ करोड रुपैयाँ निक्षेप रहेकोमा चैत मसान्तसम्म आइपुग्दा यो रकम घटेर २६ खर्ब ३० अर्ब ९२ करोड रुपैयाँमा सीमित भएको छ ।

बैंकहरुले प्रकाशित गरेको चालू आर्थिक वर्षको तेस्रो त्रैमासको वित्तीय विवरणले तीन महिनाको अवधिमा २४ अर्ब ४८ करोड रुपैयाँ निक्षेप घटेको देखाएको छ ।

कुन बैंकको कति घट्यो ?

यसरी निक्षेप घट्नेमा धेरै निक्षेप हुने बैंकहरु पनि परेका छन् । सबैभन्दा धेरै निक्षेप रहेको राष्ट्रिय वाणिज्य बैंकमा गत पुस मसान्तमा १ खर्ब ८१ अर्ब ५९ करोड रुपैयाँ निक्षेप थियो । तर, चैत मसान्तसम्म आइपुग्दा बैंकको निक्षेप घटेर १ खर्ब ७२ अर्ब ७९ करोड रुपैयाँमा सीमित भएको छ ।

एनआईसी एसिया बैंकको निक्षेप पनि पुस मसान्तको तुलनामा घटेको छ । पुस मसान्तमा १ खर्ब ७५ अर्ब ७६ करोड रुपैयाँ निक्षेप रहेको एनआईसी एसियामा गत चैत मसान्तमा १ खर्ब ५४ अर्ब १३ करोड रुपैयाँ निक्षेप देखियो ।

पुस मसान्तमा १ खर्ब ३० अर्ब ७१ करोड रुपैयाँ निक्षेप भएको नबिल बैंकमा गत चैत मसान्तमा १ खर्ब २८ अर्ब १९ करोड रुपैयाँ मात्रै देखियो । यस्तै, नेपाल इन्भेस्टमेन्ट बैंकको १ खर्ब २७ अर्ब ४१ करोड रुपैयाँ निक्षेप रहेकोमा चैत मसान्तमा १ खर्ब २४ अर्ब २ करोड रुपैयाँ मात्रै देखियो ।

अधिकांश बैंकको निक्षेप गत पुसको तुलनामा घटेको पाइयो । बैंकहरुमा पुस मसान्त र चैत मसान्तमा कति निक्षेप थियो भन्ने विवरण यहाँ क्लिक गरी हेर्न सकिन्छ ।

कहाँ हरायो पैसा ?

बैंकहरुको ब्यालेन्ससिटमा निक्षेप घटेको देखिए पनि खुद निक्षेप भने घटेको होइन । नेपाल राष्ट्र बैंकले नेपाल लेखामान (एनएफआरएस)अनुसार निक्षेप देखाउन निर्देशन दिएपछि घटेजस्तो देखिएको सानिमा बैंकका प्रमुख कार्यकारी अधिकृत भुवन दाहाल बताउँछन् ।

‘बैंकहरुको निक्षेप पुस मसान्तको तुलनामा चैत मसान्तमा घटेको होइन, पहिला बैंक तथा वित्तीय संस्थाले राखेको निक्षेपलाई पनि देखाउन पाइन्थ्यो, अब त्यसो नगरी व्यक्तिगत निक्षेप मात्रै देखाउनुपर्ने नियमकीय व्यवस्थाका कारण घटेजस्तो देखिएको मात्रै हो,’ प्रमुख कार्यकारी अधिकृत दाहालले शिलापत्रसँग भने ।

पुस मसान्तको जस्तै बैंकहरुले निक्षेप देखाएको भए चैत मसान्तमा उनीहरुसँग २७ खर्ब ३९ अर्ब २६ करोड रुपैयाँ निक्षेप रहेको देखिन्थ्यो । तर, यसमध्ये बैंकहरुसँग १ खर्ब ८ अर्ब ३४ करोड रुपैयाँ अर्काे बैंक तथा वित्तीय संस्थाको निक्षेप भएकोले बैंकहरुले सो रकम घटाएर २६ खर्ब ३० अर्ब ९२ करोड रुपैयाँ मात्रै देखाएका हुन् ।

प्रकाशित मिति: बिहीबार, जेठ २, २०७६ २१:३५