अजोड इन्स्योरेन्सले इन्साइडर ट्रेडिङ गरेकाे आरोपमा धितोपत्र बोर्डले छानबिन थाल्यो

अजोड इन्स्योरेन्सले इन्साइडर ट्रेडिङ गरेकाे आरोपमा धितोपत्र बोर्डले छानबिन थाल्यो

A+ A A-

अजोड इन्स्योरेन्समाथि लागेकाे इन्साइडर ट्रेडिङ (भित्री काराेबार) आराेपमा धिताेपत्र बाेर्डले अध्ययन उपसमिति बनाएर छानबिन थालेकाे छ । बाेर्ड सेयर बजारकाे नियामक हाे । अजोड इन्स्योरेन्समाथि हकप्रद शेयर निष्कासन गर्ने सूचना सार्वजनिक हुनुअघि नै सूचना चुहाएकाे आराेप छ । यसै कारण गत साेमबार हकप्रद सेयरको सूचना आउनु पहिला नै सेयर मूल्य १० प्रतिशतले बढेकाे कतिपय लगानीकर्ताकाे आशंका छ । त्यसकाे भाेलिपल्टै एक लगानीकर्ताले कम्पनीविरुद्ध प्रहरीमा उजुरीसमेत दिएका थिए ।

यही घटनाबारे अध्ययन गर्न बोर्डले आफ्ना एक निर्देशकको संयोजकत्वमा उपसमिति बनाएको हाे । बाेर्डले जारी गरेको विज्ञप्तिमा कम्पनीबाट कुनै भित्री कारोबार भएको पाइए नियमानुसार कारबाही गरिने उल्लेख छ ।

गत १६ चैतमा कम्पनीको सेयर मूल्य १० प्रतिशतले बढ्दा पनि शेयर किन्‍न चाहानेले नपाएपछि भित्री कारोबारको आशंका गरिएको थियो । कम्पनीले लगत्तै १७ चैतमा ५० प्रतिशत हकप्रद सेयर निष्कासन गर्ने सार्वजनिक सूचना निकालेपछि त्यस्ताे शंकाले बल पाएकाे हाे ।

के हाे इन्साइडर ट्रेडिङ ?

कम्पनी सञ्चालक समितिको निर्णय समयमा बाहिर नल्याउने तर त्यो सूचनाका आधारमा सूचनामा पहुँच भएकाहरूले बजारमा अस्वाभाविक कारोबार गरेर फाइदा लिने प्रवृत्तिलाई भित्री कारोबार अर्थात् इन्साइडर ट्रेडिङ भनिन्छ ।

यसमा पहुँच हुने लगानीकर्ताले कम्पनीको सार्वजनिक सूचना प्रकाशित हुनुअघि नै सूचना थाहा पाएर कम्पनीको शेयर कारोबार गर्छन् । यस प्रकारको कारोबार गर्न धितोपत्रसम्बन्धी ऐन/नियमले बन्देज गरेको छ । इन्साइडर ट्रेडिङमा कम्पनीका अध्यक्षसहित सञ्चालकहरू, प्रमुख कार्यकारी अधिकृत, प्रमुख लेखा अधिकृत तथा व्यवस्थापनको उच्च तहमा रहेका कर्मचारीहरू, लेखा परीक्षकलगायतको संलग्नता रहन सक्छ ।

अहिले लगानीकर्ताको आशंका इन्साइडर ट्रेडिङतर्फ मोडिनुको प्रमुख कारण पनि अजाेडले सार्वजनिक गरेकाे सूचना नै बनेको छ । यो सूचना अघिल्लाे दिन नै चुहावट हुँदा भाेलिपल्ट कारोबारमा चाप देखिएकाे शंका छ ।

प्रकाशित मिति: सोमबार, चैत २३, २०७७ १९:०६