मुख्यमन्त्रीविरुद्धको अविश्वास प्रस्ताव फिर्ता लिँदै इन्द्र आङबाेले भने- सम्बन्ध राम्रै थियाे, परिस्थिति नै त्यस्तै बन्यो

मुख्यमन्त्रीविरुद्धको अविश्वास प्रस्ताव फिर्ता लिँदै इन्द्र आङबाेले भने- सम्बन्ध राम्रै थियाे, परिस्थिति नै त्यस्तै बन्यो

A+ A A-

प्रदेश १ का मुख्यमन्त्री शेरधन राईविरुद्धको अविश्वास प्रस्ताव आज फिर्ता भएको छ । पारित गर्न मत नपुग्ने भएपछि प्रस्तावक माओवादी केन्द्र संसदीय दलका नेता इन्द्र आङबोले प्रस्ताव फिर्ता लिएका हुन् ।

मुख्यमन्त्री राईले अर्थमन्त्रीबाट हटाएका आङबाेले नेकपा छँदै ९ फागुनमा अविश्वास प्रस्ताव पेस गरेका थिए । तर, २३ फागुनमा सर्वाेच्च अदालतले नेकपा खारेज गर्दै एमाले र माओवादी पूर्ववत् अवस्थामा पुग्ने गरी फैसला सुनाएपछि प्रस्ताव अलपत्र परेकाे थियाे ।

प्रदेशसभा बैठकमा आङबाेले भिन्न राजनीतिक परिवेशमा राखिएको अविश्वास प्रस्ताव अहिलेको सन्दर्भमा औचित्यहीन हुन पुगेकाले फिर्ता लिएको बताए । ‘लगभग सरकार मृत्यु शय्यामा पुगिसकेको थियो, अदालतले सञ्जीवनी बुटी दिएको छ', उनले भने ।

असन्तुष्टिका बीच पनि आफूहरू सर्वाेच्चकाे फैसला स्वीकार्न तयार भएकाे उनकाे भनाइ छ । एमालेका सबै सांसदले हस्ताक्षर फिर्ता लिएपछि माओवादी केन्द्रसँग मात्र एक चौथाइ संख्या नपुगेकाले प्रस्ताव फिर्ता लिन सचिवालमा पत्र दिएकाे उनले बताए ।

उनले प्रधानमन्त्रीले चालेको असंवैधानिक कदमलाई मुख्यमन्त्री र आफ्नो पक्षले हेर्ने दृष्टिकोण फरक रहेकाे पनि बताए । 'व्यक्तिगत सम्बन्ध राम्रो हुँदाहुँदै पनि अविश्वासको प्रस्ताव राख्न बाध्य भइयाे', उनले भने, ‘भिन्न राजनीतिक परिवेशमा राखिएको अविश्वास प्रस्ताव अहिलेको सन्दर्भमा औचित्यहीन छ ।’

आङबाेलाई सभामुख प्रदीप भण्डारीले आफ्ना धारणासहित अविश्वास प्रस्ताव फिर्ता लिन प्रदेशसभा बैठकमा समय दिएका थिए । त्यसपछि समर्थकहरूका तर्फबाट सांसद राजेन्द्र राईले प्रस्ताव फिर्ता लिएको व्यहोरामा समर्थन जनाएका थिए । अविश्वास प्रस्ताव फिर्ता भएसँगै प्रदेश सरकार सुरक्षित बनेकाे छ ।

आजको बैठकमा नेपाली कांग्रेसका प्रमुख सचेतक केदार कार्की, जनता समाजवादी पार्टी संसदीय दलका नेता जयराम यादव र संयुक्त लोकतान्त्रीक राष्ट्रिय मञ्चका सांसद विष्णु तुम्बाहाम्फेले बाेले ।

संघको राजनीतिले प्रदेशसभालाई बन्धक बनायोः यादव

बैठकमा जसपा संसदीय दलका नेता जयराम यादवले कम्युनिस्ट पार्टीको झगडाले लामो समयसम्म प्रदेशसभा बन्धक बनेको टिप्पणी गरे । उनले प्रदेशको निर्णय प्रदेशमै गर्न सके मात्र संघीयताको आभास हुने बताए । 'संघीय राजनीतिको हस्तक्षेपमा प्रदेशसभालाई बन्धक बनाउन पाइँदैन’, उनले भने, ‘यहाँको निर्णय यहाँ नै गर्ने हो ।’

मन्त्रीहरू मुख्यमन्त्रीको हनिमुनमा ब्यस्त भएः कार्की

कांग्रेस प्रमुख सचेतक केदार कार्कीले जनताका काममा ब्यस्त हुनुपर्ने प्रदेश सरकारका मन्त्रीहरू मुख्यमन्त्री शेरधन राईको हनिमुनमा ब्यस्त बनेको आरोप लगाए । उनले भने, ‘जनताका काम छोडेर मुख्यमन्त्रीको हनिमुनमा सबै मन्त्री ब्यस्त हुने सरकारबारे के भनाैँ, कति भनौँ ? यतिबेला नेपाल आमाप्रति भएको पाप धुरीबाट कराइरहेको छ ।’

उनले थपे, ‘यो प्रदेशमा सरकार छैन, सरकार लाचार छ, कुर्सी नबच्ने देखेपछि मात्र मुख्यमन्त्री हराउनुभएको होला भनेको कुर्सी बच्दा पनि उहाँलाई यहाँ देखिएन । संसद् फेस गर्न नसक्ने, सांसदहरूको अनुहार फेस गर्न नसक्ने मुख्यमन्त्री भएको यो प्रदेशमा धेरै कुरा किन गरिरहने । जुँगा चल्यो, कुरा बुझियो ।’

प्रकाशित मिति: सोमबार, चैत २३, २०७७ १८:२१