मन्त्री बनेको १० दिनपछि टंक आङबुहाङको सांसद पद खोसियो

A+ A A-

नेकपा (एमाले) मा प्रवेश गरेर प्रदेश १ को आर्थिक मामिला तथा योजनामन्त्री बनेका मओवादी केन्द्रका प्रदेश सांसद टंक आङ्बुहाङले स्पष्टीकरणको जवाफ नदिएपछि उनलाई सो पार्टीले पदमुक्त गरेको छ । मन्त्री बनेको १० दिनपछि आङबुहाङको सांसद पद खोसिने भएको हो ।

माओवादी केन्द्रले पार्टीको हितविपरीत अर्कै पार्टीमा प्रवेश गरी मन्त्री बनेको र २४ घण्टे स्पष्टीकरणको जवाफसमेत नदिएको भन्दै आङ्बुहाङलाई सांसद पदबाट मुक्त गरेको सूचना प्रदेशसभा सचिवालयलाई गराएको हो ।

निर्वाचित दलको निर्णय र अनुमतिबिना अरु नै दलको मन्त्रिपरिषदमा सहभागी भएको भन्दै १६ चैतमा बसेको माओवादी केन्द्रको संसदीय दलको बैठकले आङ्बुहाङलाई २४ घण्टे स्पष्टीकरण सोध्ने निर्णय गरेको थियो । सोही निर्णय बमोजिम आङ्बुहाङलाई १७ चैतमा माओवादी केन्द्रका प्रमुख सचेतक झलकबहादुर मगरले २४ घण्टाभित्रमा स्पष्टीकरण पेश गर्न निर्देशन जारी गरेका थिए ।

तर, मन्त्री आङ्बुहाङले स्पष्टीकरणको जवाफ पेश नगरेकाले उनलाई आफ्नो पार्टीले सांसद पदबाट मुक्त गरेको सूचना प्रदेशसभा सचिवालयमा दर्ता गरिएको माओवादी केन्द्र संसदीय दलका नेता इन्द्रबहादुर आङ्बोले शिलापत्रलाई जानकारी दिए ।

‘उहाँले स्पष्टीकरणको जवाफ फर्काउनु भएन । सार्वजनिक रूपमा विभिन्न सञ्चार माध्याममा अर्कै पार्टीमा गइसकेको हो भनेकाले उहाँलाई पदमुक्त गरिएको हो,’ उनले शिलापत्रसँग भने, ‘उहाँलाई पार्टीले संसद पदबाट मुक्त गरेको सूचना प्रदेशसभा सचिवालयलाई दिएका छौँ ।’

मन्त्री आङ्बुहाङलाई प्रदेश– १ स्थित माओवादी केन्द्र संसदीय दलको बैठकको निर्णयअनुसार अध्यक्ष पुष्पकमल दाहाल 'प्रचण्ड'ले पार्टीको साधारण सदस्यसमेत नरहने गरी निष्कासन गरेका हुन् । ‘दल सम्बन्धी ऐन २०७३ को दफा ३१ र ३२ (१) ख प्रतिकुल हुनेगरी दल त्याग गरेको र तोकिएको समयमा स्पष्टीकरण नदिएको हुँदा केन्द्रीय कमिटीको प्रत्यायोजित अधिकार बमोजिम चैत २२ गतेको अध्यक्ष प्रचण्डको निर्णय बमोजिम प्रदेशसभा सचिवालयमा दल त्याग गरेको सुचना प्रदेशसभामा पेश गरेका छौँ,’ प्रदेशसभा सचिवालयमा गराइएको सूचनामा भनिएको छ ।

मन्त्री आङ्बुहाङ माओवादी केन्द्रको उम्मेदवार बनी ताप्लेजुङ ‘ख’ बाट निर्वाचित प्रदेशसभा सदस्य हुन् । उनी माओवादी केन्द्र संसदीय दलको नेतासमेत थिए । तर, आङ्बुहाङ नेकपा (एमाले) मा प्रवेश गरेर आर्थिक मामिला तथा योजनामन्त्री बनेपछि १६ चैतमा माओवादी केन्द्रले उनलाई संसदीय दलको नेताबाट हटाउँदै इन्द्र आङ्बोलाई संसदीय दलको नेता चयन गरेको थियो ।