नेप्से अहिलेसम्मकै सर्वाधिक उचाइमा,पुँजीकरण पनि एकैदिन बढ्यो ३६ अर्बले

A+ A A-

शेयरबजार परिसूचक नेप्सेले साताको पहिलो दिन नै अलटाइम हाईको रेकर्ड तोडेको छ । आइतबार नेप्से परिसूचक २५ दशमलव ७१ अंकले बढेर अहिलेसम्मकै अधिकतम २६५७ दशमलव ६१ अंकमा पुगेको हो ।

पछिल्लो केही दिन बजार उतारचढाव पूर्ण अवस्थामा रहे पनि आजबाट भने बजार बढ्ने आकलन गरिएको छ । यसअघि ९ फागुनमा २६४० अंकमा पुगेको नेप्से त्यसयता ओरालो लागेर २३ सय अंकमा पुगेको थियो ।

बजारले अलटाइहाई रेकर्ड तोडेसँगै लगानीकर्तामा पनि उत्साह थपिएको छ । आज मात्रै २ सय १२ कम्पनीको १ करोड ८१ लाख ७३ हजार ३ सय ७८ कित्ता शेयर ९ अर्ब ६८ करोड ५८ लाख ५ सय ५८ रुपैयाँको कारोबार भएको छ । नेप्से र कारोबार अंकसँगै बजार पुँजीकरण पनि एकै दिन ३६ अर्बले बढेर ३६ खर्ब ७१ करोड रुपैयाँमा पुगेको छ ।

यस दिन सेन्सेटिभ इण्डेक्स ४ दशमलव ३३ अंक बढेको छ । कारोबारमा आएका वित्त र निर्जीवन बीमा समूह र अन्य समूहको ३ प्रतिशतभन्दा धेरैले बढेको छ भने अरु ५ समूहको सूचक बढेको छ । आज घट्नेमा भने ५ कम्पनीहरू रहेका छन् ।

सात कम्पनी सर्किट लेबलमा

नेप्से र कारोबार दुवैमा उछाल आउँदा सर्किट लेबलमा पुग्ने कम्पनीहरू पनि बढेका छन् । आज एकै दिन सात कम्पनीको शेयर सकारात्मक सर्किट लेबलमा कारोबार भएको हो । कारोबारमा आएका वोमी माइक्रोफाइनान्स, जनरल इन्स्योरेन्स, राधी विद्युत् कम्पनी, आईएमई जनरल इन्स्योरेन्स, एनआईसी एशिया लघुवित्त, सानिमा जनरल इन्स्योरेन्स र साञ्जेन जलविद्युत्‌को शेयर सकारात्मक सर्किट लेबलमा कारोबार भएको हो। यस दिन साल्ट ट्रेडिङ कर्पोरेसनको शेयरमूल्य भने सर्वाधिक ४ दशमलव ६३ प्रतिशत घटेको छ । त्यसैगरी, सपोर्ट माइक्रोफाइनान्स र एनआईडीसीएलको शेयरमूल्य ४ प्रतिशतभन्दा बढीले घटेको छ ।

कारोबारमा निफ्रा अगाडि

आइतबार सबैभन्दा धेरै कारोबार नेपाल इन्फ्राइन्स्ट्रक्चर (निफ्रा) बैंकको भएको छ । सो बैंकको आज ४६ करोड ८१ लाख रुपैयाँबराबरको शेयर खरिदबिक्री भएको छ। त्यसैगरी, अपर तामाकोशी, नेपाल पुनर्बीमा कम्पनी, नबिल बैंक, प्रुडेन्सियल इस्न्योरेन्स, नेपाल बैंक र एनएलजी इन्स्योरेन्सको २० करोड रुपैयाँभन्दा बढीको शेयर कारोबार भएको छ ।

प्रकाशित मिति: आइतबार, चैत २२, २०७७ १६:३८