ओलीविरुद्ध प्रतिकारमा उत्रिन आह्वान गर्दै नेपाल समूहले निकाल्यो संयुक्त वक्तव्य [विज्ञप्तिसहित]

ओलीविरुद्ध प्रतिकारमा उत्रिन आह्वान गर्दै नेपाल समूहले निकाल्यो संयुक्त वक्तव्य [विज्ञप्तिसहित]

A+ A A-

नेकपा एमाले माधव नेपाल समूहले अध्यक्ष केपी ओलीले एकपछि अर्को स्वेच्छाचारी निर्णय गर्दै गएको भन्दै सम्पूर्ण नेता कार्यकर्तालाई उनको प्रतिकारमा उत्रिन आह्वान गरेको छ । नेता झलनाथ खनाल, माधवकुमार नेपाललगायत ११ जनाले संयुक्त विज्ञप्ति जारी गर्दै सो समूहले पार्टी अध्यक्ष ओलीविरुद्ध देशव्यापी प्रतिकारमा उत्रिने नेता कार्यकर्तालाई आह्वान गरेको हो । सो समूहले जारी गरेको विज्ञप्तिमा पार्टीभित्र विचार र संगठनको सम्बन्धमा छलफल र बहसको ढोका बन्द गरी एमालेलाई विभाजन गर्दै छिन्नभिन्न गर्ने प्रधानमन्त्रीको दुराशयकै निरन्तरता भएको उल्लेख गरेको छ ।

'पार्टीभित्र विचार र संगठनको सम्बन्धमा छलफल र बहसको ढोका बन्द गरी नेकपा (एमाले) लाई विभाजन गर्दै छिन्नभिन्न गर्ने दुराशयकै निरन्तरता हो । यस्तो पार्टी विधान, पद्धति र मान्यता विपरीतको कार्यको हामी भत्र्सना गर्दछौँ । केपी शर्मा ओलीबाट भएका उक्त प्रकारका देश, जनता र पार्टीको हित विपरीतका क्रियाकलापका विरुद्ध तथा पार्टीको क्रान्तिकारी सिद्धान्त र विचारको पक्षमा दृढतापूर्वक एकताबद्धरुपमा संगठित भई देशव्यापी रुपमा सक्रिय हुन हामी नेकपा (एमाले) का सम्पूर्ण इमान्दार देश, जनता र पार्टीको हितप्रति प्रतिबद्ध सम्पूर्ण नेता, कार्यकर्ता, सदस्यमा आव्हान गर्दछौँ' विज्ञप्तिमा भनिएको छ ।

प्रधानमन्त्रीको पद प्राप्त भएपछि ओलीबाट निरन्तर नेपाल र नेपाली जनताको हितमा आघात पुर्‍याउने, राष्ट्रिय स्वाधीनता, स्वतन्त्रता, अखण्डता र स्वाभिमानमा आँच पुर्‍याउने काम गरेको पनि सो समूहले आरोप लगाएको छ । त्यसो नगर्न सचेत गराउँदा नेपालको स्वाभिमानमा धक्का लाग्ने गरी वाह्य शक्तिसँग साठगाँठ गर्दै ओलीबाट देश, जनता र कम्युनिष्ट पार्टीलाई कमजोर तुल्याउने काम जारी रहेको सो समूहले आरोप छ ।

'प्रधानमन्त्रीको पद र शक्ति प्राप्त भएपछि केपी शर्मा ओलीबाट निरन्तर नेपाल र नेपाली जनताको हितमा आघात पुर्‍याउने, राष्ट्रिय स्वाधीनता, स्वतन्त्रता, अखण्डता र स्वाभिमानमा आँच पुर्‍याउने विभिन्न कामहरु भए । भ्रष्टाचार र अनियमित कार्यहरुको चाँङ्ग लाग्नथाल्यो । देश र जनताप्रतिको उत्तरदायित्व र सुशासनका सबै मान्यताहरु भत्किन थाले । त्यसो नगर्न पार्टीका बैठकहरुमा उहाँलाई पटक–पटक सचेत गराइयो' विज्ञप्तिमा भनिएको छ, 'तर, नेपालको स्वाभिमानमा धक्का लाग्ने गरी वाह्य शक्तिसँग साठगाँठ गर्दै केपी ओलीबाट देश, जनता र कम्युनिष्ट पार्टीलाई कमजोर तुल्याउने काम जारी रह्यो ।'