कोभिड खोपका लागि विश्‍व बैंकले नेपाललाई आठ अर्ब ७० करोड ऋण दिने

A+ A A-

विश्व बैंकले नेपाललाई आठ अर्ब ७० करोड रुपैयाँ सहुलियतपूर्ण ऋण उपलब्ध गराउने भएको छ ।

जनसंख्याको उच्च प्राथमिकता प्राप्त समूहमा कोभिड-१९ विरूद्ध सुरक्षित र प्रभावकारी खोपको पहुँच विस्तार गर्ने उद्देश्यअनुसार सहुलियत ऋण उपलब्ध गराउन थालेको विश्व बैंकले जनाएको छ ।

ऋण उपलब्ध गराउने विषयमा शुक्रबार नेपाल सरकारका प्रतिनिधि र विश्व बैं‌कका प्रतिनिधिबीच सम्झौता पत्रमा हस्ताक्षर भएको छ । सम्झौतामा अर्थ सचिव शिशिरकुमार ढुंगाना र माल्दिभ्स, नेपाल र श्रीलंकाका लागि विश्व बैंकका राष्ट्रिय निर्देशक फारिस हदाद-जर्भोसले हस्ताक्षर गरेका छन् ।

'कम्तिमा पनि ७२ प्रतिशत नेपाली जनसंख्यालाई खोप दिने सरकारको बृहत् योजनाका लागि अतिरिक्त वित्तीय सहयोगले महत्वपूर्ण र समय-सान्दर्भिक सहयोग पुर्‍याउने छ,' सम्झौतापछि सचिव ढुंगानाले भने, 'कोभिड-१९ महामारीको स्वास्थ्य सम्बन्धी प्रतिकार्यका लागि कोभिड-१९ विरूद्धका खोप खरिदका साथै नेपालको राष्ट्रिय खोप वितरण योजना अनुरूपको प्रभावकारी खोप सेवा विस्तार र नेपालको स्वास्थ्य प्रणालीको सुदृढीकरण गर्न यो अतिरिक्त वित्तीय सहयोग उपयोगी हुनेछ ।'

गत वर्ष चैतमा विश्व बैंकद्वारा स्वीकृत गरिएको २.९ करोड अमेरिकी डलर ( तीन अर्ब ३० करोड रुपैयाँ) बराबरको कोभिड-१९ आपतकालीन प्रतिकार्य र स्वास्थ्य प्रणाली तयारी आयोजनामै यो अतिरिक्त वित्त सहयोग प्राप्त भएको जनाएको छ ।

यो अतिरिक्त वित्त सहयोगको ९० प्रतिशत हिस्साले कोभिड-१९ विरूद्धका सुरक्षित र प्रभावकारी खोपको खरिद, आपूर्ति र वितरणलाई सघाउने उल्‍लेख गरिएको छ । 'कोभिड-१९ विरूद्धका सुरक्षित र प्रभावकारी खोपको समतामुलक र द्रूत पहुँच विस्तार गर्नु नेपालमा महामारीबाट जीवन रक्षा गर्न र उत्थानशील पुनर्लाभ प्राप्त गर्न निकै महत्वपूर्ण छ,' निर्देशक फारिस भने, 'विश्व बैंक नेपालमा जीवन रक्षा, सार्वजनिक स्वास्थ्य तयारी प्रणालीको सुदृढीकरण र नेपालको आर्थिक पुनर्लाभलाई उत्प्रेरित गर्न सरकारको महामारी प्रतिकार्यलाई सहयोग गर्न प्रतिबद्ध छ ।'

प्रकाशित मिति: शुक्रबार, चैत २०, २०७७ १७:१३