भन्सारको सुरक्षाः त्रिपालको बास

A+ A A-

कैलालीको टीकापुर नगरपालिका–९ खक्रौलास्थित सत्ती भन्सार कार्यालयको सुरक्षार्थ खटिएका सशस्त्र प्रहरीको सीमा अवलोकन युनिट (बीओपी)का सुरक्षाकर्मी त्रिपालमुनि बस्दै आएका छन् ।

पुस–माघको कठ्याङ्ग्रिने जाडो होस् वा चैत–वैशाखको टन्टलापुर घाम । उनीहरुको दिनचर्या त्रिपालमुनि नै बित्दै आएको छ । छोटी भन्सार कार्यालयबाट मूल भन्सारमा परिणत भएपछि त्यसको सुरक्षाका लागि सशस्त्र प्रहरी खटिएको हो ।

सो भन्सार कार्यालय गत साउनदेखि मूल भन्सारमा परिणत भएको थियो । त्यसको सुरक्षाका लागि गत २० कात्तिकदेखि सशस्त्र प्रहरी निरीक्षकको नेतृत्वमा ३५ सुरक्षाकर्मीकोे टोली खटिएको छ ।

भन्सार कार्यालयका लागि जग्गा अधिग्रहण गरेर सुविधा सम्पन्न भवन निर्माण गरिए पनि सुरक्षाका लागि खटिएको बीओपीको व्यवस्थापनका लागि भने कुनै व्यवस्था गरिएको छैन । जसका कारण, वैशाखको प्रचण्ड गर्मीमा पनि आँधीहुरीको सामना गर्दै उनीहरु त्रिपालमुनि बस्न बाध्य छन् । एकातर्फ कार्यालय प्रयोजनका लागि भवन निर्माण गरिएको छ भने अर्कोतर्फ गोदाम निर्माणका लागि जग्गा छुट्याइएको छ ।

बीओपीका सुरक्षाकर्मी गोदाम निर्माणका लागि छुट्याइएको जग्गामा त्रिपाल टाँगेर बसेका छन् । उनीहरु नेपाल रेडक्रस सोसाइटीले उपलब्ध गराएको सात थान त्रिपालमुनि बस्दै आएका छन् । सुरक्षाकर्मीका लागि उचित बस्ने बास पनि छैन भने शुद्ध खानेपानीको व्यवस्थासमेत छैन ।

सुरक्षाकर्मीको त्रिपालमुनिको बास निकै कष्टकर छ । गर्मीको समयमा बढ्दो तापक्रम र आउने हुरीबतासले कहाँ र कतिखेर ती त्रिपाल उडाउने ? थाहा छैन । केही महिनाअघिको हिउँदे झरीले त्रिपाल चुर्लुम्म डुबेको एक सुरक्षाकर्मीले बताए । उनले वर्षाको समयमा पानी जम्ने भएका कारण बस्न नसकिने भन्दै गर्मीको समयमा नदीको किनारा भएका कारण पनि अत्यधिक गर्मी हुन थालेको बताए ।

‘हाचो ठाउँमा त्रिपाल टाँगेर बसेका छौं,’ उनले भने, ‘बाढी आयो भने ज्यान नै जोगाउन गाह्रो हुने देखिन्छ ।’

‘कष्टकर अवस्थामा बसेर भए पनि सुरक्षाकर्मीले भन्सार सुरक्षा गर्दै आएको छ,’ धनगढीस्थित ३४ नम्बर गणका गणपति विष्णु भट्टले भने, ‘हाम्रा लागि जग्गा पनि छैन । भौतिक पूर्वाधार पनि छैन । सुरक्षाको थ्रेट बढेपछि सुरक्षाकर्मी परिचालन हुनै प-यो । अहिले घामपानी नभनेर पनि सुरक्षा गर्नुपर्ने बाध्यता छ ।’

बीओपीको बसोबासका लागि विभागसँग बजेट छुट्याउन माग गरेको भन्दै भौतिक पूर्वाधारको विकासका लागि ८ करोड ७१ लाख ५९ हजार ३२९ रुपैयाँ ६५ पैसाको लागत अनुमानित रकमको माग गरिएको उनले बताए ।