अन्तर्राष्ट्रिय जेम एन्ड ज्वेलरी एक्स्पो : प्रधानमन्त्रीले उद्घाटन गर्ने

A+ A A-

काठमाडौंमा ‘अन्तर्राष्ट्रिय जेम एन्ड ज्वेलरी एक्स्पो २०१९’ हुँदै छ । खानी तथा भूगर्भ विभाग र नेपाल सुनचाँदी रत्न तथा आभूषण महासंघको संयुक्त आयोजनामा ३ देखि ५ जेठसम्म एक्स्पो हुन लागेको हो ।

लैनचौरस्थित खानी तथा भूगर्भ विभागको परिसरमा हुने एक्स्पोको उद्घाटन प्रधानमन्त्री केपी शर्मा ओलीले गर्ने आयोजकले जनाएको छ । एक्स्पो उद्घाटन समारोहलाई अर्थमन्त्री डा. युवराज खतिवडा, उद्योग, वाणिज्य तथा आपूर्तिमन्त्री मातृका यादव, गभर्नर डा. चिरञ्जीवी नेपाल, उद्योग सचिव यमकुमारी खतिवडा, विभागका महानिर्देशक डा. सोमनाथ सापकोटा र भारतको जेम एण्ड ज्वेलरी एक्स्पोर्ट प्रमोसन काउन्सिलका अध्यक्ष प्रमोदकुमार अग्रवालले सम्बोधन गर्नेछन् ।

यस्तै, नेपाल उद्योग वाणिज्य महासंघका अध्यक्ष भवानी राणा, नेपाल उद्योग परिसंघका अध्यक्ष सतिशकुमार मोर र नेपाल चेम्बर अफ कमर्सका अध्यक्ष डा. राजेश काजी श्रेष्ठले पनि सम्बोधन गर्नेछन् । प्रधानमन्त्रीसहित मन्त्रीहरु तथा विभिन्न संघसंस्थाका प्रतिनिधिले एक्स्पोमा स्टलहरु अवलोकन गर्ने कार्यक्रम पनि छ ।

एक्स्पोमा गोल्ड, डायमन्ड ज्वेलरी ३६, लुज जेम्स ४, सिल्भर ज्वेलरी २, ल्यापिडरी (जेम कटिङ) २, रक एन्ड मिनिरल्स १२, एजुकेसन ४ गरी कूल ६० वटा स्टल रहनेछन् ।

आयोजकका अनुसार एक्स्पो उद्घाटनपछि विभागकोे अडियोटरियममा जेम एण्ड ज्वेलरीको प्रवर्धन, निर्यात विस्तार एवं आयात प्रतिस्थापनबारे गोष्ठी आयोजना गरिनेछ ।

यस्तै, ४ र ५ जेठमा नेपाली उद्यमी व्यवसायी र विभिन्न मुलुकबाट सहभागी प्रतिनिधिमण्डलबीच व्यापारिक तथा म्याच–मेकिङ बैठकहरु आयोजना गरिनेछ । साथै भारत स्थीत जीआईएले रत्न पत्थरसम्बन्धी दुईदिने सेमिनार पनि सञ्चालन गर्नेछ ।

प्रकाशित मिति: बिहीबार, जेठ २, २०७६ ०५:१३