ईश्वर पोखरेल भन्छन्, ‘नभए पार्टी दिशाहीन बन्नेछ’

A+ A A-

कार्यबाहक प्रधानमन्त्री एवं सत्तारुढ नेकपाका नेता ईश्वर पोखरेलले पार्टीको विचार र राजनीतिक कार्यदिशा स्पष्ट हुनुपर्ने बताएका छन् । युवा संघ नेपालको २९ औं वार्षिकोत्सवको अवसरमा बुधबार राजधानीमा आयोजित कार्यक्रममा उनले पार्टी वैचारिक रूपमा स्पष्ट हुनुपर्ने बताएका हुन् ।

कम्युनिस्ट पार्टी एकताबद्ध भएर ठूलो बने पनि विचारमा स्पष्ट हुन नसके पार्टीले निर्णायक जीत हासिल गर्न नसक्ने उनको तर्क छ । ‘संसारमा हामीले देख्यौं कम्युनिस्ट पार्टीहरु ठूलाठूला बने,’ उनले भने, ‘राज्यसत्ता कब्जा गरे, शासन संचालन गरे । तर, ती कम्युनिस्ट पार्टी तासका महल ढले जस्तो ढले । हाम्रो एकताबद्ध भएको कम्युनिस्ट पार्टी कुनै हालतमा त्यस्तो हुनुहुन्न । हामी सबैले यसमा खबरदारी गर्न जरुरी छ ।’

आर्थिक विकास र समृद्धिको कुरा गरिरहँदा ठोस नीति, कार्यक्रम, योजना र आचरण स्पष्ट हुनुपर्नेमा उनले जोड दिए । राजनीतिक कार्यदिशाले सम्बोधन गर्ने विषय सार्थक ढंगले आउन नसके पार्टी एकढिक्का भए पनि दिशाहीन अवस्थामा पुग्ने उनको तर्क छ ।

उनले भने, ‘हाम्रो पोलिटिक्स अब आर्थिक विकास र समृद्धिमा कसरी केन्द्रित हुने हो ? यसबारे छलफल हुनुपर्छ । यो छलफल भएर हामी ठिक ढंगले निष्कर्षमा पुग्न सकेनौं भने वास्तवमा हामी न हाँसको चाल न कुखुराको चाल हुन पुग्छ । त्यो दुर्भाग्यपूर्ण स्थिति आउन दिन हुँदैन ।’

विचारमा स्पष्ट हुन नसके सिंगो पार्टी नै अलमलमा पर्ने र अन्ततः कम्युनिस्ट पार्टीले नै दुरगति भोग्नुपर्ने भन्दै उनले त्यसतर्फ सधैं चनाखो हुनुपर्ने आवश्यकता औँल्याए ।

पोखरलले भने, ‘हाम्रो राजनीतिक कार्यदिशासँग गाँसिएका कुरामा हाम्रो स्पष्टताको जरुरी छ । विचारको मामिलामा हामी स्पष्टताका साथ अगाडि बढ्नुपर्छ । राजनीतिक कार्यदिशाका सन्र्दभमा पनि स्पष्टता हासिल गरेनौं भने हामी अलमलमा पर्छौं । अलमलमा परेको कम्युनिस्ट पार्टीले दुरगति भोग्नुबाहेक अर्को उपलब्धि हुन सक्दैन । र, हामी दुरगतिलाई स्वीकार गर्न सक्दैनौं ।’

उनले विगतको अभ्यासभन्दा फरक अभ्यास र प्रणालीबाट अघि बढ्नुपर्ने भएकाले संगठनात्मक सदृढताको खाँचो औंल्याए । ‘श्रृंखलाबद्ध कमिटी प्रणाली नहुने हो भने कम्युनिस्टहरु भीडमा शक्ति प्राप्त गर्न सक्दैनन् । संगठनमा मात्रै शक्ति प्राप्त गर्छन् । र, यो संगठन भनेको शृंखलाबद्ध कमिटी प्रणालीमा प्रकट हुन्छ । प्रकट हुनुपर्दछ ।’ (नान)

प्रकाशित मिति: बिहीबार, जेठ २, २०७६ ०४:५२