कस्तो लापरबाही ? अनुसन्धान ल्याबका उपकरणमा माकुराको जालो

A+ A A-

लाखौं रुपैयाँ खर्च गरेर सञ्चालनमा ल्याइएको विराटनगर महानगरपालिकाको खाद्य अनुसन्धान ल्याब उपयोगविहीन बनेको छ । विराटनगर महानगरपालिकामा खाद्य अनुसन्धान शाखा रहे पनि कर्मचारी अभाव हुँदा ल्याब लथालिंग बनेको हो ।

महानगरको बेवास्ताका कारण खाद्य परीक्षणका उपकरण यतिबेला धुलो र माकुराको जालोले जेलिएका छन् ।

तत्कालीन विराटनगर उपमहानगरपालिकाले बजारको खाद्य वस्तु अनुगमन र गुणस्तरीयता परीक्षणका लागि ल्याब स्थापना गरेको थियो । तर, अहिले जनप्रतिनिधिहरु निर्वाचित भएर आइसकेको अवस्थामा पनि सो ल्याब नाम मात्रको बनेको छ ।

खाद्य अनुसन्धान शाखाभित्रको ल्याबमा खाद्य वस्तु परीक्षणका लागि आवश्यक विभिन्न उपकरण रहे पनि त्यसको सदुपयोग हुन सकेको छैन । महानगरपालिकाले ल्याब सञ्चालनका लागि ध्यान नदिँदा त्यहाँ रहेका लाखौं रुपैयाँ मूल्यका उपकरण कवाडीमा परिणत हुने खतरा बढेको छ ।

बजारमा दिनहुँजसो अखाद्य वस्तु बिक्री वितरण भइरहेको नगरवासीको गुनासो आइरहे पनि ल्याबमार्फत खाद्य वस्तु परीक्षणमा महानगरको ध्यान गएको छैन ।

हाल ल्याबमा रहेका विभिन्न परीक्षण उपकरण धुलो र माकुराको जालाले जेलिएका छन् । त्यति मात्र होइन, दराजमा राखिएका उपकरणसमेत अब कवाडी सामानका रुपमा परिणत हुन लागेका छन् । अहिले खाद्य अनुसन्धान शाखामा एक जना पनि कर्मचारी छैनन् । सो शाखामा प्राविधिकका रुपमा काम गर्दै आएका धीरज राईलाई प्रमुख प्रशासकीय अधिकृतको स्वकीय सचिव बनाइएपछि ल्याब अझै लथालिंग बनेको छ ।

उनै राईले बेलाबेलामा उक्त शाखा हेर्ने गरेको महानगरपालिकाले जनाएको छ । खाद्य अनुसन्धान शाखाका कर्मचारी राईले कर्मचारी अभावमा आफूले मात्रै नभई अन्य कर्मचारीले समेत थुपै्र शाखाका काम गरिरहनुपरेको बताए ।

उनले भने, ‘यहाँ कर्मचारी अभाव छ । एउटा कर्मचारीले थुप्रै शाखा हेर्नुपर्ने बाध्यता छ त्यसैले मलाई पनि अन्य जिम्मेवारी निर्वाह गर्न लगाइएको हो । बेलाबेलामा ल्याब पनि हेर्छु । मुख्य कुरा अधिकृत लेभलको टेक्निकल कर्मचारी अभावले यो समस्या भएको हो ।’

यता, विराटनगर महानगरपालिकाले ल्याब सञ्चालनको तयारी भइरहेको दाबी गरेको छ । विराटनगर महानगरपालिकाका प्रवक्ता राजेन्द्र प्रधानले महानगरको ल्याब सञ्चालनमा नरहे पनि नापतौल तथा गुण नियन्त्रण कार्यालयले व्यापार संघको समन्वयमा खाद्य वस्तुको परीक्षण र अनुगमन गरिरहेको दाबी गरे । उनले स्थानीय सरकार गठन भएपछि हालसम्म कर्मचारी समायोजन भएर आउनेक्रम जारी नै रहेकाले विस्तारै ल्याबलाई व्यवस्थित गरिने बताए ।

उनले भने, ‘यहाँको ल्याब सञ्चालनमा छैन भन्दैमा बजारको खाद्य वस्तु परीक्षण तथा अनुगमन नभएको होइन । हामीले विभिन्न निकायको सहकार्यमा यो काम गरिरहेका छौं । अब जनप्रतिनिधि पनि निर्वाचित भएर आइसकेको अवस्थामा आगामी नगरपरिषदबाट यो ल्याबको नीति बनाएर सञ्चालनमा ल्याउने महानगरको योजना छ ।’

उपभोक्ता अधिकारकर्मीले भने विराटनगर बजारमा अखाद्य र मिसावटयुक्त खाद्य वस्तुहरु बिक्री वितरण भइरहेका बेला ल्याबको सदुपयोग हुन नसक्नु दुःखद भएको नगरवासी बताउँछन् ।

उपभोक्ता अधिकारकर्मी उत्तम ढुंगेलले लाखौं रुपैयाँ खर्च गरेर स्थापना गरिएको ल्याब जनप्रतिनिधि रहँदाको अवस्थामा पनि सञ्चालन नहुनु विराटनगरवासीका लागि दुःखद विषय भएको बताए ।

उनले भने, ‘बजारमा छ्यापछ्याप्ती रुपमा अखाद्य र मिसावटयुक्त वस्तु बिक्री वितरण भइरहेको छ । लाखौं रुपैयाँ खर्च गरेर सञ्चालनमा ल्याइएको ल्याब बन्द हुनु सिंगो महानगरवासीका लागि दुःखद विषय हो ।’

सो ल्याबलाई खाद्य वस्तु परीक्षणयोग्य बनाएर सञ्चालनमा ल्याइए जुनसुकै समयमा पनि खाद्य वस्तु परीक्षण गर्न सकिने सरोकारवाला बताउँछन् । उनीहरुले ल्याब सञ्चालनमा आए खाद्य वस्तु परीक्षणका लागि महानगरले अरुको मुख ताक्नु नपर्ने बताए ।

प्रकाशित मिति: बिहीबार, जेठ २, २०७६ ०३:४१