६६२ पुग्यो महिला लघुवित्त वित्तीयको शेयरमूल्य, ५ कम्पनी सर्किट लेबलमा

A+ A A-

बुधबार शेयरबजार हरियाली बन्दा सबैभन्दा धेरै फाइदा महिला लघुवित्त वित्तीय संस्थालाई भएको छ । आज यस कम्पनीको शेयर मूल्य ६० रुपैयाँले बढेर ६ सय ६२ रुपैयाँ पुगेको हो । सो कम्पनी ९ दशमलव ९७ प्रतिशतले बढेर सकारात्मक सर्किटनजिक पुगेको हो । महिला लघुवित्त वित्तीयसँगै अन्य ४ कम्पनीको शेयरमूल्य पनि ९ प्रतिशतभन्दा बढीले बढेको छ ।

बुधबार नेप्सेको परिसूचक ४३ दशमलव ३६ प्रतिशतले बढेर २ हजार ६ सय १९ दशमलव ०२ अंकमा बन्द हुँदा २ सय ९ कम्पनीमध्ये १ सय ११ कम्पनीले शेयरमूल्य बढाएर नाफा कमाएका हुन् । कारोबारमा आएका कम्पनीमध्ये कुल १ करोड १२ लाख ८१ हजार ६ सय २५ कित्ता शेयर ६ अर्ब १६ करोड ६८ लाख ६१ हजार ५ सय ३८ रुपैयाँमा कारोबार भएको छ ।

यस दिन व्यापारबाहेक सबै समूह बढेका छन् । व्यापार समूह २ दशमलव २७ प्रतिशतले घटेको हो । यस दिन बैंकिङ समूह २ दशमलव ३१ प्रतिशत, होटल तथा पर्यटन १ दशमलव ७६, विकास बैंक १ दशमलव ६८, जलविद्युत् १ दशमलव ३९, फाइनान्स ० दशमलव ८, निर्जीवन बीमा २ दशमलव ६२, उत्पादन तथा प्रशोधन ० दशमलव ५८, अन्य १ दशमलव ३३, माइक्रोफाइनान्स ० दशमलव ५७, जीवनबीमा ० दशमलव ९८, म्युचुअल फन्ड ० दशमलव ८९ र लगानी समूह १ दशमलव ७२ प्रतिशतले बढेका छन् ।

९ प्रतिशतभन्दा बढीले शेयरमूल्य बढेको अजोडको प्रतिकित्ता शेयरमूल्य ९३८, ओमीको १ हजार २ सय ४७ र सानिमा जनरलको ७ सय ७६ रुपैयाँ कायम भएको छ । आज शेयरमूल्य घट्ने ४९ कम्पनीमध्ये सबैभन्दा धेरै ३ दशमलव २९ प्रतिशतले रैराङ हाइड्रोपावरको घटेको छ । त्यस्तै, बोटलर्स नेपाल र युनाइटेड इदी मर्दीको मूल्य ३ प्रतिशतभन्दा धेरैले घट्यो ।

कारोबारका आधारमा यस दिन जलविद्युत् लगानी तथा विकास कम्पनी अग्रस्थानमा रह्यो । सो कम्पनीको ३६ करोड रुपैयाँ बराबरको कारोबार भयो । आजको कारोबारपछि कम्पनीको मूल्य प्रतिकित्ता ४ सय ७० रुपैयाँ कायम भयो । योसँगै माथिल्लो तामाकोसी, नेपाल इन्फ्रास्ट्रक्चर र नबिल बैंक कारोबारमा क्रमशः अगाडि रहे ।