४ सय रुपैयाँभन्दा कम मूल्यमा पाइन्छ १० वाणिज्य बैंकको शेयर, किन्दा कति फाइदा ?

४ सय रुपैयाँभन्दा कम मूल्यमा पाइन्छ १० वाणिज्य बैंकको शेयर, किन्दा कति फाइदा ?

A+ A A-

शेयरबजारमा दिनदिनै नेप्सेले नयाँ रेकर्ड कायम गरिरहेको छ । पुँजीबजारमा ठूलो संख्यामा आईपीओ भित्रिइरहँदा लगानीकर्ता पनि बढिरहेका छन्, जसले गर्दा सामान्य लगानीकर्ताको भीड प्राथमिक बजारमा मात्र नभएर दोस्रो बजारमा पनि उल्लेख्य देखिन्छ ।

यही हुलमुलमा सामान्य कम्पनीहरूको पनि शेयरमूल्य उचालिरहेका बेला केही यस्ता कम्पनीहरू अझै पनि छन्, जुन अझै तपाईंले दोस्रो बजारमा अण्डरभ्यालुड मूल्यमा नै शेयर किन्न सक्नुहुन्छ । आज हामी कुरा गरिरहेका छौँ– लामो समयदेखि कम शेयरमूल्य भएका तर लगानीकर्ताले राम्रो लाभांश पाउन सक्ने कम्पनीहरूका बारेमा । जसको शेयरमूल्य अहिले पनि न्यूनतम अवस्थामा नै छ । अर्थात् अझै पनि ४ सय रुपैयाँभन्दा कम छ ।

खासगरी कति मूल्यलाई अण्डरभ्यालुड भन्ने यकिन नभएर पनि ४ सय रुपैयाँभन्दा कम मूल्य रहेका वाणिज्य बैंकहरूको शेयरमूल्यलाई आधार मानेर यो रिपोर्ट तयार पारिएको छ । यसरी अण्डरभ्यालुड हुनेमा १० वटा वाणिज्य बैंक जसको नाफा र लाभांश दुवै राम्रो छ, तर पनि दोस्रो बजारमा मूल्य बढ्न सकेको छैन ।

४ सय रुपैयाँभन्दा कम शेयरमूल्य भएका वाणिज्य बैंकहरू:

सिभिल बैंक

सबैभन्दा सस्तो मूल्यमै शेयर पाइने वाणिज्य बैंकहरूमध्ये अग्रस्थानमा पर्छ सिभिल बैंक । सिभिल बैंकको शेयरमूल्य आज पनि २ सय ३१ रुपैयाँ प्रतिकित्तामा बिक्रीवितरण भइरहेको छ । लगानीकर्तालाई पनि लाभांश राम्रै दिइरहेको यो बैंकले गत आर्थिक वर्ष (आव)मा पनि ० दशमलव ४२ प्रतिशत नगद लाभांश र ८ प्रतिशत बोनस शेयर गरी ८ दशमलव ४२ प्रतिशत लाभांश दिएको थियो ।

चालु आव २०७७/७८ को पुस महिनासम्मको बैंकको वित्तीय विवरण हेर्ने हो भने बैंकको प्रतिशेयर आम्दानी ४ रुपैयाँ ६९ पैसा छ । चुक्ता पुँजी भने ८ अर्ब छ । कोभिडको प्रभाव यस वर्ष बैंकमा पनि परेको छ । जसले गर्दा वितरणयोग्य नाफामा यस पटक कमी आएको छ । बैंकको वितरणयोग्य नाफामा १० करोड रुपैयाँ देखिन्छ भने खुद नाफा २० करोड रुपैयाँ छ ।

सेञ्चुरी बैंक

सेञ्चुरी बैंक पनि शेयरमूल्य थोरै हुने बैंकमा पर्छ । यो बैंकको शेयरमूल्य प्रतिकित्ता २ सय ४५ रुपैयाँ छ । बैंकले गत आवमा आफ्ना लगानीकर्तालाई २ दशमलव २५ प्रतिशत नगद लाभांश र ५ दशमलव २५ प्रतिशत बोनस शेयर गरी कुल ७ दशमलव ५ प्रतिशत लाभांश घोषणा दिएको थियो । बैंकले नाफा पनि चालु आवको पुस मसान्तसम्म ० दशमलव ४७ अर्ब रुपैयाँ कमाएको छ । त्यस्तै, वितरणयोग्य मुनाफा पनि १० अर्ब रुपैयाँ छ । प्रतिशेयर आय भने १० रुपैयाँ ३३ पैसा छ ।

लक्ष्मी बैंक

लक्ष्मी बैंकको शेयरमूल्य मात्र २ सय ८८ रुपैयाँ छ । यसअघि सो बैंकको मूल्य उचालिएर ३ सय ३१ रुपैयाँसम्म पुगेको थियो । गत आवमा आफ्ना लगानीकर्तालाई २ दशमलव ५ प्रतिशत नगद लाभांश र ९ प्रतिशत बोनस शेयर दिने प्रस्ताव गरेको बैंकले कुल लाभांश ११ दशमलव ५ प्रतिशत दिएको थियो । त्यस्तै, बैंकको प्रतिशेयर आम्दानी पनि १५ रुपैयाँ ९ पैसा छ । वितरणयोग्य मुनाफा २५ करोड रुपैयाँ छ । बैंकको नेप्सेमा १० करोड ६९ लाख ५६ हजार ८ सय ९६ कित्ता शेयर सूचीकृत छ ।

बैंक अफ काठमाण्डू

वाणिज्य बैंकहरूको प्रस्पिर्धामा बैंक अफ काठमाण्डू आक्रामक रूपमा प्रस्तुत भएको देखिन्छ । नाफाका हिसाबले होस् या लाभांशका हिसाबले सो बैंकको अवस्था राम्रै छ । तर पनि शेयरमूल्य अझै न्यूनतम विन्दुमै छ । अहिले यसको शेयरमूल्य प्रतिकित्ता २ सय ९९ रुपैयाँ छ भने पछिल्लो ५२ हप्तामा ३ सय ४४ रुपैयाँसम्म पुगेको थियो ।

बैंक अफ काठमाण्डूको वित्तीय अवस्था हेर्ने हो भने लगानीयोग्य कम्पनीको रूपमा यो बैंकलाई लिन सकिन्छ । तर पनि शेयरमूल्यमा भने अझै वृद्धि हुन सकेको छैन । यो बैंकको प्रतिशेयर आम्दानी १४ रुपैयाँ ६७ पैसा छ भने गत चालु आर्थिक वर्षको पुस मसान्तसम्मको नाफा पनि ७१ करोड र वितरणयोग्य नाफा ३९ करोड छ । बैंकले गत आवको कारोबारबाट लगानीकर्तालाई ३ प्रतिशत नगद र १३ प्रतिशत बोनस गरेर कुल १६ प्रतिशत लाभांश वितरण गरिसकेको छ ।

कुमारी बैंक

कुमारी बैंकको पनि शेयरमूल्य ३ सय रुपैयाँमा नै सीमित भएको छ । यो समाचार तयार पार्दासम्म बैंकको शेयरमूल्य प्रतिकित्ता ३ सय ५ रुपैयाँ छ । गत आवमा ३ दशमलव १५ प्रतिशत नगद लाभांश र १० दशमलव ८५ प्रतिशत बोनस गरेर कुल १४ प्रतिशत लाभांश दिएको छ ।

लाभांशको हिसाबमा बैंक लगानीयोग्य भए पनि शेयरमूल्य भने अझै बढ्न सकेको छैन । बैंकको चालु आवको पुससम्मको तथ्यांकअनुसार बैंकको प्रतिशेयर आय १७ रुपैयाँ १३ पैसा छ भने नाफा १ अर्ब २२ करोड छ । बैंकको वितरणयोग्य नाफा भने ६४ करोड रुपैयाँ छ ।

माछापुच्छ्रे बैंक

माछापुच्छ्रे बैंकको शेयरमूल्य अहिले ३ सय २ रुपैयाँ छ । ३ दशमलव ३७ प्रतिशत नगद र ७ दशमलव ०३ प्रतिशत बोनस शेयर लाभांश वितरण गरेको यस बैंकको विगत हेर्ने हो भने शेयरमूल्य अधिकतम ३ सय ५२ रुपैयाँ मात्रै छ । नाफा पनि ८० करोड रुपैयाँ र वितरणयोग्य नाफा ४५ करोड रुपैयाँ छ । प्रतिशेयर आम्दानी पनि १७ रुपैयाँ ७३ पैसा छ ।

मेगा बैंक

मेगा बैंकको हाल प्रतिकित्ता शेयरमूल्य ३ सय ६ रुपैयाँ छ । गत आर्थिक वर्षमा बैंकले लगानीकर्तालाई ३ दशमलव ५ प्रतिशत नगद लाभांश र १० प्रतिशत बोनस शेयर गरेर कुल १३ दशमलव ५ प्रतिशत लाभांश दिने घोषणा गरेको थियो । चालु आवको पुससम्ममा बैंकको वितरणयोग्य नाफा ६८ करोड र खुद नाफा १ अर्ब ३० करोड छ ।

नेपाल बंगलादेश बैंक

९ अर्ब चुक्ता पुँजी रहेको नेपाल बंगलादेशको शेयरमूल्य पनि खासै उचालिन सकेको छैन । अहिले पनि यो बैंकको शेयरमूल्य ३ सय ७२ रुपैयाँ प्रतिकित्ता छ । लाभांश बर्सेनि ८ प्रतिशतले वितरण गर्दै आएको यस बैंकले गत आवमा पनि आफ्ना लगानीकर्तालाई नगद लाभांश २ दशमलव ४२ प्रतिशत र बोनस शेयर ६ प्रतिशत गरी कुल ८ दशमलव ४२ प्रतिशत लाभांश दिएको थियो ।

बैंकले पुस मसान्तसम्म कुल ४६ करोड रुपैयाँ ९४ लाख कमाएको छ भने वितरणयोग्य नाफा पनि ४६ करोड रुपैयाँ छ ।

सानिमा बैंक

९ अर्ब ६८ करोड चुक्ता पुँजी रहेको सानिमा बैंकको शेयर अहिले पनि दोस्रो बजारमा ३ सय ७६ रुपैयाँ प्रतिकित्तामा किन्न पाइन्छ । पुस मसान्तसम्म वितरणयोग्य नाफा ८९ करोड र खुद नाफा १ अर्ब ६ करोड रुपैयाँ छ । बैंकले लगानीकर्तालाई लाभांश पनि राम्रो दिइरहेको छ । गत आवमा मात्रै ३ दशमलव ६ प्रतिशत नगद लाभांश र १० प्रतिशत बोनस शेयर गरी कुल १३ दशमलव ६ प्रतिशत लाभांश वितरण गरेको छ ।

सनराइज बैंक

सनराइज बैंकको शेयरमूल्य पनि ३ सय १६ रुपैयाँ प्रतिकित्ता छ । कुल चुक्ता पुँजी ८ अर्ब ४९ करोड रुपैयाँ भएको सो बैंकको पुस मसान्तसम्म खुद नाफा ९५ करोड र वितरणयोग्य नाफा ४६ करोड रुपैयाँ छ । बैंकले लाभांश पनि गत आवमा २ दशमलव ८४ प्रतिशत र ५ दशमलव ८ प्रतिशत बोनस शेयर गरी कुल ८ दशमलव २८ प्रतिशत दिएको थियो ।

के भन्छन् शेयरबजार जानकार ?

माथि उल्लेख गरिएका वाणिज्य बैंकहरूको शेयरमूल्य बढ्न नसक्नुमा विज्ञहरूको आ–आफ्नै तर्क छ । शेयरबजार अध्येता तथा लगानीकर्ता दिलीप मुनकर्मी अन्य कम्पनीको जस्तो वाणिज्य बैंकको शेयरमूल्य बढ्न नसक्नुमा संस्थागत लगानीकर्ता कम हुनु नै मुख्य कारण रहेको बताउँछन् । उनी सूचीकृत अन्य कम्पनीहरूको मूल्य आम्दानी अनुपात, प्रतिशेयर आय, लाभांशजस्ता लगानी र प्रतिफलका आधारभूत पाटो केलाउँदा वाणिज्य बैंकका शेयरमा लगानी गर्नु कम जोखिम रहेको बताउँछन् ।

उनी भन्छन्, ‘बैंक तथा वित्तीय संस्थामा लगानी गर्ने लगानीकर्ता आमसर्वसाधारण र बीमा कम्पनी मात्रै हुन्छन् । अरु कम्पनीमा जसरी बैंकले लगानी गरे पनि स्वयम् बैंकमा बैंकको लगानी हुँदैन । सबैभन्दा धेरै लगानी गर्ने बैंकहरू नै हुन् । यही कारणले पनि माग कम हुन्छ ।’ उनले माग र आपूर्ति व्यवस्थित हुन नसक्दा शेयरमूल्य पनि बढ्न नसकेको उनको भनाइ छ । प्रतिफल र लगानीको जोखिमका आधारमा भने बैंकहरू लगानीयोग्य नै रहेको उनले बताए ।

यता इन्भेस्टर फोरमका अध्यक्ष तथा लगानीकर्ता छोटेलाल रौनियार भने बैंकहरूमा छोटो समयमा नाफा बुक गर्न नसक्ने भएर माग घट्दा शेयरमूल्य बढ्न नसकेको बताउँछन् ।

उनी भन्छन्, ‘बैंकमा लङटर्म प्रोफिट बुक गर्ने लगानीकर्ताहरूका लागि उपयुक्त हुन्छ । त्यसैले दोस्रो बजारमा खासै माग हुँदैन । लघुवित्तलगायतका अन्य कम्पनीहरूमा लगानी गरेको छोटो समयमा नै नाफा कमाएर बजारबाट बाहिरिने लगानीकर्ता बढी हुन्छन् । यसले गर्दा माग र आपूर्ति दुवै बढ्ने गर्छन् । यसरी बजार चलायमान हुँदा शेयरमूल्य पनि बढ्छ तर वाणिज्य बैंकमा शेयरसंख्या धेरै छ, माग थोरै छ । त्यसैले पनि मूल्य बढ्न नसकेको हो ।’

अध्यक्ष रौनियार पनि चलखेल नगर्ने र लामो समयसम्मका लागि लगानी गर्ने लगानीकर्तालाई यी वाणिज्य बैंकहरूको शेयर किन्न उपयुक्त हुने बताउँछन् ।

प्रकाशित मिति: बिहीबार, चैत १९, २०७७ १५:५६