राष्ट्रपति र प्रधानमन्त्रीको सन्देश लिएर संस्कृतिविद् जोशीको निवासमा शिक्षामन्त्री श्रेष्ठ

राष्ट्रपति र प्रधानमन्त्रीको सन्देश लिएर संस्कृतिविद् जोशीको निवासमा शिक्षामन्त्री श्रेष्ठ

A+ A A-

सरकारले संस्कृतिविद् सत्यमोहन जोशीको नाममा विद्यालय स्थापना गर्ने भएको छ । राष्ट्रपति विद्यादेवी भण्डारीले नेपालको जीवित इतिहास बाेकेका संस्कृतिविद् जोशीको नाममा विद्यालय स्थापना गर्ने चाहना व्यक्त गरेपछि सो सन्देश दिन शिक्षा, विज्ञान तथा प्रविधिमन्त्री कृष्णगोपाल श्रेष्ठ जोशी निवास पुगेका थिए ।

मन्त्री श्रेष्ठले संस्कृतिविद् जोशीको नाममा सामुदायिक विद्यालय खोल्ने तयारी थाल्न र उनले चाहेकै स्थानमा विद्यालय स्थापना गर्न सरकारले पहल गर्ने बताए । ‘राष्ट्रपतिज्यूले संस्कृतिविद् जोशीको स्वास्थ्य अवस्थाबारे जानकारी लिन र उहाँको नाममा विद्यालय स्थापना गर्ने चाहना व्यक्त गरेपछि राष्ट्रपतिको सन्देश लिएर म यहाँ आएको हुँ', जोशी निवासमा आयोजित कार्यक्रममा मन्त्री श्रेष्ठले भने ।

जाेशीकाे नाममा खुल्ने विद्यालय नेपालकै नमुनाको हुने उनले दाबी गरे । ललितपुर महानगरपालिकाका मेयर चिरिबाबु महर्जन र एमाले ललितपुर पार्टी अध्यक्ष हरिकृष्ण व्यञ्जनकारसहित जोशी निवास पुगेका मन्त्री श्रेष्ठले उनकाे स्वास्थ्य अवस्थाबारे जानकारी लिए ।

मन्त्री श्रेष्ठले प्रधानमन्त्री केपी शर्मा ओलीले समेत जोशीको स्वास्थ्य अवस्थाबारे जानकारी लिन आग्रह गरेका बताए । मन्त्री श्रेष्ठसहितको टोलीलाई स्वागत गर्दै १ सय १ वर्षीय जोशीले आफू स्वस्थ रहेकाे प्रतिक्रिया दिए । राष्ट्रपति विद्यादेवी भण्डारी र प्रधानमन्त्री केपी ओलीको सन्देश लिएर आफ्नो निवासमा मन्त्री आएकाेमा गर्व महसुस भएको प्रतिक्रिया दिँदै संस्कृतिविद् जोशीले भने, 'सरकारले मेरो नाममा विद्यालय खोल्ने तयारी गर्नु समस्त संस्कृतिविद्, इतिहासविद् र साहित्यकारको सम्मान हाे ।'

आगामी ३० वैशाखदेखि १ सय २ वर्ष वर्ष पूरा गर्ने जोशीकाे नाममा विद्यालय स्थापना गर्ने तयारी सुरु भइसकेकाे मन्त्री श्रेष्ठले बताए । आगामी वर्ष बजेट व्यवस्था गरी विद्यालय स्थापनाकाे काम थालिने जानकारी गराउँदै मन्त्री श्रेष्ठले भने, 'उहाँको नाममा खुल्ने विद्यालयको नाम सत्यमोहन जोशी माध्यमिक विद्यालय हुनेछ । मूल ढोकामा उहाँको पूर्णकदको प्रतिमा रहनेछ । सुन्दर बगैँचाको बीचमा बन्ने विद्यालय दरबार हाईस्कुलजस्तै भव्य हुनेछ ।'

विद्यालय कुन ठाउँमा स्थापना गर्दा राम्राे हुन्छ भन्ने प्रश्नमा संस्कृतिविद् जोशीले भने, 'यही स्थानामा स्थापना गर्नुपर्छ भन्ने छैन, जहाँ आवश्यकता छ, त्यही स्थानमा बनाउनुस् । जुन जिल्लाका विद्यार्थीले पढ्न पाएका छैनन्, त्यो स्थानमा स्थापना गर्नुस् ।'

प्रकाशित मिति: मंगलबार, चैत १७, २०७७ १८:१८