विपिनको अर्बान स्पेस योजना- प्रशस्त खाली ठाउँ, पाइपलाइनबाटै ग्यास (भिडियोसहित)

विपिनको अर्बान स्पेस योजना- प्रशस्त खाली ठाउँ, पाइपलाइनबाटै ग्यास (भिडियोसहित)

A+ A A-

घर निर्माणमा रुचि राख्नेहरूका लागि विपिन गैरे परिचित नाम हो । घर निर्माणको पुरातन शैलीमा परिवर्तन ल्याएको छ उनको कम्पनी ‘मेरो घर प्रालि’ले ।

छोटो अवधिमै ‘मेरो घर’ले निर्माण गरेका २५० भन्दा धेरै घर प्रयोगमा आइसकेका छन् । कम्पनीले ५ हजारभन्दा धेरै घरको डिजाइन गरिसकेको छ । १० हजारभन्दा धेरैलाई घर निर्माणका लागि परामर्श दिइसकेको छ ।

कम्पनीले शहरीक्षेत्रमा घर बनाउन चाहनेलाई निःशुल्क परामर्श दिने, भौगोलिक संरचना र त्यहाँको मौसम अध्ययन गरेर घरको डिजाइन तयार पारिदिने गर्छ । घर बनाउँदा पालना गर्नुपर्ने सरकारी नियम र मापदण्डको जानकारीसहित घर निर्माण गर्ने काम पनि मेरो घरले गर्छ ।

विपिनलाई यी कामले मात्र सुन्तुष्टि दिन सकेको थिएन । व्यवसाय विस्तार भए पनि अव्यवस्थित बन्दै गएको शहरको चिन्ताले पिरोलिरहन्थ्यो । व्यवस्थित शहर र सुरक्षित आवासको अवधारणासहित उनले नयाँ प्रोजेक्ट ‘अर्बान स्पेस प्रोपर्टी डेभलपर्स’ सुरु गरे ।

यस योजनाअन्तर्गत उनले थोरै जमिनको वैज्ञानिक उपयोग गर्ने तरिका पहिल्याए । ‘अर्बान स्पेस परम्परागत हाउजिङ वा अपार्टमेन्ट होइन । यो थोरै जग्गा प्रयोग गरी धेरै लाभ उठाउने अवधारणा हो,’ विपिनले शिलापत्रसगँ भने, ‘शहरी क्षेत्रमा हामीसँग जमिन थोरै छ र महँगो छ । यही थोरै जमिनलाई अप्टिमाइजेसन गर्नुको विकल्प हामीसगँ छैन ।’

अर्बान स्पेस अवधारणामा शहरी क्षेत्र वा शहरी क्षेत्रनजिकको स्थानको थोरै जमिनको प्रयोग गरिन्छ । थोरै जमिनमा पर्खाल नलगाई सामूहिक आवासका लागि घर निर्माण गरिन्छ ।

यो अवधारणअन्तर्गत पर्खाल नलगाई दुईवटा लहरमा घर बनाइन्छ । दुई लहरको बीचमा ८ आनाजति खाली जमिन बाँकी राखिन्छ । पर्खालको काम घरका भित्ताले गर्छन् । दुई लहरको बीचमा छाडिएको खाली ठाउँमा मैदान बन्छ । सडकतर्फ फर्काएर हरेक घरमा दुईवटा गाडी अट्ने पार्किङस्थल बनाइन्छ ।

‘छुट्टाछ्ट्टै घर बनाउँदा सबै घरको थोरै-थोरै जग्गा खेर जान्छ र त्यो प्रयोगमा पनि आउँदैन । हामीले त्यही जग्गालाई एकीकृत गर्न खोजेका हौँ,’ विपिन भन्छन्, ‘ग्राहकसँग ३ आनाको लालपुर्जा भए पनि ११ आना प्रयोग गर्न पाउँछन् ।’

भविष्यको शहरी बसाई सहज बनाउने उद्देश्यले सबै सेवा सुविधासहित यो परियोजना बनाइएको उनले बताए । सानो क्षेत्रमा बनाइने भए पनि घरको सुरक्षामा सम्झौता नगरेको उनको दाबी छ ।

भूकम्पप्रतिरोधीका साथै आगलागीको प्रकोपबाट समेत जोगिने गरी घर तयार गरिएको विपिनले बताए । आगलागीबाट जोगिन कम्पनीले प्रत्येक घरमा ‘फायर फाइटिङ इक्विपमेन्ट’ राखिएको छ । घरमा कतै धुवाँ आयो भने अलार्म बज्ने र त्यहाँ भएको अग्नि नियन्त्रक उपकरणले आगो निभाउन मिल्ने प्रविधि घरमा जडान गरिएको उनले बताए ।

विपिन गैरे

यी घरमा नेपालमै पहिलो पटक फायर वाल जडान गरिएको छ । यो वालले एउटा घरमा आगो लागेमा अर्को घरमा सल्किन नदिने काम गर्छ ।

घरको निर्माण वातानुकुलित तरिकाले गरिएको छ । ‘सामान्य घरमा जाडोमा निकै चिसो र गर्मीमा निकै तातो हुन्छ यो समस्या सुल्झाउन ‘डबल ग्लेज्ड’ झ्याल प्रयोग गरेका छौँ,’ उनले भने, ‘डब्बल ग्लेज्ड झ्यालमा दुईवटा सिसा प्रयोग गरिएकाले थर्मल इन्सुलेसन हुन्छ र धेरै जाडो पनि हुँदैन, धेरै गर्मी पनि हुँदैन । त्यस्तै, यसले ध्वनि प्रदूषण पनि रोक्छ ।’

यी घरमा ग्यासका सिलिण्डर बोक्नु पर्दैन । ग्यास सिलिण्डरले भान्साकोठाको ठाउँ पनि ओगट्दैन । प्रत्येक घरमा पाइपलाइनबाट चुलोमा ग्यास पुग्ने प्रविधि जडान गरिएको छ ।

‘हामीले पाइपलाइनबाटै प्रत्येक घरमा ग्यास पुर्‍याउने प्रविधि जडान गरेका छौँ,’ विपिन भन्छन, ‘महिनैपिच्छे सिलिण्डर फेर्ने झण्झट पनि हुँदैन । ग्राहकले मिटरमा देखिएअनुसारको पैसा तिरे पुग्छ ।’

घरको अगाडिको भाग

विपिनका अनुसार सबै घरमा चौबीसै घण्टा पिउन योग्य पानी उपलब्ध हुन्छ । हाउजिङ तथा अपार्टमेन्टमा जस्तो यहाँ सोसाइटी शुल्क तिर्नु पर्दैन ।

घर खरिदकर्ताले आफ्नो घर बेच्न पाउँछन् । तर, भत्काउन भने पाउँदैनन् । घरभित्रको डिजाइन/रङ परिवर्तन गर्न पाइन्छ । तर, बाहिरको भने पाइँदैन । त्यसैगरी, कम्पनीले आवश्यकताअनुसार घर बाहिरी भागको रङरोगन गरिदिन्छ ।

दुईवटा लहरमा हुने यी घर साढे तीन तलाका हुन्छन् । टाइप ‘ए’ र टाइप ‘बी’ गरेर दुई प्रकारका घर हुने विपिनले बताए । ‘टाइप ए’ दुवैमा चारवटा बेडरुम र टाइप बीमा एउटा बेड अनि रुम हुने कम्पनीले बताएको छ ।

कम्पनीले यी घरको सुरुवाती मूल्य ३ करोड ६० लाख निर्धारण गरेको छ भने सेवा सुविधा थपिएसँगै मूल्य पनि बढ्नेछ ।

सातदोबाटोमा पाइलट प्रोजेक्टको रूपमा सुरु भएको यो परियोजनामा पहिलो चरणमा १२ वटा घर बन्छ । जसमध्ये एउटा घर भने सर्भिस ब्लकको रुपमा प्रयोग हुनेछ ।

सर्भिस ब्लकको बेसमेन्टमा गेस्ट पार्किङ हुनेछ, भने ग्राउण्ड फ्ल्लोरमा ग्रोसरी, क्याफेको सुविधा हुनेछ । सर्भिस ब्लकको पहिलो तलामा ‘फिटनेस सेन्टर’ र दोस्रो तलामा कम्पनीको कार्यालय रहनेछ ।

२०७९ को वैशाखमा ग्राहकलाई घर हस्तान्तरण गर्ने योजनासहित कम्पनीले घर निर्माण गरिरहेको छ ।