जोडिने भए सहकारी र माइक्रोफाइनान्स पनि डिजिटल भुक्तानीमा

A+ A A-

वित्तीय कारोबार गर्दै आइरहेका सहकारी र माइक्रोफाइनान्स पनि अब डिजिटल भुक्तानीमा जाेडिने भएका छन् । उक्त कार्यका लागि डिजिटल भुक्तानी सेवाप्रदायक कम्पनी ई–सेवा र इन्फो डेभलपर्सबीच हालै सम्झौता भएको छ ।

सम्झौतापत्रमा ई–सेवाका प्रमुख कार्यकारी अधिकृत सुभास सापकोटा र इन्फो डेभलपर्सका प्रमुख कार्यकारी अधिकृत उमेश रघुवंशीले हस्ताक्षर गरेका छन् ।

कार्यक्रममा ई–सेवाका प्रमुख कार्यकारी अधिकृत सुभास सापकोटाले हाल ९० प्रतिशतभन्दा धेरै रकम क्यासमा कारोबार भइरहेको र यसलाई डिजिटल बनाउन सहकारी र माइक्रोफाइनान्सको भूमिकामहत्त्वपूर्ण रहेको बताए । उनले भने, 'यो सहकार्यले डिजिटल इकोनोमी बनाउने अभियानमा ठूलो सहयोग पुग्नेछ ।'

यस्तै, इन्फो डेभलपर्सका प्रमुख कार्यकारी अधिकृत उमेश रघुवंशीले ई–सेवासँगको सहकार्यले सहकारी र माइक्रोफाइनान्सलाई डिजिटल भुक्तानीमा जोड्दा सदस्यहरूलाई सहज हुनुका साथै सहकारी र माइक्रोफाइनान्सको निक्षेप पनि बढ्ने र यसले समग्र अर्थतन्त्रलाई पनि चलायमान बनाउने बताए ।

सम्झौतासँगै इन्फो डेभलपर्सले निर्माण गरेका सफ्टवेयर प्रयोग गरेका सहकारी तथा माइक्रो फाइनान्स डिजिटल भुक्तानीमा जोडिनेछन् । उनीहरूले कोर बैंकिङ सिस्टमबाटै डिजिटल भुक्तानीको सुविधा दिन सक्नेछन् । जसबाट सहकारी तथा माइक्रो फाइनान्सका सदस्यले युटिलिटी बिल भुक्तानी, रेमिट्यान्स् भुक्तानी, एक सहकारी खाताबाट अर्को सहकारी खातामा रकम ट्रान्सफर, बैंकमा रकम ट्रान्सफर तथा क्यूआर स्क्यान गर्ने सुविधा पाउनेछन् ।

साथै, सहकारी तथा माइक्रोफाइनान्सका सदस्यले पनि बैंकका ग्राहकले जस्तै सबै सुविधा उपयोग गर्न पाउनेछन् ।

मोबाइल तथा इन्टरनेटको माध्यमबाट भुक्तानी गर्न सकिने सेवा दिएको ई–सेवामा हाल प्रत्यक्ष रूपमा खाता खोल्नेको संख्या ४२ लाख नाघेको छ । यसैगरी, अप्रत्यक्ष रूपमा करिब १ करोड ५० लाख जनसंख्याले ई–सेवामार्फत सेवा लिइरहेका छन् । हाल ई–सेवाका देशभर करिब १ लाखभन्दा बढी एजेन्ट छन् भने मर्चेन्टको संख्या १ लाख ८५ हजार नाघिसकेको छ ।

त्यस्तै, विभिन्न क्षेत्रका सफ्टवेयर निर्माणमा विगत १७ वर्षदेखि क्रियाशील कम्पनी इन्फो डेभलपर्स सूचना प्रविधिको क्षेत्रमा क्रियाशील संस्था हो । यस कम्पनीले सहकारी तथा माइक्रो फाइनान्सलाई आवश्यक पर्ने विभिन्न किसिमका सफ्टवेयर निर्माण गर्दै आइरहेको छ भने मोबाइल बैंकिङ, इन्टरनेट बेंकिङ र ट्याब्लेट बैंकिङमार्फत अनलाइन र अफलाइन ब्रान्चलेस बैंकिङ सेवा र क्रेडिट युनियन, बैंक र माइक्रो फाइनान्सका लागि सोलुसनसमेत प्रदान गर्दै आएको छ । इन्फो डेभलपर्स आईएसओ ९००१:२०१५ सर्टिफाइड आईसीटी कम्पनी हो ।

प्रकाशित मिति: मंगलबार, चैत १७, २०७७ १२:५५