विराटनगर विमानस्थल विस्तारका लागि जग्गा अधिग्रहणमा ढिलाइ

A+ A A-

मोरङको विराटनगर विमानस्थल विस्तारका लागि जग्गा अधिग्रहणको प्रक्रियामा ढिलाइ भएको छ ।

विमानस्थल विस्तारका लागि आवश्यक पर्ने १२६ दशमलव ४६ बिघा जग्गा अधिग्रहण गर्ने निर्णय अनुसार जग्गा रोक्का गरिएपनि पुरानो कित्ता नम्बरका छुट्याउन समय लागेकाले अधिग्रहणको प्रक्रियामा ढिलाइ भएको हो ।

विराटनगर विमानस्थललाई अन्तर्राष्ट्रियस्तरको विमानस्थलमा स्तरोन्नती गर्न थप १२६.४६ बिघा जग्गा संघीय सरकार मन्त्रिपरिषद्‍को निर्णयले अधिग्रहण गर्ने निर्णय गरेको थियो । सोही निर्णय बमोजिम जग्गाको किनबेच रोक्का गर्दै मालपोत कार्यालयले अधिग्रहणका लागि जग्गा निर्क्यौल गर्ने प्रक्रिया सुरु गर्‍यो ।

तर, विमानस्थलको अधिग्रहणमा पर्ने त्यस क्षेत्रका अधिकांश घर जग्गामा साविकको कित्ता नम्बर रहेको र उक्त नम्बरबाट कित्ताकाट भएका कारण जग्गा अधिग्रहण गर्न सम्बन्धित जग्गा नभेटिएको भूमिसुधार तथा मालपोत कार्यालय मोरङका प्रमुख नरेन्द्र पौडेलले बताए ।

उनले ८० प्रतिशत जग्गाको श्रेस्ता उपलब्ध गराउन सकिएपछि मात्र विराटनगर विमानस्थलले जग्गा अधिग्रहण गर्ने सूचना निकाल्न मिल्ने बताए । जग्गा अधिग्रहण गर्न जग्गाको श्रेस्ता उपलब्ध गराउने काममा कार्यालय लागिपरेको उनले दाबी गरे । ‘८० प्रतिशत जग्गाको श्रेस्ता उपलब्ध भएपछि विमानस्थलले जग्गा अधिग्रहण गर्ने सूचना निकाल्न मिल्छ,’ उनले भने, ‘जग्गा अधिग्रहण गर्न जग्गाको श्रेस्ता उपलब्ध गराउने काममा हामी लागि परेका छौँ ।’

विराटनगर विमानस्थल प्रमुख उत्सव खरेलले विमानस्थल विस्तारका लागि मोरङ र सुनसरीमा पर्ने १२६.४६ बिगाहा जग्गा अधिग्रहण गरेर विराटनगर विमानस्थलको स्तरोन्नतीका लागि जग्गा अधिकरण गर्ने प्रक्रियामा विमानस्थल जुटेको बताए ।

‘एयरपोर्टको विकास र विस्तारका लागि अहिले हामी प्रारम्भिक चरण र जग्गा अधिग्रहणको प्रक्रियामा छौँ । यसको प्रक्रिया अघि बढिरहेको छ,’ उनले भने, ‘हामीले सहजरुपमा हाम्रो काम समयमा गर्न सक्यौँ भने चरणवद्ध रुपमा काम हुन्छ ।’ उनका अनुसार विस्तारपछि विमानस्थल विराटनगरसँगै सुनसरीको बर्जु गाउँपालिकासम्म फैलिनेछ ।

विस्तार गर्दा हाल विमानस्थल रहेको स्थानबाट पूर्वतर्फ ७.८३ बिगाहा, पश्चिमतर्फ ६९.१४, उत्तरतर्फ ३५.८१ र दक्षिणतर्फ ८.८७ तथा सडकका लागि ३.७० बिगाहा जग्गा अधिग्रहण गरिने विमानस्थलका प्रमुख पोखरेलले जानकारी दिए । विमानस्थल विस्तार गर्दा तीन सय घरपरिवार विस्थापित हुने विमानस्थल पीडित संघर्ष समितिका संयोजक बेदराज पौडेलले बताए ।

उनले विमानस्थल विस्तार गर्दा विस्थापित हुने परिवारका लागि उचित क्षतिपूर्ती दिनुपर्ने बताए । ‘यो अन्तर्राष्ट्रिय विमानस्थल बन्ने क्रममा रहेकाले जग्गा अधिग्रहणको प्रक्रिया अघि बढाइएको छ । यसबाट यो क्षेत्रका करिब तीन सय परिवार विस्थापित हुँदैछौं । त्यसैले हामीले संघर्ष समिति पनि गठन गरेर अघि बढेका छौँ,’ उनले भने, ‘विराटनगर विमानस्थल अन्तर्राष्ट्रिय स्तरको बन्नु हुँदैन भन्ने पक्षमा हामी कोही पनि छैनौं । तर, राज्यले उचित क्षतिपूर्ति दिनुपर्छ भन्ने उद्देश्यले सरकारको सहयोगी बन्न संघर्ष समिति बनाएका हौं ।’

विस्तारपछि विमानस्थलको धावनमार्गको लम्बाइ दुई हजार पाँच सय मिटर हुनेछ । हालको धावनमार्ग एक हजार पाँच सय मिटरको छ । अहिले विराटनगर विमानस्थलबाट दैनिक १४ वटा उडान-अवतरण हुँदै आएका छन् । यी उडानबाट दैनिक १९ सय जना यात्रु आवातजावत गर्ने गरेको विमानस्थलले जनाएको छ ।

प्रकाशित मिति: सोमबार, चैत १६, २०७७ १७:४२