प्रचण्ड–माधवलाई गोप्य वार्तास्थल उपलब्ध गराउने व्यापारी को हुन् ?

A+ A A-

१६ चैतको मध्याह्न माओवादी केन्द्रका अध्यक्ष पुष्पकमल दाहाल 'प्रचण्ड' र नेकपा एमाले नेता माधव नेपालबीच काठमाडाैंकाे काटेश्वरमा संवाद भयो ।

काटेश्वरमै छ, माधवकुमार नेपालकाे निवास । तर प्रचण्ड र नेपालकाे संवादथलाे नेपाल निवास भने हाेइन । कोटेश्वरस्थित व्यापारी टपीन्द्र तिमल्सिनाको घरलाइ उनीहरूले भेटवार्तास्थल राेजेका छन् । झन्डै दुई घण्टाको त्यो संवादमा माओवादी नेता नारायणकाजी श्रेष्ठ र एमाले नेता भीम रावल पनि सहभागी थिए ।

तिमल्सिनाकाे घरमा प्रचण्ड–नेपालले चैतयता मात्रै तीन पटक भलाकुसरी गरिसके । १३ चैतमा आफूनिकट केन्द्रीय सदस्यहरूको बैठकमा जानुअघि नेता नेपालले तिमल्सिनाकै घरमा प्रचण्डसँग भेटेका थिए ।

नेकपा बदर गर्ने सर्वोच्च अदालतको २३ फागुनकाे फैसलाविरुद्ध पुनरावलोकनमा जाने निर्णयअनुसार माओवादी १३ चैतमा अदालत जाने तयारीमा थियो । त्यस दिनको प्रचण्ड र माधव नेपालको छलफलपछि माओवादी निकट कानुनव्यावसायी मुक्ति प्रधान र रमन श्रेष्ठ अदालत जानबाट रोकिएका थिए ।

अर्थात्, तिमल्सिनाको घरमा प्रचण्ड र नेपालबीच रणनीतिक संवाद बाक्लो भइरहेको छ । तर, धेरैले तिमल्सिनालाई भने चिनेका छैनन् । उनी व्यापारीसँगै एमालेका कार्यकर्तासमेत हुन् ।

को हुन् टपीन्द्र तिमल्सिना ?

प्रचण्ड र माधव नेपालको वार्ताका लागि घर नै उपलब्ध गराउने व्यापारी टपीन्द्र सिन्धुपाञ्चोकका स्थायी बासिन्दा हुन् । साबिक पाङ्ग्रेटार गाविस र अहिलेको सुनकोसी गाउँपालिका पुर्ख्यौली घर भएका तिमल्सिना खासमा एमालेका जिल्लास्तरीय नेता हुन् ।

तत्कालीन एमालेको जिल्ला कमिटी सदस्य रहेका तिमल्सिना एमाले र माओवादी केन्द्र एकता हुँदा भने जिल्ला कमिटीमा अटाएनन् । त्यतिबेला तिमल्सिनाको व्यवस्थापन व्यापारिक मोर्चामा भएको थियो । तत्कालीन नेकपाले गठन गरेको वाणिज्य संघमा उनी सल्लाहकार थिए । उनी सीमापार व्यापार संघमा पनि आवद्ध छन् ।

जिल्लाको राजनीतिमा भने केपी ओलीनिकट सरेश नेपालले तिमल्सिनालाई राजनीतिमा ल्याएका थिए । लामाे समय सरेशसँग नजिक रहेका तिमल्सिना पछिल्लाे कालखण्डमा माधव नेपाल समूहसँग नजिकिए । सरेशलाई छोडेपछि तिमल्सिनाको सम्बन्ध जिल्लाका अन्य नेता शेरबहादुर तामाङ, अरुण नेपाललगायतसँग जोडिन पुगेको थियो ।

त्यही सम्बन्धबाट माधव नेपालसम्म पहुँच विस्तार गरेका तिमल्सिना तत्कालीन नेकपामा पनि प्रचण्ड–माधव नेपाल समूहमा सक्रिय थिए । आफूलाई राजनीतिमा ल्याएका सरेशबाट टाढिएर शेरबहादुर र अरुणसँग नजिकिएका तिमल्सिना शेरबहादुर माधव समूहबाट ओली खेमातिर फर्किए पनि उनी नेपालकै साथमा छन् ।

एमाले नेता तामाङ आफूहरूले नै तिमल्सिनालाई राजनीतिमा ल्याएको दाबी गर्छन् । तामाङले शिलापत्रसँग भने, ‘हामीले नै राजनीतिमा ल्याएको हो, व्यापारमा पनि संलग्न टपीन्द्रजीलाई मैले व्यक्तिगत रूपमा भेटेर कुरा गर्नुपर्नेछ ।’

चिनियाँ सामग्री नेपाल आयात गरेर बिक्री गर्ने व्यापारी हुन्, उनी । चीनबाट कपडा ल्याउने र काठमाडौंको महाबाैद्धमा होलसेल पसल सञ्चालन गर्ने तिमल्सिनाले आर्थिक हैसियत भने राम्ररी उकासेका छन् । खासा व्यापारले नै तिमल्सिनाले काठमाडौंको कोटेश्वर, बागबजार र भक्तपुरको लोकन्थलीमा घर बनाएको उनीनिकट स्रोतको भनाइ छ ।

साथै, तिमल्सिना नेताहरूलाई जिल्ला आवतजावतमा पनि प्रशस्तै सहजीकरण गर्छन् । तिमल्सिनानिकट स्रोतका अनुसार नेताहरूलाई आफ्नै गाडी दिएर पनि जिल्लामा ल्याउने–लैजाने गर्छन् । गाडी मात्र होइन, आवश्यक पर्दा पैसाकाे जाेहाेसमेत गरिदिन्छन् ।

व्यापारी तिमल्सिना भने आफू व्यापारीभन्दा बढी राजनीतिकर्मी भएको बताउँछन् । भन्छन्, ‘म व्यापारभन्दा बढी राजनीतिमै छु, मेरो सानो पसल छ । त्यसैले व्यापारी भनेको मात्रै हो ।’

प्रचण्ड र माधव नेपालहरूको वार्तास्थल भएको तिमल्सिनाको घर भने फराकिलाे कम्पाउन्डसिहतकाे ठूलो छ । सानातिना बैठक गर्नलाई पुग्ने ठाउँ भएका कारण नेताहरू घरमा आएको तिमल्सिनाको भनाइ छ ।

‘केही समयअघि मेरो छोरा बित्दा नेताहरू आउनुभएको थियो । मेरो घरको स्पेस धेरै देख्नुभएर उपयाेग गराैं भन्नुभयाे । त्यसैले अहिले छलफलका लागि उहाँहरू जम्मा हुनुभएको मात्रै हो, त्यसमा अरु केही स्वार्थ छैन,’ उनले भने ।

प्रकाशित मिति: सोमबार, चैत १६, २०७७ १८:२०