शेयर बेचेको पैसा पाउन लगानीकर्तालाई सकस, महिना दिनसम्म कुराउँछन् ब्रोकर

A+ A A-

शेयर बिक्री गरेको महिना दिन बितिसक्दा समेत ब्रोकरले राफसाफ गरी लगानीकर्तालाई भुक्तानी नगर्दा लगानीकर्ता आजित बनेका छन् ।

शेयर खरिद गरेको दुई दिनभित्र राफसाफ सकेर बिक्रेतालाई भुक्तानी गरिसक्नुपर्ने नियम नै भएपनि महिना दिनसम्म पनि भुक्तानी नगरेको भन्दै जिल्ला प्रशासन कार्यलय मकवानपुरमा उजुरी परेको हो ।

मकवानपुरको हेटौँडाकी सुनिता पण्डितले सात दिनभित्र भुक्तानी गर्नु पर्ने रकम एक महिनासम्म आफूले नपाएको भन्दै स्वर्ण लक्ष्मी सेक्युरिटिज प्रालिविरुद्ध उजुरी हालेकी हुन् । उजुरीमा आफूले ११ फागुनमा बेचेको शेयरको भुक्तानी ब्रोकरले समयमा नदिने र फोन गर्दा पनि बेवास्ता गर्ने काम गरेको उल्लेख छ ।

आफूले कम्पनीविरुद्ध उजुरी हाल्ने चेतावनी दिएपछि शेयर बेचेको ३२ दिन पछिमात्रै भुक्तानी पाएको बताउँदै उनले लगानीकर्ताको अधिकार हनन भएकाले उजुरी दिएको बताइन् ।

शिलापत्रसँग कुराकानी गर्दै पण्डितका श्रीमान रमेश पण्डितले ब्रोकरले समयमा रकम भुक्तानी नगर्दा मारमा परेको बताए । उनले भने, ‘जग्गा किन्न होल्ड गर्नुपर्ने शेयर पनि बेचेको थिएँ । तर, समयमा पैसा नआएपछि अप्ठ्यारोमा परियो ।’ टी प्लस टु नीति भर्खरै कार्यान्वयनमा आएकाले उनी समयमा नै भुक्तानी हुने र त्यही पैसाले जग्गा किन्ने तयारीमा थिए ।

‘सात दिनमा आउला भन्ने ठानेको तर ३२ दिनसम्म कुर्नु पर्‍यो,' उनले भने । भुक्तानीबारे बुझ्न ब्रोकर अफिसको शाखा कार्यालयमा जाँदा पनि कर्मचारीले बेवास्ता गरेको उनले बताए ।

उनको जस्तै गुनासो छ गोपाल ऐरको । उनले पनि आफूले शेयर बेचेको १५ दिन भइसक्दा पनि ब्रोकरले पैसा दिन आनाकानी गरिरहेको बताए ।

पाण्डे र ऐर त प्रतिनिधि पात्र मात्र हुन् । हरेक दिनजसो लगानीकर्ताहरूले सामाजिक सञ्जालमा ब्रोकरले दिनुपर्ने सेवा पनि पाउन लगानीकर्तालाई सकस हुने गरेको गुनासा पोखिरहेको पाइन्छ । तर, यसबारे लगानीकर्ताको गुनासो सुन्ने नियामक निकाय धितोपत्र बोर्ड जानकार छैन ।

ब्रोकर एसोसिएसनका अध्यक्ष सन्तोष मैनाली टी प्लस टु नीति कार्यान्वय भएपनि ब्रोकर र लगानीकर्ताबीचको तादम्यताको अभाव समस्या सिर्जना हुँदा लगानीकर्ताको गुनासो बढेको स्वीकार्छन् । ब्रोकरले नीति अनुसार नै काम गरेपनि आन्तरिक समस्या समाधान नहुँदा राफसाफसँगै भुक्तानीमा समस्या देखिने गरेको अध्यक्ष मैनालीको भनाइ छ ।

प्रकाशित मिति: सोमबार, चैत १६, २०७७ १३:२८