रानीजमरा–कुलरिया सिँचाइ आयोजनाः प्रभावित किसानलाई ३ करोड

A+ A A-

रानीजमरा–कुलरिया सिँचाइ आयोजनाको कमान्ड क्षेत्रमा पर्ने पूर्वी कैलालीको टीकापुर, लम्कीचुहा र जानकी गाउँपालिका क्षेत्रका किसानलाई कृषिमा आत्मनिर्भर बनाउन आयोजनाले कृषि आधुनिकीकरण परियोजना सञ्चालन गरिरहेको छ ।

सोअन्तर्गत चालू आर्थिक वर्षमा कृषिमा आधुनिकीकरणका लागि ३ करोडको यान्त्रीकरण र केराको च्याम्बरका लागि २ करोड विनियोजन गरिएको छ ।

परियोजनाअन्तर्गत १ सय ९१ हेक्टर क्षेत्रमा गहुँ, बीउ उत्पादन, बीउ भण्डारणका लागि कोल्ड स्टोर निर्माण गरिने आयोजनाले जनाएको छ । यस्तै, प्रतिबिघा ४० हजार अनुदान दिने गरी ४ सय बिघामा केरा खेती र च्याउ उत्पादनमा अनुदानका कार्यक्रम रानी जनमरा कुलरिया सिँचाइ आयोजनाको कृषि कार्यक्रम कार्यान्वयन इकाइमा छ ।

यस्तै, २० वटा नेट हाउस निर्माणका लागि ५० लाख विनियोजन गरिएको छ । आयोजनाअन्तर्गत कृषि कार्यालयका प्रमुख सुनिल सिंहले दोस्रो चरणको कार्यक्रम सञ्चालनको तयारी भइरहेको बताए ।

दोस्रो चरणको कार्यक्रमले बालीको ब्लक–ब्लक बनाएर खेतीपातीमा जोड दिने र कृषि उत्पादनमा सहयोग गर्नेछ । खेतीको ब्लक कम्तीमा ३० बिघा, फलफूलको २० देखि ३० बिघा र खाद्यान्नको बीउ उत्पादनका लागि ५० देखि ६० बिघाको ब्लक बनाएर खेतीमा सहयोग गर्ने योजना छ ।
रानीजमरा–कुलरिया कुलो सिँचाइ आयोजनाअन्तर्गत पहिलो चरणको प्रचारात्मक र कृषक जागरण कार्यक्रम सकिएपछि दोस्रो चरणको कृषि उत्पादन सहयोग कार्यक्रम सुरु गरिएको हो ।

दोस्रो चरणअन्तर्गत सिँचाइ आयोजनाको कमान्ड क्षेत्रमा कृषि उत्पादन र बजारीकरणका लागि आवश्यक प्राविधिक सेवा र सामान्य पूर्वाधार सहयोग गरिनेछ ।

कृषितर्फको कार्यालयले बाली उत्पादनमा लागत र आम्दानीको ट्र्याकिङ प्रणाली लागू गरेको छ । बाली उत्पादनको लागत खर्च र आम्दानीको हिसाब गर्न यस्ता प्रणाली पनि लागू गरेको हो ।

पोस्ट हार्वेस्ट केन्द्र स्थापना, कृषि यान्त्रीकरण उपकरण, नर्सरी ग्रिन हाउस, सेड हाउस स्थापना सहयोग, प्रविधि अवलम्बन स्थापना सहयोग, प्रविधि अवलम्बन सहयोगलगायतका कार्यक्रम दास्रो चरणमा छन् ।

दोस्रो चरणका अधिकांश कार्यक्रम सम्झौता भएर सुरु भइसकेका छन् । दोस्रो चरणका कृषि सहयोग कार्यक्रमको अवधि ५ वर्ष छ भने यसको बजेट करिब १० मिलियन डलर अर्थात् एक अर्ब बढी छ ।

रानीजमरा कुलरिया सिँचाइ आयोजनाअन्तर्गत कृषितर्फको दोस्रो चरणको कार्यक्रम सम्पन्न भएसँगै चालू आवदेखि नै दोस्रो चरणको कार्यक्रम ५ वर्षसम्म सञ्चालन हुनेछ भने विश्व बैंकको सहयोगमा आयोजनाको कमान्ड क्षेत्रमा एक अर्ब बढी बजेट खर्च भएको छ । चालू आवमा मात्रै १७ करोड बढी बजेट खर्च गर्ने योजना रहेको आयोजनाले जनाएको छ ।

प्रकाशित मिति: बुधबार, जेठ १, २०७६ २३:०९