एनजीओको मिलेमतोमा कूटनीतिक सवारी दुरुपयोग

A+ A A-

यूएसएडले राष्ट्रिय एचआईभी एड्स महासंघलाई एचआईभी संक्रमितका लागि उपभोग गर्न दिएको कूटनीतिक गाडी (मिनिबस) एकाएक गायब भयोे । उसले राष्ट्रिय एचआईभी तथा एड्स महासंघलाई एचआईभी रोकथाम, हेरचाह, सहयोग तथा सुरक्षाको कार्यक्रमका लागि ६१–०–३७३ नम्बरको कूटनीतिक गाडी उपलब्ध गराएको थियो ।

महासंघका अनुसार कार्यालयले गाडी ल्यायो । तर, राख्ने ठाउँ अभावका कारण ग्यारेजमा राख्यो । ग्यारेजमा राखेको एक सातापछि गाडी गायब भयो ।

२५ मे २०१८ मा प्राप्त गाडी ग्यारेजमा राखेपछि महासंघले पनि चासो देखाएन । १ फेब्रुअरी २०१९ मा नयाँ कार्यसमिति आयो । आफ्नो कार्यालयको जिन्सी जाँच गर्दा गाडी प्राप्त भएको कागजात फेला पार्याे । तर, गाडी भने भेट्याएन ।

गाडीको विषयमा पूर्वअध्यक्ष, कार्यसमितिका पदाधिकारीलगायत कर्मचारीसँग सोधपुछ गरियो । तर, गाडी कतै फेला परेन ।

करिब तीन महिनाको खोजीपछि गाडी ग्यारेजमा नभई भक्तपुरस्थित स्कुल फाउन्डेसनको आँगनमा पार्क गरेर राखेको अवस्थामा फेला परेको एक कर्मचारीले बताए ।

गाडी कसरी स्कुलको प्रांगणमा आइपुग्यो र स्कुलले कसरी उपभोग गर्यो भन्ने विषयमा स्कुलले समेत कुनै जवाफ दिन सकेन ।

कूटनीतिक नम्बर प्लेटको उक्त गाडी स्कुल फाउन्डेसनले चावहिलको अस्कर कलेजका विभिन्न कामका लागि प्रयोग गर्ने गरेको खुल्न आएको छ ।

स्कुल फाउन्डेसनका अध्यक्ष सागर उद्गम आफूलाई उक्त गाडी महासंघका पूर्वअध्यक्षले दिएको बताउँछन् । गाडी कसरी प्राप्त भयो भन्ने शिलापत्रको जिज्ञासामा उनले अध्यक्षले दिएको भन्दै थप बुझ्न महासंघमै सम्पर्क गर्न सल्लाह दिए ।

महासंघका लागि उपलब्ध गराइएको सो सवारी स्कुलले नै सम्झौतासमेत नगरी लिएको महासंघका नयाँ पदाधिकारी बताउँछन् । तर, स्कुल फाउन्डेसनका अध्यक्ष सागर भने यो विषयमा ‘अमेरिकन एडसँग नै सोध्नू’ भन्दै कूटनीतिक गाडीको विषयमा कसैलाई जानकारी दिन जरुरी नरहेको बताउँछन् ।

स्कुल फाउन्डेसनले एचाईभी एड्स महासंघलाई दिएको गाडी फुत्काएर लगेको मात्र नभई उक्त गाडी कलेजको आफ्नो प्रयोजनका लागि प्रयोग गरेको खुल्न आएको छ । अध्यक्ष सागर उक्त कलेजसँग सम्बन्धित भएकाले कलेजमा गाडी प्रयोग गरेको देखिन्छ ।

यूएसएडले दिएको गाडी कसरी अरुको पोल्टामा गयो भन्ने प्रश्नमा एचआईभी एड्स महासंघका केन्द्रीय अध्यक्ष राजेश दिदिया आफू भर्खर महासंघको नेतृत्वमा आएकाले कूटनीतिक गाडीबारे आफूलाई थाहा नभएको बताउँछन् ।

उनी महासंघको नेतृत्वमा आएको चार महिना भयो । सवारी दुरुपयोगका विषयमा निर्वाचित भएपछि मात्र बल्ल थाहा पाएको बताउँदै उनले खोजी कार्य जारी रहेको बताए ।

‘गाडी खोज्न मात्र हामीलाई तीन महिना लाग्यो । हाम्रो जिन्सीमा गाडी छ । गाडी ग्यारेजमा भएको भन्ने पनि जानकारी पायौं । गाडी ग्यारेजमा राखेको एकै सातामा गाडीको ब्लु बुक र साँचो पनि गायब भएको भन्ने पनि जानकारी पायौं र यसको विषयमा हामी पनि जानकारी हासिल गरिरहेका छौं,’ उनी भन्छन् ।

महासंघका वर्तमान सचिव शिवराम गिरी पनि संस्थासँग गाडी भएको जानकारी आफू विजयी भएर आएपछि मात्र थाहा पाएको र खोज्न महिनौं लागेको बताउँछन् ।

‘हामीले गाडी खोज्यौं । गाडी सडकमा गुडेको छ भन्ने पनि पत्ता लाग्यो । तर, कसले कहाँ गुडाइरहेको छ भन्ने पत्ता लगाउन ३ महिना लाग्यो,’ उनले थपे, ‘स्कुल फाउन्डेसनले गाडी चलाएको छ भन्ने थाहा भयो । तर, उक्त फाउन्डेसनको कार्यालय पत्ता लगाउन भने गुगलको मद्दत लिनुपर्यो । बोर्ड पनि थिएन, कतै ठेगाना पनि थिएन ।’

स्कुल फाउन्डेसनले महासंघसँगको सहकार्यमा हालसम्म कुनै पनि एचआईभीसम्बन्धी काम नगरेकोे गिरी बताउँछन् ।

एचआईभी महासंघको ६१ जिल्ला र ७५ वटा साइडको कामका लागि उक्त गाडी यूएसएडले दिएको खुल्न आएको छ ।

महासंघका पूर्वअध्यक्ष अच्यूत सिटौलाले उक्त गाडी स्कुल फाउन्डेसनलाई दिएको भन्ने मात्र जानकारी पाएको महासंघले जनाएको छ । तर, के भनेर दिएको थियो ? कति समयका लागि हो ? कहिले कस्तो कन्डिसनमा फर्काउनुपर्ने हो ? यस विषयमा भने हालसम्म जानकारी नभएको र कुनै पनि कागज पनि नभएको महासंघले जनाएको छ ।

महासंघका पूर्वअध्यक्ष सिटौलासँग सम्पर्क गर्न खोज्दा उनी सम्पर्कमा आउन चाहेका छैनन् ।

यूएसएडसँग भएको सम्झौता