होलीमा टीसर्टको व्यापार घट्यो, व्यापारी भन्छन- कोरोनाको डरले ग्राहक आउनै छाडे

होलीमा टीसर्टको व्यापार घट्यो, व्यापारी भन्छन- कोरोनाको डरले ग्राहक आउनै छाडे

A+ A A-

न्यूरोडको पाको गल्लीको फुटपाथमा काजल गुप्ताको दोकान छ । उनले दोकान सुरु गरेको तीन वर्ष भयो । कपडाको खातैखातअगाडि राखिएको मुढामा उनको दैनिकी बित्छ ।

उनको दोकानमा अहिले 'ह्याप्पी होली', 'बुरा नमानो होली है' लेखिएका टीसर्टहरू बढी देखिन्छन् । दोकानलाई होली लागे पनि ग्राहकहरू भने खासै थिएनन् ।

काजल गुप्ता आफ्नो पसलमा

उनी दोकानअगाडि पत्रिकाको सानो टुक्रा जलाउँदै थिइन् । कागज जलाए व्यापार बढ्छ भन्ने विश्वास रहेछ उनको । उनी व्यपार नभएको दिनमा मात्र यसरी कागज जलाउँछिन् ।

काजल सुनाउँछिन्, ‘कोरोना बढेको समाचारले होलीको सामान किन्न आउने मान्छे नै छैनन् ।सोमबारदेखि त झन् न्यूरोडको चहलपहल पूरै घटेको छ ।’

दुई वर्षअगाडिको होलीमा उनले करीब १ हजार पिस टीसर्ट बेचेकी थिइन् । कोरोनाका कारण त्यसयताका होली उनको व्यापारका लागि खासै सुखद भएनन् । गत वर्ष करिब १ सय पिस टीसर्ट बिक्री गरेको उनले बताइन् । यो वर्ष त्यसभन्दा केही बढी व्यापार हुने उनको अपेक्षा छ । तर, बजार उत्साहजनक नरहेको उनको भनाइ छ ।

कोरोनाको सम्भावित जोखिमका कारण मानिसहरू सतर्कता अपनाएका छन् । जसको प्रभाव उनको व्यापारमा पनि परेको छ ।

न्यूरोडकै अर्का व्यापारी बासु गुप्तको पनि उस्तै गुनासो छ । तीन वर्षअगाडि ४-५ हजार पिससम्म होलीको टीसर्ट बेचेको गुप्ताले बताए । गत वर्षको होलीमा उनले ५०० पिस टीसर्ट बेचेका रहेछन् । ‘अघिल्लो वर्षको ५/६ सय टीसर्ट स्टकमा थियो, यो वर्ष त्यही टीसर्ट व्यपारको लागि राखेको छु,’ उनले भने ।

बिक्रीका लागि राखिएका होलीका टीसर्ट

चाडपर्वको समयमा व्यस्त रहने असन, इन्द्रचोक, न्यूरोड क्षेत्रमा होलीको अघिल्लो दिन पनि खासै चहलपहल देखिएको थिएन । व्यपारीहरूले रङ्ग, पिच्करी, लोला, ह्याप्पी होली लेखिएका टीसर्टहरू बिक्रीमा राखेका छन् । तर, ग्राहकहरू खासै छैनन् ।

सपिङका लागि न्यूरोड आएकी विपना गुरुङले होलीको टीसर्ट नकिनी फर्किइन् । अघिल्लो वर्ष पनि होली नखेलेको उनले बताइन् । ‘कोरोना फेरि बढेको खबर छ, यसपाली पनि साथीभाइसँग होली खेल्दिनँ । होली नै नखेल्ने भएपछि टीसर्ट किन किन्नु ?’ उनले भनिन् ।

न्यूरोडमै भेटिएकी रजनी कुँवर पनि यस वर्ष घरभित्रै होली खेल्ने बताउँछिन् । अघिल्लो वर्षकै टीसर्ट लगाएर घरभित्र होली खेल्ने उनको योजना छ ।

यस्ता टीसर्टको मूल्य १ सय देखी २५० रुपैयाँसम्म पर्छ । एक दिन मात्र प्रयोग हुने भएकाले ग्राहकहरूले होलीका टीसर्टहरू सस्तो मूल्यमा खोज्ने व्यपारीहरू बताउँछन् ।

प्रकाशित मिति: शनिबार, चैत १४, २०७७ १२:१९